1 Aba lidin Naasü le lurúeite Amón Habesi le lani Galaadü, aba laranseruniña lisudaranigu lun hageindagun hama lílana uburugu. Gama lumoun aba hariñagun lílana Habesi lun:

—Adügabá aban daradu wama, ábame wíchaagun woungua labun bererehan.

2 Lariñaga Naasü houn:

—Anhein busén hubéi nadügün aban daradu huma, gasu hánharun lun nasagaruni lagu kada aban hídangiñe, le lóunwenren, lun gayara lan léherahoun hau Ísüraelina.

3 Ábati hariñagun ábutigu Habesina lun:

—Ruba sedü weyu woun lun wóunahan asubudiragüdei katei le lidan sun hamúan Ísüraelina; ánheinti miabin ni aban íderaguawa, ábame wíchaagun woungua bun.

4 Aba hachülürün ha láubaña uganu uburugun Gibeá le ñein lubéi laganawa Saulu, aba híchuguni uganu houn gürigia. Aba hayahuahan sun hagía. 5 Ligíati liabin Saulu áraabugiñe hau bágasu, aba lariñagun:

—Ka san suserebei houn? Ka uagu hayahuaha?

Aba habahüdaguni uganu le hanügübei Habesina lun. 6 Dan laganbunbalin Saulu katei le, aba lebelurun lani Wabungiute sífiri lidoun; aba labuinchun Saulu lau igañi. 7 Ábati lanügün aban feru bágasu aba lapiisihaniña, aba lóunahaniña lidoun sun hamúan Ísüraelina. Hariñagati ha ounahóubaña:

—Le móundarunti lumoun Saulu luma Samueli, ítara luba giñe ladügǘn houn lilügüniña bágasu.

Aba lebelurun aban óunwenbu anufudei hadoun gürigia, aba houdin óundaragua hamoun. 8 Dan le labahüdünbaliña Saulu lumutuniña uburugu Bésekü, óundarati ǘrüwa-san-milu hádangiñe Ísüraelina hama darandi-milu hádangiñe Hudaana. 9 Ábati lariñagun houn ha buga ñǘbuinbaña lau uganu:

—Ariñaga humá houn lílana Habesi luagu wesefurubaña lan haruga amidirugu. Aba houdin, aba hariñaguni houn lílana Habesi ítara, aba hagundaarun Habesina saragu, 10 aba hariñagun lun Naasü:

—Haruga wederegeragua woungua bun, lun badügüni le babusenrun wau.

11 Larugan, aba ladügün Saulu ǘrüwa fánreinti hau lisudaranigu, lubaragiñe larugadun, aba hebelurun tidoun hakianpun-agei háganiñu, aba hagumeserun áfaraguaña darí lumoun amidi. Ha móunwegunbaña aba hadisedagun hawariuagua, darí lun merede hamá bián hádangiñe lidan aban.

12 Lárigiñe aba hariñagun fiu lílana fulasu lun Samueli:

—Kátaña ha buga lóuguabaña afiñe luagu gayaraabei lan warúeite lan Saulu? Derege humaña woun áfaragua wamaamugaña.

13 Aba lariñagun Saulu:

—Móunwenbei ni aban lidan weyu le uguñe, lugundun sefu laali Wabureme Ísüraeli uguñe.

14 Ábati lariñagun Samueli houn súngubei:

—Keimoun Gilügáli, gumese láamuga arúeihani ñein.

15 Ábati houdin Gilügálin, aba híchuguni Saulu urúeime ñein ligibugiñe Wabureme. Lárigiñe aba hadügün adagaragüdüni le lánina arandaruni, aba labuinchun Saulu hama sun Ísüraelina lau ugundani.