1 Hadan lani Benhamín türibu, ñeinñein aban wügüri gíriti Kisü, liráü Awieli, libari Seroru; Bekorátü le liráü Afia, ligía meha liyunabei, 2 ñeinñein aban liráü Kisü magadiñeti gíriti Saulu. Úati ni aban Ísüraelina magadiñeti kei ligía, úati ni aban gágubuti luéi.

3 Luagu aban weyu, aba heferidirun lilügüniña Kisü burigü.

Ábati lariñagun lun Saulu le liráü:

—Aransebá, beiba áluahaña mile ha. Barüba aban nubúein búmagua.

4 Aba lidin Saulu, aba lánhiñuraguni luwübüri Éfürain, sügǘ ligía luéigiñe lumúan Salisá; gama lumoun madari lumutiña burigü. Sügüti giñe luéigiñe lumúan Salimü luma luéigiñe lumúan Benhamín, madari lumutiña. 5 Dan le hachülürünbei lumúanrugu Sufu, aba lariñagun Saulu lun musu le lúmabei:

—Giribu wamá, lugundun fagua wéiritimahali lidiheri núguchi wawagu sügǘ lau hawagu burigü.

6 Lariñaga musu lun:

—Anihein aban profeta lidan uburugu le, inebeti houn sun gürigia, lugundun sun le lariñagun, susereti. Keimoun lumoun, fagua larufuduni üma le lunbei wafalaruni woun.

7 Lariñaga Saulu lun:

—Keimoun. Gama lumoun, kábati wanüga lun wügüri ligía? Úaaru ni fein tidan wasagüte. Úati ni kata wama lun wedewehani lun profeta ligía.

8 Lariñaga musu lun:

—Anihein aban seinsu le pülata numa. Wíchugubei lun, lun larufuduni üma woun.

9 (Yübü bugaha, dan meha labusenrun aban Ísüraelina lálügüdüni Bungiu luagu somu katei, aba lariñagun «Keimoun warihei aríaahati»; le unbei wagúara profeta guentó, «aríaahati» liña meha lagúarun lun.)

10 Lariñaga Saulu lun:

—Binarün, keimoun lumoun.

Aba houdin lidoun uburugu le ñein lubéi laganawa profeta ligía. 11 Dan le awarireina hamani wübü, lun uburugun, aba hadunragun hama fiu würiña irahüñü hóudiña adabura duna, aba hálügüdüniña:

—Halíaba san gayara lan wadariruni garíaahati le yaabei?

12 Hariñaga houn:

—Anihein hubaruaguóunmeme. Furese humá lugundun anihein ya uburugu ladüga uguñeba ladügǘwa adagaragüdüni tidan sanduariu. 13 Danme hachülürün ñeinhin, háluaheime lubaragiñe lidin tidoun sanduariu luba éigini. Méiginbaña gürigia darí lachülürün ladüga gasu labiniruni adagaragüdüni, lárigiñeme ligíame heigin amisurahóutiña. Heiba lubeiti guenlé, lugundun guenleba hadarirei.

14 Aba hasigirun amudeira uburugun. Dan le achülüreina habéi ligía áfurideina lan Samueli lun lidin tidoun sanduariu.

15 Weyu le lubaragiñe lachülürün Saulu, ariñagaali buga Wabureme lun Samueli:

16 —Haruga kei oura le, nóunahaba aban wügüri lóubawagugiñeti Benhamín bun, le lunbei banúadiruni keisi gumadimati houn numutuniña Ísüraelina. Ligíaba esefuraña lábugiñegiñe habafu Filistéana, lugundun gudemehabu haadina houn numutuniña dan le lachülürün hekeharun numoun.

17 Dan larihinbalin Samueli Saulu, aba lariñagun Wabureme lun:

—Anihán wügüri le uágubei nadimureha bun. Ligíaba arúeihaña numutuniña.

18 Dan le luáguhaña lubenari fulasu, aba liabin Saulu luagun Samueli, lariñaga lun:

—Fuleseihabubá nun, arufudabóun luban profeta nun.

19 Lariñaga Samueli lun:

—Au profeta ligía. Beiba nubá tidoun sanduariu hou báamuga numa ñein uguñe. Haruga binaafin ábame nóunabuni sun le uágubei bálügüdaha, lárigiñeme ábame bidin. 20 Madiheribá hawagu burigü ha eferidirubaña buéi ǘrüwa weyu guentó, ladüga dariwa. Ani sun katei le hínsiñegutimabei uburugu Ísüraeli, bánibei hau sun biduheñu.

21 Lariñaga Saulu lun:

—Gama lumoun lídangiñetina lani Benhamín türibu, le ñǘraütimabei hádangiñe lani Ísüraeli türibu! Bóugudin luéi lira, niduheñu ǘnabutimabaña hádangiñe sun lani Benhamín türibu. Ka uagu bariñagei sun le nun?

22 Ábati lanügüni Samueli Saulu luma lubúein múnadoun, aba líchuguniña lidan lubuidun-agei ubaraü hadan darandi gürigia ha ñéinbaña. 23 Aba lariñagun Samueli lun gusineru:

—Barübei úi le nederegerubei bun le uágubei nariñaga bun lun badireiruni.

24 Aba lasagarun gusineru aban dayarüti iyadaü, aba leseriwiduni lun Saulu. Aba lariñagun Samueli lun:

—Anihán le aranserúbei bubá. Beiga, lugundun nareidun bubá guentó lidan namisurahaniña lílana fulasu.

Aba leigin Saulu luma Samueli luagu weyu ligía. 25 Danti le haragachun tídangiñe sanduariu lun uburugun, aba haranserun aban gabana lubá Saulu iñu tibiti muna; 26 aba larounrun Saulu. Larugan aba lagúahan Samueli lun Saulu, lariñaga lun:

—Saraba, beiba luagu buéiyasun.

Aba lásaarun Saulu. Lárigiñe aba háfuridun luagun üma ligía luma Samueli, 27 danti le ararireina hamá bóugudin libiti uburugu, aba lariñagun Samueli lun Saulu:

—Ariñagabá lun bumusun lun lidin bubá, buguya agurababá murusun, ladüga nasubudiragüdaali le lariñagubei Wabureme nun bun.