1 Luagu lǘrüwan weyu, aba lachülürün Dawidi hau luwügüriñan uburugun Sikülágü, aba harihin luagu beluhaña lan buga Amaléküna uburugun Négebü, aba hábürühan hagía luagun Sikülágü, aba hagünrinchaguni, gudá haméi. 2 Barǘ hamutiña giñe würiña, irahüñü hama wéiyaaña mutu ha meha ñéinbaña, lau sun máfarun hamá ni aban.

3 Dan lachülürünbei Dawidi hama luwügüriñan uburugun, ariha hagía luagu gudawa lan, ani barüwagua lan hámarigu hama harahüñü, 4 aba hagúarahan ayahua darí herederun méreuga. 5 Barǘ hamutiña giñe biángubei lúmarigu Dawidi: Ainoamü to Hesüreelina tuma Awigaili to meha lúmari finóu Nawali. 6 Wéirititi lidiheri, ladüga busentiña yebe súdaragu hachamuragun dübü luagun, ladüga magundantiña lau katei le asuseredubei houn hasaanigu. Gama lumoun aba líchuguni Dawidi lemenigin luagu Wabureme, 7 aba lariñagun lun fádiri Abiatárü le liráü Aimelekü:

—Adügabá fulesei nun, barübei tidáü dúnigu nun.

Aba lanügüni Abiatárü tidáü dúnigu lun Dawidi, 8 aba lálügüdüni Dawidi Wabureme, lariñaga lun:

—Neiba san éibaahaña híwerutiña hara? Nárügüdübaña san?

Lariñaga Wabureme lun:

—Beiba, bárügüdübaña ábame banügüniña gürigia ha hanügübaña hawéi.

9 Furese furese, aba lidin Dawidi hau sisi-san wügüriña ha lúmabaña, aba hachülürün luagun liraüraü duna le lani Besoru. Aba herederun 10 bián-san wügüriña ha buchaalibei hawagu ñein, aba lasigiruni Dawidi éibaahani hau ha híbiri gádürü-san. 11 Aba hadarirun aban Ehiptuna aba hanügüni lun Dawidi, gama lumoun gasu híchugun éigini lun furumiñe luma uniñein: 12 Aba híchugun durudia tautu igu luma tautu beibei lun. Lárigiñe leigin Ehiptuna ligía aba lárügüdagun lungua, lugundun ǘrüwaali buga weyu luma ǘrüwa áriebu lau méiginga, mátunga ni kata. 13 Ábati lariñagun Dawidi lun:

—Ka baburemebei? Halíagiñe biabin?

Lariñaga lun:

—Ehiptuna au, lubúein aban Amaléküna, gama lumoun ǘrüwa weyu uguñe, luéigiñe lígirunina nabureme ladüga nasandirun, 14 ñǘdüntiwa asagarahei Suru libiti hamúan Keretüna, luma hamúan lánigu Hudá luma Kalebü. Gudá wamuti giñe uburugu Sikülágü.

15 Lariñaga Dawidi lun:

—Banügübadina le ñeinhin habéi híwerutina ha?

Lariñaga lun:

—Ánhabu áfiñura nun lidan liri Bungiu luagu máfarun bubadina lan hilagubei, mederegerunbáname lun nabureme, nanügübadibu le ñeinhin habéi.

16 Aba lanügüni le ñeinhin habéi híwerutiña hagía, aba hadariruniña chagagu lidan sun áraabu, héigiña, hátuña, hefeduhaña luagu sun le buga híweruhabei hamúanrugu Filistéana luma lumúanrugu Hudá. 17 Ábati lábürühan Dawidi hawagun lúmagiñe binaafin darí rábounweyu, aba lagünrinchaguniña le gumuti, bóugudin hawéi gádürü-san wügüriña nibureintiña ha awarirubaña hawagun halügüniña kameyu, aba héibaagun.

18 Sefu lumuti Dawidi sun le buga hanügübei Amaléküna sefu lumutiña giñe biángubei lúmarigu. 19 Meredeti ni aban katei ñǘraüti lídangiñe sun le buga hagidarubei Amaléküna hawéi, memegeirunti giñe ni aban irahü ni gürigia wéiriaali, sefu lumutiña Dawidi súngubei. 20 Barǘ lumutiña giñe Dawidi sun bágasu hama mudún, ábati hariñagun ha abugahabaliña ibiñanigu luagu ibiñanigu lan hagía lufanranbaña Dawidi.

21 Dan lachülürünbei Dawidi le ñein habéi bián-san wügüriña ha buga mídinbaña luma ladüga lueirin lubucha hawagu, aba lubéi herederun luagu liraüraü duna le lani Besoru, aba háfuridun lubaroun luma habaroun ha ñǘdünbaña luma. Aba liabin Dawidi hawagun aba labusurun houn. 22 Gama lumoun ñéinñanu hádangiñe ha ñǘdünbaña luma Dawidi, gürigia wuribatiña ariñagutiña luagu moun lan lun lichugún ni kata houn ha mídinbaña hama lídangiñe le hibihubei, haweidigia hámarigu hama hasaanigu aba lanme houdin lárigiñe hichugúniwa houn. 23 Gama lumoun aba lariñagun Dawidi:

—Madüga huméi le, numadagu, lárigiñe sun le ru laalibei Wabureme woun, areidalei wabagari ani ragügüdalaña híwerutiña ha woun. 24 Lidan katei le, siñati lariñawagún luagu richá humá, ladüga lidan afanreinhani, aba labu hafanran ha erederubaña óunigirei ílagu hama ha ñǘdünbaña wuriburugu.

25 (Lúmagiñeti dan ligía, lumoun dan le, ítara liña hagaburi sun gürigia Ísüraeli.)

26 Dan lachülürünbei Dawidi Sikülágü, aba lóunahan lídangiñe katei le burí lagidarubei hawéi láganiñu houn lumadagu ha ábutigu Hudá, aba lóunahan ariñaga houn:

—Anihán nóunahan hun lídangiñe le nagidarubei hawéi láganiñu Wabureme.

27 Aba lóunahan idewesei houn ha Betelibaña, Ramotu le lani Négebü, Hatirü, 28 Aroerü, Sifümótu, Ésütemoa 29 luma Rakali, óunahati giñe houn ha lídanbaña uburugu burí le lani Heraméeli, lidan burí haburugute ladügawagun Kaín, 30 luma Orumá, Korasán, Atakü, 31 Ebürón, luma lidan sun fulasu le ñein lubéi ñǘdünhali lan hau luwügüriñanigu.