1 Luagu aban weyu, aba lariñagun Yónatan le liráü Saulu lun le íderagubalin:

—Hiñugua waméi duna, ábürüha wamaamuga hawagun Filistéana ha loubafurugubaña.

Gama lumoun mariñagunti Yónatan ni kata lun lúguchi libügürü katei le, 2 anuhein buga likianpun-agei lúguchi lóubagiñe aban wübü lábugiñe aban güranádu, le ñein lubéi léferehoua türigu, hau sisi-san súdaragu. 3 Aíasi le liráü Aitubu, libase Ikawódu, le liráü Fineesi libari Elí le lufadirin Wabureme uburugu Siló anügübarun tidáü dúnigu.

Ibidiñeti bugati houn luagu ñǘdünha lan Yónatan. 4 Sunti dan le, anihán buga áfaagua lun lachülürün le ñein habéi súdaragu Filistéana. Labadinaguañein bián dübü wéinamuti gíriti Bosesi luma Sene üma, 5 aban luéigiñe nórute, ligibugiñe Mikümási, le aban luéigiñe suru ligibugiñe Gibeá. 6 Aba lariñagun Yónatan lun le íderagubalin:

—Keimoun loubafurugu darí le ñein habéi gibe tubungiutegu ha. Háfuga líderaguniwa Wabureme, kei ua lubéi ni kata hénrenguti lun, gayaraati lagañeiragüdüniwa hau saragu gürigia ítara kei hau biánrügü.

7 Lariñaga le íderagubalin lun:

—Adügabéi sun le baritagun, aransetina lun buma nan lidan sun le baritagun badügün.

8 Ábati lariñagun Yónatan lun:

—Wánhiñuragua loubafurugun le ñein habéi Filistéana, ábame wígirun lun harihiniwa. 9 Ánhaña ariñaga woun lun wagurabun haragachun le ñeinhin wabéi, ábame wagurabun, mamudeirunbadiwa le ñeinhin habéi. 10 Gama lumoun ánhaña ariñaga woun lun wamudeirun, ábame wamudeirun, ladüga larufuduñeinme lira woun luagu líchugubei lan Wabureme agañeiruni woun.

11 Aba lubeiti hígirun lun harihiniña súdaragu Filistéana.

Dan harihinbaliña aba hariñagun:

—Ariha humá, añahán Ebüréana áfuriha lagadábugiñegiñe dübü le ñeinhin lubéi haramudagua.

12 Ábati hagúaragun lun Yónatan luma le íderagubalin:

—Warí humá ñahoun le ñein wabéi, anihein katei lun wabahüdaguni hun!

Ábati lariñagun Yónatan lun le íderagubalin:

—Falabana, ladüga lederegeraaña Wabureme háhaburugun Ísüraelina.

13 Aba lamudeirun Yónatan awariheina, le íderagubalin lárigi lárigi. Ha labalabadun Yónatan múarugun, ábaha lagumuchun le íderagubalin hau. 14 Lidan furumiñeti wuribu ligía, áfarati Yónatan luma le íderagubalin kei burí wein wügüriña lidan murusun oura. 15 Sun ha tídanbaña kianpu-agei hama ha bóugudibaña tuéi, aba habuinchun lau anufudei. Aba giñe hanufudedun súdaragu Filistéana hama sun wuriburuguna. Lídanmeme oura ligía, aba ladagarun aban hárabaganali, aba ñein lan aban lanarime anufudei.

16 Aba harihin lani Saulu óunigirutiña ha uburugubaña Gibeá le lani Benhamín héibaagun Filistéana yagüroun yaroun. 17 Ábati lariñagun Saulu houn súdara ha lúmabaña:

—Ariha humá ka lan hádangiñe wánigu mégeibei.

Dan harihinbei, mégeiti Yónatan luma le íderagubalin. 18 Keiti hádanñoun lubéi Ísüraelina lani Wabungiute tidáü dúnigu luagu weyu ligía, aba lariñagun Saulu lun Aíasi:

—Barüboun lani Wabungiute tidáü dúnigu nun.

19 Gama lumoun sun anihán lan Saulu adimureha luma fádiri, aweirideinatima chagaguaü tidan hakianpun-agei Filistéana. Ábati lariñagun Saulu lun fádiri:

—Manügabóun.

20 Aba lóundaragun Saulu hama sun lánigu aba houdin wuriburugun. Hanarimeti chagaguaü le hádanbei Filistéana darí lun háfaragun houngua. 21 Ebüréana ha lǘhañabaña hama Filistéana, ani furiñahaña hama ageindagua, aba hásügürün hamoun Ísüraelina ha lúmabaña Saulu luma Yónatan. 22 Danti le hasubudirunbalin Ísüraelina ha buga aramudagubaña luagu burí luwübüri Éfürain luagu hanurahaña lan Filistéana, aba héibaahaniña. 23 Aba lanügün wuribu fulasu chülǘ Betü-awén. Ábati lesefuruni Wabureme Ísüraeli lidan oura ligía.

24 Gama lumoun buchaali hawagu Ísüraelina weyu ligía, ladüga úati ni aban hádangiñe éigiti ni kata ladüga ru laaña buga Saulu lílana lábugiñe fiñún, lariñaga: Íñarawaguati le éigiti somu katei lubaragiñe larabachun weyu, lubaragiñe lásurun náfaraguniña náganiñu. 25 Aba hachülürün súdaragu lidoun aban dabíara le ñein lubéi sírudu múarugu. 26 Dan hebelurunbei gürigia dabíararugun, anihán sírudu ñein éibaagua kei duna; gama lumoun móuchungubei hamuti ladüga hanufude luéi fiñún. 27 Ánheinti Yónatan, kei buga maganbunlani áfiñuruni le ábugiñounbei líchigaña lúguchi súdaragu aba líchuguni wewe le lúhaburugubei; aba léderuni lidan sírudu aba léigini, aba lárügüdagun lungua. 28 Ábati lariñagun aban súdara Ísüraelina lun:

—Ru laaña búguchi súdaragu lábugiñoun áfiñuruni, lun le lan éigiti furumiñeguarügü katei uguñe, líñarawaguba lan. Ligía luéirinbei lubucha hawagu gürigia.

29 Lariñaga Yónatan:

—Adügaali núguchi aban wuribani lun Ísüraeli. Arihabá lubuidun nasandiragun nungua lárigi nouchun murusun sírudu, 30 buítimati hamuga hasandiragun gürigia ha houngua guentó lun hamuga hou hamá lídangiñe le hagidarubei hawéi áganiñu. Hanarimetimati hamuga háfarawagun Filistéana!

31 Aba háfaraguniña Ísüraelina Filistéana weyu ligía, ageindagueina lúmagiñe Mikümásigiñe darí Ayalón. Gama lumoun buchati hawagu súdaragu Ísüraelina saragu, 32 aba lubeiti hábürühan luagun le hagidarubei hawéi áganiñu, aba hanügün mudún, bágasu, aba hátigiruniña múarugu, aba heigin úi lau hitaü, 33 gama lumoun ñéinñanu ñǘdüntiña ariñaga lun Saulu:

—Hafigouhaña gürigia ligibugiñe Wabureme ladüga héigiña úi lau hitaü.

Ábati lariñagun Saulu:

—Mabuiduntün! Barǘ humá aban dübü wéiriti nun ñahoun abalabaheina.

34 Ariñaga humá giñe houn gürigia lun hanügün kada aban hádangiñe halügüniña mudún o bágasu wügüri nun ñahoun hou humaamugaña, mafigounhan humaamuga ligibugiñe Wabureme eiga úi lau hitaü.

Áriebumeme ligía aba lanügüni kada aban lilügün bágasu aba látigiruni ñein. 35 Aba ladügün Saulu aban latarü lun Wabureme, ligía furumiñebei líchugun lun. 36 Lárigiñe aba lariñagun Saulu:

—Rarí wamá éibaahaña Filistéana áriebu le, ábame wasagarahaniña darí larugadun, mígirunga ni aban hádangiñe wínwanñu.

Aba hariñagun súngubei:

—Adügabéi baritagun.

Gama lumoun aba lariñagun fádiri:

—Lubaragiñe sun katei, álügüda waméi Wabungiute.

37 Ábati lálügüdüni Saulu Wabungiute, lariñaga lun:

—Éibaahanaña san Filistéana?

Gama lumoun móunabun lumuti Wabureme Saulu weyu ligía.

38 Ábati lariñagun Saulu:

—Yarafa hamá sun hábutigu súdaragu, ariha humá ka lan adügübalin figóu le uguñe. 39 Fiñutina lidan liri Wabureme le esefurubalin Ísüraeli luagu íbini lan anhein Yónatan lubéi le niráü, gasu lounwen!

Úati ni aban óunabuti; 40 ábati lariñagun Saulu houn sun Ísüraelina:

—Rárama humá luéigiñe oubaü le, nararamame luma Yónatan le niráü luéigiñe le aban oubaü. Aba hóunabun, hariñaga:

—Adügabéi baritagun.

41 Ábati lariñagun Saulu:

—Wabureme Lubungiute Ísüraeli, ka san uagu móunabun bubalina uguñe? Anhein au lubéi gadurunbei o Yónatan lan le niráü, danme lachüürün ubunuruni láfuriduba Urimü; gama lumoun anhein Ísüraeli lubéi gadurunbei, danme lachüürün ubunuruni, láfuriduba Tumimü.

42 Ábati lariñagun Saulu:

—Chü humá ubunuruni wadan au luma niráü Yónatan.

Aba lábürühan luagun Yónatan, aba lerederun Saulu hama Ísüraelina madurunga. 43 Ábati lariñagun Saulu lun Yónatan:

—Gufesebéi le badügübei.

Aba lagufeserun Yónatan, lariñaga:

—Inarüni hóuchatiña murusun sírudu lau lígirugu wewe le buga núhaburugubei. Gama lumoun anahán, aransetina lun nounwen.

44 Aba lariñagun Saulu:

—Béilana Wabungiute hanarime ánhabu mounwen, Yónatan!

45 Gama lumoun aba hariñagun Ísüraelina:

—Ida lubagia lounwen Yónatan lárigiñe rúhali lan aban óunwenbu agañeiruni lun Ísüraeli! Móunwenbei! Mábürühanbei ni aban lugule lídiburi múarugun! Lugundun katei le ladügübei uguñe, Wabungiute íderagubalin lun ladügüni.

Ítara liña hesefuruni Ísüraelina Yónatan luéi lounwen. 46 Aba giñe lígiruni Saulu léibaahaniña Filistéana, aba hagiribudun hamúanrugun.

47 Aba lubeiti lárügüdüni Saulu arúeihani Ísüraeli, aba lageindagun lidan sun fulasu hama láganiñu: Moabü, Amón, Edomu, lurúeite Sobá hama Filistéana. Sun le ñein lumuti lageindagua, lagañeiruni wuribu. 48 Aba lóundarun átiri súdaragu, aba lageindagun luma Amalékü, aba lagañeiruni, ítara liña lesefurun Ísüraeli hawéi híwerutiña.

49 Anihán hiri lirahüñü Saulu: Yónatan, Isüwí luma Malükisúa. Hiri bián lirahüñü ha würiña: Merabü to íbugañaü, Mikali to amuleluaü, 50 Tiri lúmari Saulu: Ainoamü, liráü Aimaasi. Liri hábuti lisudaranigu: Ábünerü, liráü Nerü le liyaurite Saulu. 51 Ladüga Kisü, le lúguchi Saulu, luma Nerü, le lúguchi Ábünerü, lirahüñü meha Awieli.

52 Dereti bugaha wuribu hama Filistéana lidan sun libagari Saulu; ligíaha lanaahanbei Saulu wügüriña héretiña ha ganigitiña lun lisudaranigume.