1 Gama lumoun lariñaga Dawidi lúnguarügü:

—Mama uguñe ni haruga, láfarubadina Saulu hilagubei. Le lubeiti lunbei nadügüni, nanurahan hageiroun Filistéana, lun gayara lan lígirunina Saulu darangilu, merederun láamuga áluahana lidan sun lumúan Ísüraeli. Ítara luba nesefurun lúhaburugugiñe.

2 Ábati lárügüdün Dawidi üma hau sisi-san wügüriña ha lúmabaña, aba houdin lun heseriwidun lun Akisü le liráü Maoku, le lurúeite Gatü. 3 Aba laganóun Dawidi hau luwügüriñanigu luma Akisü uburugu Gatü, kada aban hama liduheñu. Barǘ lumutiña Dawidi biángubei lúmarigu lúmagua: Ainoamü to Hesüreelina tuma Awigaili to meha lúmari Nawali le Karümélina. 4 Dan lasubudirunbalin Saulu luagu anura lan Dawidi uburugun Gatü, aba lerederun léibaahani.

5 Ábati lariñagun Dawidi lun Akisü:

—Anhein gagundan lubéi urúei lun fuleseihabu lan nun, ayumuraguatina lun lun líchugunina aganawa lidan aban lídangiñe luburugute lageira, lugundun mabuidunti lun naganóun au le lubúein huma lidan fulasu le ñein lubéi harúeiha.

6 Weyuméme ligía, aba líchuguni Akisü uburugu Sikülágü lun. Ligía chülǘ lubéi lumoun dan le, lánigili arúeihani le lani Hudá uburugu Sikülágü.

7 Aganawati Dawidi aban irumu gádürü hati hageira Filistéana. 8 Ábaha láfuridun hau lánigu lun houdin íweruha hawéi Gesuruna, Géserüna hama Amaléküna, ha buga aganóubaña lóubawagu fulasu ligía, lúmagiñe Telaimü luagun oubaü le gíribei suru, darí Ehiptu. 9 Ábaha lábürühan hawagun áfaragua wügüriña hama würiña. Ábaha lanügüniña mudún, bágasu, burigü, kameyu tuma daüguaü. Lárigiñe, ábaha lagiribudun le ñeinhin lubéi Akisü, 10 lariñagatiha Akisü lun:

—Ka burí fulasu basagarahabei uguñe?

Lariñagaha Dawidi lun:

—Suru libiti Hudá o suru libiti Heraméeli, o suru libiti hamúan ladügawagun Kaín.

11 Mígiruntiha Dawidi wügüri ni würi wínwanñu, luéi houdin uburugu Gatü ariñaga luagu le ladügübei. Ítara liña ladüga lidan sun dan le laganóunbei hageira Filistéana. 12 Ru lumutiti Akisü lemenigin luagu Dawidi, lariñaga lúnguarügü:

—Liyereeguduña Dawidi houn lílana Ísüraeli, ítara, leseriwiduba nun súnwandan.