1 Aba lariñagun Wabureme lun Samueli:

—Ídaba san lagumucha bírudun luagu Saulu? Mabusenrunhadina lun lasigirun arúeiha Ísüraeli. Buíngüdabei bágeidina lau garaba, busentina lun bidin lúbiñe Hesé le Belenna, lugundun anuadiráadina aban hádangiñe lirahüñü lun ligíaba lan urúei.

2 Lariñaga Samueli:

—Ida lubati nadüga lun nidin? Anhein lasubudira Saulu, láfarubadina hilagubei.

Lariñaga Wabureme lun:

—Barüba aban bágasu ñǘraügiru, bariñagame luagu béibuga lan adagaragüda nun. 3 Ábame bamisurahani Hesé lidoun badagaragüdün, ábame nariñaguni le lunbei badügüni bun. Ábame banúadiruni le uáguti nariñaga bun urúeime.

4 Aba ladügüni Samueli le uágubei lariñaga Wabureme lun, danti le lachülürünbei Belén, aba háfuridun lábutigu uburugu lubaroun láuyuma anufudei, aba hariñagun lun:

—Lánina san darangilaü buéiyasun?

5 Lariñaga houn:

—Anha, niábiña adagaragüda lun Wabureme. Harumaguagüda humá hungua ligibugiñe Bungiu, ñüdün humaamuga numa adagaragüda.

Lárigiñe aba larumadagüdüni Samueli Hesé hau sun lirahüñü, aba lamisurahaniña lidoun adagaragüdüni. 6 Dan le hachülürünbei, aba larihini Samueli Eliabü, aba lariñagun lúnguarügü:

—Chóuruti luagu anihán lan wügüri le lanúadirubei Wabureme lun urúeime.

7 Gama lumoun aba lariñagun Wabureme lun:

—Metenirabá lun lumagadiñen, ni lun lúgubu, lugundun mama ligía nabusenrubei. Ladüga marihinti Bungiu luagun le larihubei wügüri, le ligibugiñebei lagu wügüri ligía larihibei, anhein Bungiu anigi larihiboun.

8 Ábati lagúarun Hesé lun Abinadábü aba lanügüni lun Samueli, gama lumoun aba lariñagun Samueli:

—Mama giñe le lanúadirubei Wabureme.

9 Aba lanügüni Hesé Samá lun; lariñaga Samueli:

—Mama giñe ligía le.

10 Arufudati Hesé sedü hádangiñe lirahüñü lun Samueli, gama lumoun aba lariñagun Samueli lun luagu manúadirun lan Wabureme ni aban hádangiñe. 11 Agumuhóuni aba lariñagun lun:

—Úaaña san amu birahüñü?

Lariñaga Hesé lun:

—Lérügaali ñǘraütimagilibei, le óunigirubaliña mudún.

Lariñaga Samueli lun Hesé:

—Óunahaba anügei, lugundun mañuurunbadiwa luagu dábula darí liabin.

12 Aba lóunahan Hesé anügei. Funati lura irahü ligía, magadiñeti.

Ábati lariñagun Wabureme lun Samueli:

—Ligía le. Saraba, anúadirabei urúeime.

13 Aba lanügüni Samueli garaba, aba lanúadiruni Dawidi kei urúei hagibugiñe líbirigu. Lúmagiñe oura ligía, aba lebelurun lani Wabureme Sífiri lidoun. Lárigiñe aba lidin Samueli uburugun Ramá.

14 Díreiha bugati lani Wabureme Sífiri luéi Saulu, aba lóunahan Wabureme aban sífiri wuribati luagun lun lasufuriragüdüni. 15 Ligíati hariñagunbei lubúeingu Saulu lun:

—Kei basubudiruni, wayubudiri, anihán sífiri wuribati lóunahan Wabungiute asufuriragüdabu. 16 Rubei lubeiti bererun lun wáluahan aban gáfaraditi árüpa, lun danme lan ladagarun sífiri wuribati ligía buagu, ábame láfarunu gürigia ligía árüpa lun basandiragun bungua buidu.

17 Aba lariñagun Saulu houn:

—Áluga humá aban le gáfaraditi tun buidu, barǘ huméi nun ñahoun.

18 Ábati lariñagun aban hádangiñe:

—Anihein aban hádangiñe lirahüñü Hesé le Belenna, gáfaraditi buidu; ani aban giñe wuriburuguna ganigiti ligía, héreti ani adimurehati lau lichú aau; magadiñeti ani íderagua lumuti Wabureme.

19 Ábati lóunahan Saulu ariñaga lun Hesé:

—Óunahabei Dawidi le biráü nun, le amainirubaliña mudún.

20 Aba lóunahani Hesé Dawidi lun Saulu. Aba lóunahan aban mile barüina fein, diwéin, luma aban liraüraü gábara lun Saulu luma. 21 Ítara liña lachülürün Dawidi ligibugiñe Saulu, aba lerederun eseriwida lun, aba línsiñedun saragu lun Saulu, aba líchuguni lun ligía lan íderaguei. 22 Aba lóunahan Saulu ariñaga lun Hesé lun lígiruni Dawidi luma, ladüga weiri lan línsiñe lun. 23 Dántiha le lárügüdüni sífiri wuribati le lóunahabei Wabungiute Saulu, ábaha láfarunu Dawidi árüpa. Ábaha lárügüdagun Saulu lungua, aba lasandiragun lungua buidu, ábaha lígiruni sífiri wuribati ligía.