1 Ábati lanügün Samueli garaba aba léseruni lábulugun Saulu, lariñaga lun:

—Anúadira lumutibu Wabureme uguñe kei urúei houn Ísüraelina ha lánigu. Bagumadirubaña, sefubáñame hawéi háganiñu ha geyegubaña hau. Anihán katei le lunbei larufuduni luagu Wabureme lan íchugubalibu lun bagumadiruniña lánigu: 2 Guentó danme le bafanreinragun nuéi, badariruba bián wügüriña lubadu tumuaha Rakeli lidan fulasu le gíribei Selisá, lumúanrugu Benhamín. Hariñaguba bun luagu dariwa lan burigü ha báluahabaña, luagu madiherihali lan búguchi hawagu, huáguhali lan ladiherida, álügüdagua lan lungua ida luba lan ladarirunibu. 3 Bubaruaguóunmeme, danme bachülürün turugabun tídibu wewe wéiritu to Taworuboun, hayabiba ǘrüwa wügüriña bubaroun, héibuga Beteli áhuduragua lun Wabungiute. Ñéinbaña ǘrüwa gábara luma aban hádangiñe, le aban ǘrüwa fein, le háürüwan aban sagü lautu gueru tau diwéin. 4 Habusuruba bun ábame hedewehan bián fein bun. Beresibirounme. 5 Lárigiñeme ábame bachülürün lidoun fulasu le gíribei Gibeá le lani Bungiu le ñein habéi súdara Filistéana. Danme bebelurun uburugun, badunraguba hama aban sétanu profetagu haragachuña tídangiñe sanduariu, adimureheina Wabureme hádangiñe. Ñéinbaña gürigia habá habá áfareina sun tuwuyerigu árüpa, panderu tuma fidu. 6 Ábameti lárügüdünibu lani Wabureme sífiri, ábame giñe ladimurehan Wabungiute bídangiñe kei hagía, ábame basaliragun ámume wügüri. 7 Danme lasuseredun sun katei le bun, badügeime le uáguti baritagua luagu buidu lan, líderagubadibu Wabungiute. 8 Bídinme nubá Gilügálin, le ñeinba lubéi wadunragua lun wadagaragüdün le gudawarügüti luma le lánina arandaruni. Rédeiba sedü weyu ñein agurabaha, darí nachülürün, ariñaga náamugei bun ka lan lunbei badügüni.

9 Kei lafanreinragun Saulu luma Samueli, aba lasansiragunu Wabungiute lanigi; aba lagunfulirun sun le lariñagubei Samueli luagu weyu ligía. 10 Lárigiñe dan le hachülürünbei Saulu luma lubúein uburugu Gibeá, aba háfuridun profetagu ha adimureheinabei Wabungiute hádangiñe habaroun. Ábati lárügüdüni lani Wabungiute Sífiri Saulu, aba giñe ladimurehan Wabureme lídangiñe kei hagía. 11 Gama lumoun sun ha subudihabúbaña lun lúmagiñe binarü, dan harihinbei ladimurehaña lan Wabungiute lídangiñe kei ha híbiri profetagu, aba hariñagun hámagua:

—Ka suserebei lun liráü Kisü? Profeta hali giñe san Saulu?

12 Ábayati lariñagun aban hádangiñe:

—Añaha ha, "Profetagu funa san hagübürigu?"

Ligíati lariñawagúnbei: "Profetahali san giñe Saulu?"

13 Dan lásurun ladimurehan Wabungiute lídangiñe Saulu, aba lachülürün hábiñoun. 14 Aba lariñagun liyaurite houn ligía luma lubúein:

—Halía san hidin?

Lariñaga Saulu lun:

—Áluahaña burigü. Gama lumoun kei madari wamaniña, aba woudin arihei Samueli.

15 Lariñaga liyaurite lun:

—Kagia lariñagubei Samueli hun? Abahüdaguabéi nun.

16 Lariñaga Saulu lun:

—Aba lariñaguni woun furangu luagu dariwa lan burigü. Gama lumoun mariñagunti Saulu ni kata lun libügürü arúeihani le uágubei ladimureha Samueli lun. 17 Lárigiñe aba lagúarun Samueli houn Ísüraelina lun houdin Misüpá áhuduragua lun Wabureme; 18 Ñein lariñaga houn:

—Lariñahare Wabureme le Lubungiute Ísüraeli: "Au asagarubalün huguya Ísüraelina Ehiptugiñe, luma lábugiñegiñe habafu Ehiptuna hama sun hame ha íchugubaña lidere dan hun". 19 Gama lumoun guentó, meberesentün lau hubungiute, le esefurubalün lídangiñe sun lénrengunga, fui humaali lau hamuriahan lun níchugun aban urúei hun lun lagumadirunün. Arufudagua humá lubeiti hungua ligibugiñe Wabureme guentó kada türibu, luma kada külán.

20 Aba lariñagun Samueli lun hayarafadun sun lani Ísüraeli türibu, ábati lábürüha ubunuruni hawagun lani Benhamín türibu. 21 Lárigiñe aba lariñagun lun hayarafadun lani Benhamín türibu, aba hanúadirun lani Matürí külán, hádangiñe aba lanúadirun Saulu le liráü Kisü. Aba háluahani gama lumoun madari hamuti, 22 ábayati hálügüdahan luma Wabureme, lun hasubudiruni anhein anihein lubéi Saulu ñein. Aba lariñagun Wabureme houn luagu anihein lan Saulu ñein, aramudagu lidan ílagu.

23 Ábati héibaagun asagarei le ñéingiñe lubéi laramudagua. Dan le larufudagunbei Saulu lungua hagibugiñe gürigia, úati ni aba gágubuti kei ligía.

24 Aba lariñagun Samueli houn súngubei:

—Ariha humaali le lanúadirubei Wabureme lun urúeime? Úati ni aban Ísüraelina kei ligía!

Aba hariñagun Ísüraelina:

—Gabagarilá urúei!

25 Lárigiñe aba lariñaguni Samueli lilurudun arúeihani houn lílana fulasu, lárigiñe labürühani tidan aban garudia, aba líchugunu tidoun sanduariu to lani Wabureme. Lárigiñe aba lariñagun Samueli houn súngubei lun hagiribudun hábiñoun. 26 Aba giñe lidin Saulu hábiñoun uburugu Gibeá, aba ladunruni Wabungiute haritagun fiu ganigitiña lun houdin úara luma. 27 Gama lumoun ñéinñanu ariñagutiña:

—Anihánba san le esefurawa?

Aba híchugun mebereseni lau, míchutiña uéiriguni lun; gama lumoun aba ladügün Saulu kamá ibidiñeti lun.