1 Aba hábürühan Filistéana hawagun Ísüraelina, aba héibaagun Ísüraelina hawéi, ladüga gíbetiña ha óunwegubaña luagu wübü Gilübóa. 2 Aba héibaahani Filistéana Saulu hama lirahüñü, aba háfaruni Yónatan, Abinadábü luma Malükisúa. 3 Lárigiñe aba hetenirun lúnrügü Saulu; keiti tímiruni hagimaran achüühatiña gimara, aba lebelurun óunwenbu anufudei lun hawéi. 4 Ábati lariñagun lun le lubúein:

—Sagaboun befeinte, áfarabana tau, lun mama lan gibe tubungiute ha áfarana ábame héherahan nau.

Gama lumoun máhati lubúein láfaruni, ladüga wéiriti lanufude. Ábati lanügünu Saulu lefeinte, aba lígiraguagüdün lungua tuagun. 5 Danti larihinbei lubúein luagu hilá lan Saulu, aba giñe lígiraguagüdün lungua tuagun lefeinte, aba lounwen luma. 6 Ítara liña lounwen Saulu weyu ligía, ǘrüwa lirahüñü, lubúein hama sun luwügüriñanigu. 7 Danti harihinbei Ísüraelina ha aganóubaña loubafurugu fulasu wayati luma luéigiñe oubaü le ñéingiñe lubéi laboucha weyu libiti Hordán luagu anuraha lan lisudaranigu Ísüraeli, ani hilá lan Saulu hau sun lirahüñü, aba hígiruni fulasu, aba giñe hanurahan. Ábati hayabin Filistéana aba herederun aganawa ñein.

8 Larugan dan le houdin Filistéana asagarahaña hilaguaaña, aba hadariruni Saulu hama ǘrüwagubei lirahüñü riwagu luagu wübü Gilübóa. 9 Ábati hadürürüni lichügü, aba hagidarunu lefeinte luéi, aba hóunahan asubudiragüdei lidan sun hamúan Filistéana, lun hasubudiruni sun lílana fulasu tidan hatenpulun habungiutegu. 10 Aba híchugunu lefeinte Saulu tidoun litenpulun Asütárüte, aba hadibiragüdüni lúgubu luagu lubarieirun Betü-san.

11 Dan hasubudirunbalin lílana Habesi le lani Galaadü katei le hadügübei Filistéana lau Saulu, 12 aba hebelurun wügüriña ganigitiña lidoun úarani, lárigiñe héibuguni sun áriebu, aba hagidaruni lúgubu Saulu luma hágubu lirahüñü luéigiñe lubarieirun Betü-san, aba hanügüniña uburugun Habesi, aba háguduniña ñein. 13 Lárigiñe aba hábununiña ñein Habesi lábugiñe aban tídibu wewe. Lárigiñe lira, aba hayunarun sedü weyu.