1 Anihánmemeti buga Samueli eseriwida lun Wabureme lábugiñe lererehan Elí. Lidoun meha dan ligía hénrenguti meha lasubudiragüdün Wabureme aban uganu lun aban gürigia. Díseguati meha larufudun Wabureme aban arihini houn gürigia. 2 Gama lumoun luagu aban weyu, dan le marihinhali Elí buidu, ñeinñein lirumunrugu arumuga. 3 Roun liñati Samueli litenpulunrugu Wabureme le ñein tubei lubagüsin Wabungiute. Durungugiliti tilanpun sanduariu. 4 Ábati lagúarun Wabureme lun Samueli:

—Samueli wei!

Lariñaga Samueli:

—Anahán ya!

5 Aban léibaagun le ñeinhin lubéi Elí, lariñaga lun:

—Anahán, Kagia babusenrubei?

Lariñaga Elí lun:

—Magúahantina bun. Béibaaya arounra. Ábati lidin Samueli, aba larounrun lárigoun.

6 Gama lumoun ábaya lagúarun Wabureme:

—Samueli wei!

Aba lásaarun Samueli, aba lidin lubadun Elí, aba lariñagun lun:

—Anahán, kagia babusenrubei?

Lariñaga Elí lun:

—Maguahantina bun niráü, béibaaya arounra.

7 Ibidiñegiliti buga Wabureme lun Samueli, lugundun marufudungili buga ni kata lun. 8 Gama lumoun aba lagúarun Wabureme lun Samueli luagu lǘrüwan wéiyaasu, aba lásaarun, aba lidin ariñaga lun Elí:

—Anahán, Kagia babusenrubei?

Ábati lasubudiruni Elí luagu Wabureme lan agúahabei lun Samueli, 9 ábati lariñagun lun:

—Béibaya arounra; ánheinya agúara Wabureme bun, bariñagame lun: "Badimureha, laganbuñadibu bubuein".

Ábati lidin Samueli, aba larounrun lárigoun. 10 Lárigiñe aba liabin Wabureme, aba lararamagun, ábaya lagúarun lun kei furumiñe:

—Samueli wei! Samueli wei!

Lariñaga Samueli:

—Badimureha, laganbuñadibu bubuein.

11 Lariñagati Wabureme lun:

—Nadüga aban katei uburugu Ísüraeli, le lunbei lagaridagüdüni harigeirugu ha aganbuti. 12 Wéyume ligía, nagunfulirubei sun le buga nariñagubei lun Elí habügürü liduheñu. 13 Ariñagaadina lun luagu nabeichubaña lan lánigu lun súnwandan luéigiñe wuribani le subudi láalibei; lugundun íñaragua hamaadina lirahüñü ani mébechun lumutiña luéigiñe. 14 Fiñuhadina lubeiti luagu magidarunbei lan hasalufurin lirahüñü Elí lun súnwandan, ni lau adagaragüdüni ni lau edewehani.

15 Lárigiñe katei le, aba larounrun Samueli, darí larugan binaafin, ábati ladaaraguni sun tubenari litenpulun Wabureme. Hanufudeti yebeti Samueli lun labahüdaguni uénedü le larufudubei Bungiu lun lun Elí, 16 gama lumoun aba lagúarun Elí lun, lariñaga lun:

—Samueli, niráü!

Lariñaga Samueli lun:

—Anahán.

17 Lariñaga Elí lun:

—Ka lariñagubei Wabungiute bun? Amuriahatina buma lun maramudun ban ni kata nuéi lídangiñe le lariñagubei bun. Béilabu Wabungiute here ánhabu aramuda lídangiñe le lariñagubei bun nuéi!

18 Aba labahüdaguni Samueli sun katei lun Elí maramudunga ni kata, ábati lariñagun Elí:

—Ligía Waburemebei! Adügüwalá le labusenrubei!

19 Aba laweiridun Samueli, aba líderaguni Wabureme ani gúnfulilei sun le füramase lubéi lun. 20 Aba hasubudiruni sun lánigu Ísüraeli lúmagiñe Dan darí Bérüsewa luagu aban lan lani Wabureme profeta le inarüniti Samueli. 21 Ábaya larufudagun Wabureme lungua Siló, lugundun ñeinha lasubudiragüdei luganute lun Samueli lárigiñeti ábaha lasubudiragüdüni Samueli houn sun Ísüraelina;