1 Aba líchugun Saulu dimurei lun Yónatan le liráü luma houn sun lani úfisigu lun háfaruni Dawidi hilagubei. Gama lumoun kei weiri lubéi línsiñe Dawidi lun Yónatan, 2 aba líchuguni ñunsu lun. Lariñaga lun:

—Láfaaguña Saulu le núguchi lun láfarunibu hilagubei. Góunigiba lubeiti haruga binaafin, baramudaguame lidan aban aramudaguagülei le ibidiñewati. 3 Nídiba luma núguchi lidoun áraabu le ñéinbadibu lubéi. Nadimurehaba lun buagu, leme lóunabagüle nun, ábame nasubudiragüdüni bun.

4 Ábati ladimurehan Yónatan lun Saulu luagu lufulesein Dawidi. Lariñaga lun:

—Madügünti hamugatia urúei ni murusun wuribani lun Dawidi le lubúein, lugundun madügüngili Dawidi wuribani lun urúei, lubaragiñe lira adügarügüti saragu buiti; 5 lugundun áhurera lumuti libagari lau láfaruni Goliadi, ani lau lira sefu lumuti Wabureme sun Ísüraeli sunsuinagubei. Ariha lumuti urúei katei le, aba lagundaarun luagu. Kábati uagu labusenra urúei láfaruni Dawidi madurunga?

6 Dan laganbunbalin Saulu liricha Yónatan, aba lariñagun:

—Fiñutina lidan liri Wabureme luagu máfarun nubéi lan Dawidi.

7 Ábati lagúarun Yónatan lun Dawidi aba lasubudiragüdüni luáguti katei le layanuhabei luma Saulu lun. Lárigiñe aba lanügüni ligibugiñe Saulu, aba lasigirun Dawidi eseriwida lun Saulu kei buga furumiñe.

8 Ábaya ñein lan wuribu, ábaya láfuridun Dawidi ageindagua hama Filistéana, aba lagañeiruni wuribu darí lun hanurahan Filistéana. 9 Ábaya lárügüdüni sífiri wuribati Saulu; ñun liñati lirumunrugu lau larufunte lúhaburugu, sunti aniha lan Dawidi áfara árüpa, 10 Aba yebe lálugun láhuduruni lau larufunte tóubawagu muna, gama lumoun aba lafanreinruni Dawidi, aba láchourun larufunte Saulu tóubawagu muna. Áriebumeme ligía, aba lanurahan Dawidi ñéingiñe. 11 Furese furese aba líchugun Saulu dimurei houn luwügüriñanigu lun houdin lúbiñe Dawidi lun haríaahani, lun háfaruni hilagubei larugan binaafin.

Gama lumoun aba tíchuguni Mikali ñunsu lun Dawidi, tariñaga lun:

—Ánhabu mesefuragun bungua áriebu le, harugame hilaadibu.

12 Aba tarariragüdüni Mikali Dawidi lídangiñe aban funedera, aba lesefurun. 13 Ábati tanügün Mikali aban guáriua, aba tíchuguni tidoun gabana aba tadouragun lau tau aban sidi. 14 Danti le lóunahanbaliña Saulu luwügüriñanigu lun hárügüdüni Dawidi, aba tariñagun Mikali houn luagu sándiñein lan. 15 Gama lumoun ábaya lóunahaniña Saulu luwügüriñanigu áluahei Dawidi, lariñaga houn:

—Íbini gabanaruguñein lan, sagá huméi ñéingiñe hanügeime nun ñahoun áfara náamugei hilagubei!

16 Aba hebelurun luwügüriñanigu Saulu lúbiñoun Dawidi, gama lumoun guáriuarügüñein hadarira gabanarugu. 17 Ábati lariñagun Saulu tun Mikali:

—Ka uagu beyeedaguana ítara, anuraagüdei nágani?

Tariñaga Mikali lun:

—Ladüga láfiñurun luagu láfarubadina lan hilagubei anhein mígirun nan lun lanurahan.

18 Ítara liña lesefurun Dawidi, aba lidin arihei Samueli uburugu Ramá, aba labahüdaguni sun le ladügübei Saulu lun, lun. Lárigiñe aba lidin Dawidi luma Samueli aganawa Naiotu. 19 Dan le lasubudirunbalin Saulu luagu anihein lan Dawidi Naiotu le lani Ramá, 20 aba lóunahaniña luwügüriñanigu lun hárügüdüni. Dan hachülürünbei luwügüriñanigu Saulu, aba harihin aban sétanu profeta, ladimurehaña Wabungiute hayumulugugiñe, Samueli adundehaña. Sódini, aba giñe lebelurun lani Wabungiute Sífiri hadoun luwügüriñanigu Saulu, aba giñe ladimurehan Wabungiute hayumulugugiñe.

21 Dan lasubudirunbalin Saulu katei le, ábaya lóunahan amu wügüriña, gama lumoun aba giñe ladimurehan Wabungiute hayumulugugiñe. Ábaya lóunahan Saulu amu wügüriña luagu lǘrüwan wéiyaasu, ligiaméme asusereda houn. 22 Ábati lidin Saulu lungua Ramá, dan le lachülürünbei luagu fusu wéiriti le ñeinbei Sekú, aba lálügüdahan luagu Samueli luma Dawidi. Aba lariñawagún lun luagu añahein lan Naiotu le lani Ramá, 23 aba lárügüdün Saulu ñeinhin. Gama lumoun aba giñe lárügüdüni lani Wabungiute Sífiri Saulu, aba giñe ladimurehan Wabungiute liyumulugugiñe, aba lidin adimureheina darí lachülürün Naiotu le lani Ramá; 24 aba giñe laragachunu ladaüragun, aba lerederun adimureha ligibugiñe Samueli surusu sun weyu ligía sun áriebu. Ñéingiñeti liabin dimurei le: «Aban giñe san hádangiñe profetagu Saulu?»