1 Aba houdin lílana Sifu uburugu Gibeá arihei Saulu, aba hariñagun lun:

—Anihein Dawidi aramudagu luagu wübü Akilá ligibugiñe fulasu mageirawati.

2 Ábati laranserun Saulu, aba lanügün ǘrüwa-milu hádangiñe habuidun-agei, súdaragu Ísüraelina aba lidin áluahei Dawidi lidan fulasu mageirawati le Sifu. 3 Aba líchugunu likianpun-agei luagu wübü Akilá le lárubei üma ligibugiñe fulasu mageirawati. Gama lumoun ñein lidan fulasu mageirawati, aba lasubudiruni Dawidi luagu chülüha lan Saulu lárigi ñeinhin, 4 ábati lóunahan aríaahatiña lun lasubudiruni halíañein lan Saulu. 5 Lárigiñe aba lidin chülǘ le ñein tubéi likianpun-agei Saulu, aba larihini halía lan larumuga Saulu luma Ábünerü le liráü Nerü, le hábuti lisudaranigu Saulu. Turageiruguti kianpu-agei larumuga Saulu geyegu lumutuniña lau. 6 Ábati ladimurehan Dawidi luma Aimelekü le Étüna labu luma Awisái le liráü Seruiá lamulen Hoabü, aba lálügüdüniña lariñaga houn:

—Kaba aragacha numa kianpu-ágeirugun lun nachülürün dagá lumoun Saulu?

Lariñaga Awisái lun:

—Naragachuba buma.

7 Áriebumeme ligía, aba houdin Dawidi luma Awisái tidoun kianpu-agei. Larumuguñati Saulu turageirugu likianpun-agei, anuhán ligimaran charuñu múarugu lichügügiñe. Roun liña Ábünerü hau lisudaranigu geyegu lau. 8 Ábati lariñagun Awisái lun Dawidi:

—Deregelá Wabungiute bágani búhaburugun uguñe. Ígirabana lun náfaruni guentó lun nímiruni múarugun tau ligimaran guánarügü buídurügübei aban mirati.

9 Lariñaga Dawidi lun:

—Máfarabei, ladüga le áfaruti urúei le lanúadirubei Wabureme, lafayeiruba luagu. 10 Fiñutina lidan liri Wabureme luagu Búngiuba lan agidarei libagari, lidan lan yebe lachülürün dan lun lounwen o lounwen lan lidan lebelurun wuriburugun. 11 Sefulána Wabureme luéi náfaruni urúei le lanúadirubei. Barüboun ligimaran to lichügügiñeboun luma lagei luniñe duna, keimoun.

12 Ítara liñati lanügünu Dawidi ligimaran luma lagei duna le lichügügiñebei Saulu, aba houdin. Úati ni aban aganbutiña ni arihitiña; úati ni aban agaguduti, harumuguña súngubei ladüga lábürügüdüniña Wabureme lidoun aban luhulilin idabagu. 13 Lárigiñe aba lánhiñuragun Dawidi loubafurugun fulasu wayati, aba lararamun lábulugu aban wübü dise hawéi. 14 Ábati lagúaragun Dawidi lun Ábünerü luma houn súdaragu, lariñaga:

—Ábünerü, óunababana!

Aba lóunabun Ábünerü:

—Kátabu, bagúaragunbei lun urúei?

15 Lariñaga Dawidi lun:

—Mama lubéi buguya wügüri le úabei libe uburugu Ísüraeli le siñabei lóuchawaguniwa luma amu? Ida liñati móunigirun bubalin babureme le urúei? Beluhali aban lílana fulasu lau aritaguni lun láfaruni hilagubei. 16 Mabuidunti le badügübei. Fiñutina hun lidan liri Wabureme luagu lunti lan hóunwegun, lugundun móunigirun humuti habureme, urúei le lanúadirubei Wabureme. Áluahaboun ligimaran urúei luma lagei duna le buga lichügügiñebei, anhein badarira!

17 Dan le lasubudirunbalin Saulu lumalali Dawidi, aba lariñagun:

—Ma san buguya niráü Dawidi le adimurehabei nun!

Lariñaga Dawidi lun:

—Anha urúei, au. 18 Gama lumoun ka san uagu léibaahana urúei au le lubúein? Ka san wuribati nadügübei? 19 Ayumuraguatina lun urúei lun laganbunina: Anhein Wabureme lubéi íchugubalin urúei kóntüra au, agurabatina lánharun leresibirun aban idewesei; gama lumoun anhein hani lubéi wügüriña katei le, íñaragualaña Wabureme. Lugundun bugá hamaadina lídangiñe fulasu le lani Wabureme guentó, ani lau lira hádahañadina lun neseriwidun houn amu búngiugu. 20 Mabusenruntina hamuga lun láwiyuruniwa nita dise luéi liñúarü Wabureme, gama lumoun láluahañadina urúei kamá aban hayaba, léibaahañadina áraabu kei aban dunuru.

21 Ábati lariñagun Saulu:

—Dawidi, niráü, ariha naali luagu afigouhaadina lan! Óuseraadina kei aban ibidiougua tau, ani adügaadina aban óunwenbu bulíeiguaü lau lira. Gama lumoun giribubá, máluahandigiaadina wuribani buma lugundun arufuda baali lineben nibagari bun uguñe weyu.

22 Lariñaga Dawidi lun:

—Anuhán ligimaran urúei. Ñǘbuinla aban hádangiñe lubúeingu anügoun, 23 lafayeireime Wabureme kada aban según taruman lanigi. Lau sun ru lani Wabureme urúei núhaburugun uguñe, máhatina nadügün wuribani lun urúei le lanúadirubei. 24 Ani ítara kei narufuduni lineben libagari urúei nun uguñe, ítara láamuga giñe linebedun nibagari lun Wabureme, ani sefuláname lídangiñe sun luwuyeri idiheri.

25 Ábati lariñagun Saulu:

—Biniwatibu niráü Dawidi! Badügüba burí katei wéinamuti!

Ani buídubei lidin bun lidan sun le badügübei. Lárigiñe aba lagiribudun Saulu lúbiñoun, aba lasigiruni Dawidi lémeri.