1 Dan le hagumeserunbei wügüriña agibedagua, ani garahüñügua hagía würiña irahüñü. 2 Aba harihin lirahüñü Bungiu luagu buidu burí hamá würiña hagía, aba burí hanúadahan hádangiñe, lun hamarieidun hama. 3 Aba lariñagun Bungiu:

—Mígirunbadina lun habagaridun gürigia sun dan, ladüga débiliti ǘgürügü. Ligía san-wéinrügübei lubéi irumu labagaridun wügüri.

4 Aba hayabingua hígandei fulasurugún dan le hagumeserunbei lirahüñü Bungiu agamaridaña würiña ha harahüñü wügüriña lun hagaraüdün hau. Hagía buga ha uágubaña laganbahóua lidan dan lügüra.

5 Dan le larihinbei Bungiu luagu hanarime lan hariban gürigia ha ubouagubaña, luma giñe sun lan dan hasaminaruña hadügün katei wuribati, 6 aba lírudun luagu ladügüniña gürigia. 7 Lau saragu igarigu lariñaga:

—Nagumuchaguagüdaaña gürigia ha nadügübaña ligibuagugiñe ubóu, nagumuchaguagüdaaña giñe sun animaalu ha áüdübüna, sun animaalu ha aduruuharügübaña múarugu hama dunuru. Wéiriti íruni le nuágubei luagu nadügüniña!

8 Gama lumoun gúndaati Bungiu lau Noé.

9 Anihán asusereduti luáguti Noé. Aban buga wügüri buiti Noé, súnwandan ladügüni le lubeibei Bungiu. Lidan buga lidaani, ligíarügüñein abagarida lau lugundan Bungiu. 10 Ǘrüwañanu lirahüñü Noé: Semü, Kamü luma Hafeti. 11 Lun Bungiu, buin liña bugaha ubóu lau wuribani luma anarimeni, 12 sun gürigia aba híchaagun houngua lun wuribani. Kei larihin Bungiu luagu buin liña lan ubóu lau wuribati. 13 Aba lariñagun lun Noé:

—Nagumuchaguagüdaaña sun gürigia, gíbeti anarimeni ubouagu hádangiñeti, nagumuchaguagüdaaña lubeiti labu sun ubóu. 14 Dáguaba aban ugunei lautu fulansu buiti, badaagua burime rumu tidan, baputiheime sun láfadaragun fulansu le tuágubei lau barama dandu múnadagiñe keisi bóugudigiñe mebelura láamuga duna tidoun. 15 Ítara luba tueirin ugunei tuguya: San-darandi-seingü méturu timigifen, wein-biama méturu dimí tidabuberen, tareisi méturu dimí tiñun. 16 Ǘrüwabei fuló tidan, bíchigame aban funedera kei burí dimí méturu ǘnabu luéi tábulugu, luma aban bena luéigiñe aban touba. 17 Nóunaha aban guran le lunbei labuluchuni ubóu, lun lagumuchun lau sun le gabagaribei ligibuagu ubóu. Lóunweba sun le ubouagubei. 18 Ánheinti buma nadügüba aban daradu. Tidoun ugunei tuguya, hebeluruba birahüñü, búmari, bídiñugu, buguya. 19 Belugüda buguyame bián animaalugu hádangiñe sun hawuyeri animaalu ha ubouagubaña, aban wügüri aban würi, lun gayara lan gabagari hamá kei buguya. 20 Hebeluruba aban feru animaalugu hádangiñe kada hawuyeri buma tidoun ugunei, dandu dunuru, kei animaalugu áüdübüna, keisi ha aduruuharügübaña múarugu, lun habagaridun. 21 Óundaraguaba giñe sun luwuyeri éigini, ábame bareiduni, hou báamuga habu sun animaalu.

22 Aba ladügüni Noé sun katei kei lariñaguni Bungiu lun.