1 Wéiriti tisumadin hewe hádangiñe sun animaalugu áraabuna ha ladügübaña Wabureme Bungiu, aba tariñagun tun würi:

—Lariñahare lubeiti Bungiu hun lun meigin humá tídangiñe tin ni aban tídangiñe tídibu wewe ya fuluri-ágeirugu?

2 Aba tóunabunu würi:

—Gayaraati weigin tídangiñe tin furumiñeguarügü tídibu wewe, 3 ánheinti tídangiñe tídibu wewe to lamidanguaboun fuluri-agei ariñagati Bungiu woun lun meigin wamá ni lun waguurun tuagu tin wewe tugía, ladüga ánhawa lan eiga tídangiñe wóunweguba.

4 Gama lumoun aba tariñagun hewe tun würi:

—Iyeeni lira. Móunwegunbadün. 5 Subudi lumuti Bungiu luagu danme lan heigin tídangiñe tin tídibu wewe tuguya, léfegechuba lan hagu lun hasubudiruni le buídubei luma le wuribabei, ábameti ítara humá kei Bungiu.

6 Kei tarihin würi luagu wende tan tin wewe tuguya, aba tawamadun tun lun téiginu luma lun tiabin lun léfegechun tagu lun tasubudiruni le buídubei luma le wuribabei. Aba lubeiti tátügürün aban tídangiñe, aba téiginu. Ñéingiñe aba tíchugun lun túmari, aba giñe leigin. 7 Lidan oura ligía, aba léfegechun hagu, aba hasubudiruni biángubei hagía luagu surusu haña lan. Ábati háfadaguagüdün tubana igu lun hadouragun haugua tau.

8 Dan le haganbunbalin éibugañaha lan Wabureme Bungiu ñein lidan fuluri-agei luagu láfuhan lidili garabali rábounweyu, aba héibaagun aramudagua luéi tabadinagua wewe fuluri-ágeirugu. 9 Aba lagúarun Wabureme Bungiu lun wügüri, aba lálügüdüni:

—Halíañadibu san?

10 Aba lóunabun wügüri:

—Aganbarügütina luagu abunhein lan éibugañaha fuluri-ágeirugu, aba nanufudedun, ladüga surusu niña lan; ligía naramudagunbei.

11 Ábati lálügüdüni Bungiu:

—Kagia ariñagubei bun luagu surusu biña lan? Háfuga hóuhadibu tídangiñe tin wewe to ueiboun neweridirabu lun meigin banu?

12 Aba lóunabun wügüri:

—Würi to bíchuguboun nun lun númarime, tuguya íchuguboun tídangiñe tin wewe tuguya nun, aba néiginu. 13 Ábati lálügüdünu Wabureme Bungiu würi, lariñaga tun:

—Ka uagu badügei?

Aba tariñagun lun:

—Hewe eyeedubalina ligía néiginbei tídangiñe tin wewe tuguya.

14 Ábati lariñagun Wabureme Bungiu tun hewe:

—Íñarawaguañu buba hadan sun híbiri animaalugu luéigiñe le badügübei. Lúmagiñe uguñe lun lubaruaguóun aduruuharügüba múarugu béibuga, múaba giñe beiga. 15 Níchuguba gáganiguaü bidoun tuma würi, hadoun badügawagun hama tadügawagun. Hachuinrubei tadügawagun bábulugu, bágüreime lihilin hagudi.

16 Lariñaga tun würi:

—Naganwoundagüdübei bigarigu danme bagaraüdün, ani lauba igarigu bágurahaña birahüñü. Lau sun lira busenmeme bubéi búmari súnwandan, ani lagumadirubadibu giñe.

17 Lariñaga lun wügüri:

—Kei badügün gasu tau búmari, aba beigin tídangiñe tin wewe to ueiboun neweridirabu, guentó lábugiñebei íñarawaguni múa, badüga. Gasu buadigimarini múa lau áfaaguni darí líchuguni beigin bun lidan sun bibagari. 18 Láhüchüba hiiyu bun, háfume beigin híduru áraabuna. 19 Bagañeiruboun beigan fein lau lárouga bun, darime bagiribudun bárigoun lidoun múa le aubei badügǘwa, lídangiñe múa badügǘwa basaliraguayaba múame.

20 Aba líchugun wügüri tiri lúmari: Ewa, tuguya háguchuboun sun gürigia ubouagu. 21 Aba ladügün Wabureme Bungiu hadaüragun lau hara animaalu lun ladouragun wügüri tau sun lúmari.

22 Aba lariñagun:

—Guentoti, ítarahali wügüri kei aban wádangiñe, subudi laali le buídubei luma le wuribabei. Moun lumuti leigin tídangiñe wewe to lánina ibagari, ábame labagaridun lun sun dan.

23 Ligía lasagarunbalin Wabureme Bungiu wügüri lídangiñe Edén, aba líchuguni awadigimaridei múa le buga ídangiñebei ladügǘwa. 24 Lárigiñe lasagaruni wügüri aba líchugun átiri kátaña garünatiña luéigiñe oubaü le ñéingiñe lubéi laboucha weyu libiti Edén, tuma aban eféin durungu kei watu, agararahatu luagun sun oubaü lun ua lan ni aban achülürüti luagun tídibu wewe to lánina ibagari.