1 Aba lasigiruni Hakobu léibugun, aba lidin lidoun hamúan ha erederubaña lidan oubaü le ñéingiñe lubéi laboucha weyu. 2 Aba larihin aban fusu áraabu, ñéinñanu ǘrüwa hóuniri mudún. Kada aban hau mudún hama gábara ha lóunigirubaña, ladüga lídangiñe fusu ligía hata animaalugu duna. Ñeinñein aban óunwenbu dübü luagu liyuma fusu ligía, 3 dan le buriti hóundaragun sun mudún ñein, ábaha hagidaruni hóuniri dübü lun hatun mudún duna, lárigiñe ábaya hadouruni. 4 Aba lálügüdüniña Hakobu hóuniri mudún:

—Halíana san huguya numadagu?

Aba hóunabun:

—Lídangiñetiwa fulasu le gíribei Arán.

5 Ábaya lálügüdahan:

—Subuseti Lawán hun le liráü Naoru?

Aba hóunabun:

—Anha, subuseti woun.

6 Aba lagiribuhan Hakobu:

—Magadiñeti ladariragun lungua?

—Anha, magadiñeti Lawán —liña hóunabun hóuniri mudún—. Arihabá, anutén Rakeli to liráü hau halügüniña mudún.

7 Ábati lariñagun Hakobu:

—Wéyuagugili lun hadaürǘniwa mudún. Ka uagu míchugun hubéi duna houn aba hamuga hígiruniña lun heigin?

8 Aba hóunabun:

—Siñati wadügüni lira. Mosu wagurabun lun hóundaragun súngubei mudún, lun giñe hagidaruni hóuniri dübü luéigiñe liyuma fusu lun gayara lan lichugún duna houn mudún.

9 Sun anihán lan Hakobu adimureha hama, aba tachülürün Rakeli hau lilügüniña túguchi mudún kei tuguya lubéi óunigirubaliña. 10 Kei larihinu Hakobu hau lilügüniña liyaurite Lawán mudún, aba lagidaruni dübü luéigiñe liyuma fusu, aba líchugun duna houn mudún; 11 aba lachuurunu aba lagumeserun ayahua.

12 Dan le labahüdagun Hakobu tun luagu tiráü lan Rebeka ligía ani liraühaña lan Lawán aba tidin Rakeli éibaagueina abahüdaguei lun túguchi. 13 Dan laganbunbei Lawán luagu Hakobu, le tiráü litu, aba léibaagun eresibirei, aba lóuburuni, aba lachuuruni, aba lanügüni lúbiñoun. Lárigiñe aba labahüdaguni Hakobu sun le asuseredubei lun.

14 Lariñaga Lawán lun:

—Inarüni luagu aban ban hádangiñe nita.

Aba lerederun Hakobu luma Lawán aban hati. 15 Lárigiñe dan ligía aba lariñagun Lawán lun Hakobu:

—Mawadigimaribadibu nun magañeirunga ni kata ladügarügü niduhe ban. Ariñagabéi nun átiri lan babusenrun nafayeirunibu.

16 Garahüñütiti Lawán bián würiña irahüñü: Lía tiña to íbugañaü, Rakeli to amuleluaü. 17 Buíduburiti tagu Lia; anhoun Rakeli magadiñetu lúmagiñe tugudi lumoun tichügü. 18 Keiti buga hínsiñe tan Rakeli lun Hakobu, aba lariñagun:

—Nuadigimariba sedü irumu buma tuagu Rakeli.

19 Aba lóunabuni Lawán:

—Buítimati lun níchugunu bun, mama lun aban terencha. Rédeiba numa.

20 Ítara liña luadigimaridun Hakobu sedü irumu tuagu Rakeli, gama lumoun málüti lasandiruni dan ligía ladüga wéiriti tínsiñe lun.

21 Dan le lásügürünbei sedü irumu ligía aba lariñagun Hakobu lun Lawán:

—Ruboun númari nun maríei náamuga tuma, ladüga gumuha dan le lunbei nuadigimariduni tuagu.

22 Ábati lamisurahaniña Lawán sun lubesinanigu lidoun fedu le lánina maríei le ladügübei. 23 Gama lumoun aba lanügünu Lawán Lía áriebu, aba líchugunu lun Hakobu, aba larumugun Hakobu tuma. 24 Ru ligía Lawán aban hádangiñe lumusun to gíriboun Silüpá tun Lía lun teseriwidun tun. 25 Larugan binaafin, aba larihini Hakobu luagu tuma lan Lía larumuga, aba lariñagun lun Lawán:

—Káteigia le badügübei nun? Ma tuagu Rakeli nuadigimarida buma? Kati uagu beyeedana?

26 Aba lóunabuni Lawán:

—Magaburi wamuti ya lun tamarieidun amuleluaü tubaragiñe íbugañaü. 27 Gúnfulibei lidimasuna maríei le tani Lía, ábame giñe níchugunu Rakeli bun, anhein busén bubéi buadigimaridun ábanya sedü irumu numa.

28 Aba lánharun Hakobu, danti le lagumuchun lidimasun tamarieidun Lía, aba líchugunu Lawán Rakeli lun lúmarime. 29 Aba giñe líchugun Lawán aban hádangiñe lumusuniña gíritu Bilá tun Rakeli lun teseriwidun tun. 30 Ábati lóundarun Hakobu tuma Rakeli, aba tínsiñedun lun sügǘ tau Lía, íbini awadigimarida lan ábanya sedü irumu lanwoun luma Lawán.

31 Dan larihinbei Bungiu luagu lougua lan tínsiñe Lía lun Hakobu, aba ladügün Bungiu lun tagaraüdün Lía, Rakeliti maraütu. 32 Aba tadageinadun Lía, aba tagaraüdün aban irahü, aba tíchugun Rubén luagu, tariñaga:

—Ariha lumuti Bungiu nirun. Nínsiñedaame lun númari guenlé.

33 Lárigiñe ábaya tagaraüdün Lía aban irahü, aba tíchugun Simeón luagu, tariñaga:

—Ariha lumuti Bungiu luagu mínsiñen nan buga houn, ligía líchugunbei ábanya irahü nun.

34 Ábaya tagaraüdün aban, aba tíchugun Lewí luagu, tariñaga:

—Guenlé lóundaratimaha númari numoun, ladüga ǘrüwaña nirahüñü lau.

35 Ábaya tagaraüdün aban, aba tíchugun Hudá luagu, tariñaga:

—Neremuha lun Bungiu guenlé.

Lárigiñe aba magaraüdün tan.