1 Lidan dan ligía, aba ladisedun Hudá hawéi líbirigu, aba lidin aganawa lúbiñe aban wügüri gíriti Ira, lídangiñeti fulasu le gíribei Adulámü. 2 Ñein lasubudiroun liráü aban Kananna gíriti Sua, aba lamarieidun tuma. Dan le lóundarun tumoun, 3 aba tadageinadun, aba tagaraüdün aban irahü, aba tíchugun Erü luagu. 4 Ábaya tadageinadun, aba tagaraüdün ábaya wügüri irahü, aba tíchugun Onán luagu. 5 Ábaya tagaraüdün ábaya wügüri irahü, aba tíchugun Sela luagu, dan le lágurahounbei Sela, Kesibüñein Hudá.

6 Aba lamarieidagüdüni Hudá Erü, le íbugañaü hadan lirahüñü tuma aban würi gíritu Tamarü. 7 Gama lumoun magundanti Bungiu lau luriban lóuserun Erü, aba lagidaruni libagari. 8 Ábati lariñagun Hudá lun Onán:

—Aganawabá tuma lúmari meha finóu bíbugaña gúnfuli báamuga keisi uguñouni, gadügawagun láamuga bíbugaña bídangiñe.

9 Gama lumoun subudi lumuti Onán luagu anhoun lan agaraüda würi to lau, manügǘnbaña lan irahüñü hagía kei lirahüñü. Ságütiha lagamaridunu lúmari meha líbugaña, louchun lun lígiragüdün múarugun lun madageinadun tan, lun madügawagun lan líbugaña lídangiñe. 10 Aba giñe magundan lan Bungiu lau katei le ladügübei Onán, aba giñe lagidaruni libagari. 11 Ábati lariñagun Hudá tun Tamarü:

—Rédeiba kei aban würi hilaali túmari lúbiñe búguchi, darí laweiridun Sela le niráü.

Lidan linarün katei, haritaguati Hudá luagu gayara lan giñe lounwen Sela kei líbugañanu. Ábati tidin Tamarü aganawa lúbiñe túguchi.

12 Dan luagun dan aba tounwen lúmari Hudá, to liráü Sua. Lárigiñe lágurun Hudá ludu, aba lidin lidan aban fulasu le gíribei Timünátü, le ñein habéi ha ásahabaliña halügüniña mudún, aba lidin Ira le Adulámüna le lumada luma. 13 Dan le tasubudirunbalin Tamarü luagu aningira lan tímedamuru Timünátü lun hasarún lilügüniña mudún, 14 aba taragachunu tadaüragun to hadaüragun würiña hilaguaaña úmari aba tadaürün aban belu lun ibidiñewa tan, aba tañuurun luagu lubenari fulasu le Enaimü le luágubei lémeri Timünátü. Tadügünbalin le, ladüga wéirihali lan buga Sela, mamarieidagüdün hamutu luma.

15 Dan le larihinbarun Hudá, aba laritagun luagu aban lan horu, ladüga darugu liña lau tigibu. 16 Ábati liabin tuagun, ibidiñounga lun luagu lídiñu tan, aba lariñagun tun:

—Gayaraati narounrun buma?

Aba tálügüdüni:

—Kábagia bíchiga nun luagu barounrun numa?

17 Lariñaga tun:

—Nóunahaba aban hádangiñe yégüniña gábara bun.

Tariñaga lun:

—Anha, gama lumoun ígiraba somu katei le bani nun kei seini luagu bagararaaguayaba lan, darí bóunahani gábara nun.

18 Aba lálügüdünu:

—Kagia babusenrubei nígirun bun?

Aba tóunabuni:

—Rubei biseyun lau lagürüga nun luma badun le búhaburugubei.

Aba líchuguni Hudá tun, aba larounrun tuma, aba tadageinadun. 19 Lárigiñe aba tidin Tamarü agidaroun belu to buga tuáguboun, ábaya tadaürünu tadaüragun to hadaüragun würiña ha hilaguaaña úmari.

20 Aba lóunahani Hudá gábara luma lumada le Adulámüna, lun tóunahani würi tuguya liseyun lau lubadun lun lárigoun; gama lumoun madarirun laaru lumada würi tuguya. 21 Ábati lariñagun houn wügüriña ha lílana fulasu ligía:

—Hagóun san horu to Enaimüna to buga láruboun üma?

Aba hóunabuni:

—Úagiru ni aban horu ya.

22 Ábati lagiribudun le ñeinhin lubéi Hudá, lariñaga lun:

—Madari numutu würi tuguya, ariñagatiña giñe wügüriña ha ñéinbaña nun luagu úagiru lan ni aban horu ñein.

23 Aba lóunabun Hudá:

—Rédeita lau ílagu, ua hamaamuga adügütiña bula wau, au óunaha numuti yebe gábara, gama lumoun madari bumutu.

24 Kei burí ǘrüwa hati lárigiñe, aba hayabin ariñaga lun Hudá:

—Róunharu bídiñu hama amu wügüriña, ladüga dageinañoun.

Aba lagúaragun Hudá:

—Sagá humóun, gudá humóun!

25 Gama lumoun dan le añahán lubéi asagaroun, aba tóunahan ariñaga lun tímedamuru: «Le labureme ílagu le, ligía adageinadagüdübalina. Arihabéi ka lan laburemebei seyu lau lagürüga luma badun le». 26 Dan le larihinbalin Hudá ílagu, aba lariñagun:

—Richatu sügǘ nau ladüga mamarieidagüdün numutu luma Sela le niráü.

Aba marounrundigiaali lan tuma.

27 Dan le tágurahanbei Tamarü, aba hayabin mádounu tun. 28 Lídanbei hágurahoun, aba lasagaruni aban hádangiñe lúhabu. Aba tagüürün ágüdahatu aban filu funati luagu lúhabu, aba tariñagun:

—Anihán áfuridubei furumiñe.

29 Gama lumoun lidan oura ligía ábaya lebelaagüdüni lúhabu, aba láfuridun líbugaña furumiñe. Ligía tíchugunbei ágüdahatu Fáresi luagu, tariñaga:

—Daraadibu üma bubarua!

30 Lárigiñe aba láfuridun le aban, le buga gawagubalin filu funati luagu lúhabu, aba tíchugun Sera lírime.