1 Siñá lárügüdagun Hosé lungua hagibugiñe sun ha eseriwidubalin, aba lagúaragun:

—Furí hamá súngubei yáagiñe!

Úati lubeiti ni aban hádangiñe ha eseriwidubalin ñein dan le larufudagunbei lungua houn líbirigu. 2 Ábati layahun here darí lun hasubudiruni sun Ehiptuna, aba lachülürün uganu lúbiñoun urúei Ehiptuna. 3 Aba lariñagun Hosé houn líbirigu:

—Hosé au. Wínwangili san núguchi? Wéiriti halouchun líbirigu luagu añahán lan ligibugiñe, darí lun siñá lan hóunabuni.

4 Lariñaga Hosé houn:

—Yarafa humá nun.

Dan hayarafadunbei aba lariñagun houn:

—Au Hosé le hamulen, le halugurubei lun Ehiptu; 5 gama lumoun madiherida humá magañidun huguyame húniwagua luéigiñe halugurunina, ladüga lóunahañadina buga Bungiu hubá lun nesefurun ibagari. 6 Biámaali irumu lau ilamaü fulasurugu, ani mégeigili seingü irumu lun malubahóun lan ni kata, íbini lábunawagun. 7 Gama lumoun óunaha lumutina Bungiu hubaragiñe, lun gayaraabei lan herederun hadügawagun ubouagu, lun giñe nesefuruni hibagari lidan aban igaburi le buíduti. 8 Bungiu lubeiti óunahabalina lidoun fulasu le, mama huguya; ru laadina Bungiu kei eweridihati lun urúei kei giñe gamanihariti tau luban, ani kei giñe gumadan lidan sun Ehiptu.

9 —Heiba furese le ñein lubéi núguchi, hariñagame lun: "Ítara liña lariñagun Hosé le biráü: Ru laadina Bungiu kei labureme sun Ehiptu. Higabu arihana. Madarasahabá. 10 Baganóuba lóubawagu Gosén, hau birahüñü hama bibañan, hau sun bibiñanigu luma sun búmati. Ítara luba yarafañu ban nun. 11 Níchuguba éigini bun ñein, luma houn sun biduheñu, luma houn sun ha búmabaña, ua láamuga hemegeirun; ladüga mégeigili seingü irumu lau ilamaü".

12 —Benhamín le namulen huma, gefentün luagu au guánarügü lan ariñagubalin le. 13 Abahüdagua humá lun núguchi luagu ubafu le nuágubei Ehiptu luma sun le ariha humaalibei ya. Heiba furese, anügei núguchi!

14 Aba lóuburuni Hosé Benhamín le lamulen, aba layahun. Aba giñe layahun Benhamín hóuburagu luma Hosé. 15 Lárigiñe aba lachuuruniña Hosé sun líbugañanu, aba layahun dan le lóuburuniña. Lárigiñe lira ligíaali gayara lan hadimurehan lun.

16 Aba lachülürün uganu tidoun luban urúei luagu chülühaña lan líbirigu Hosé, aba lagundaarun urúei úara hau sun lánigu. 17 Aba lariñagun urúei lun Hosé:

—Ariñagabá houn bíbirigu lun haloduruniña halügüniña burigü, ábame hagiribudun lóubawagun Kanán, 18 hanügeime háguchi hama haduheñu nun. Níchuguba lídangiñe le buítimabei lídangiñe múa houn Ehiptu, héigiba giñe lídangiñe lubuidun-agei éigini le fulasurugubei. 19 Ariñagabá houn lun hanügün burí kareta yáagiñe Ehiptugiñe lun hanügüniña hámarigu hau harahüñü luma húguchi. Lun hayabin, 20 ani lun meberesedun hamá lau le hánibei guentó, ladüga hánibei lubuidun-agei burí katei le Ehiptubei.

21 Aba hadügüni lirahüñü Hakobu ítara. Aba líchugunu Hosé kareta burí to uáguboun lariñaga urúei, ru ligía éigini houn lun heigin luagu üma; 22 ruti giñe daüguaü iseri houn lun hasansiragun, anhein lun Benhamín ruti ǘrüwa-san murusun pülata tuma seingü daüguaü. 23 Lunti lúguchi óunahati diisi burigü lau lubuidun-agei burí katei le Ehiptubei, hámaya diisi burigü barüina türigu, fein luma éigini lun leigin lúguchi luagu üma. 24 Dan layouragunbei Hosé houn líbirigu, lariñaga houn:

—Midin humatia ageindagueina luagu üma. Aba houdin.

25 Aba háfuridun Ehiptugiñe, aba hachülürün Kanán, le ñein lubéi laganawa Hakobu le háguchi. 26 Dan hariñaahani lun Hakobu luagu wínwangili lan Hosé, luagu giñe ligía lan gumadanbei lidan sun Ehiptu, ibidiñeti lun kaba lan ladüga ni kaba lan lariñaga, ladüga siñati yebe lafiñerun luagu le hariñagubei lun. 27 Gama lumoun dan habahüdaguni sun le lariñagubei Hosé houn lun, arihalóun burí kareta to lóunahaboun Hosé lun tanügüni aba lagundaarun saragu. 28 Ábati lariñagun:

—Buídurügüti nun nasubudiruni luagu wínwangili lan niráü Hosé! Néibuga arihei lubaragiñe nounwen.