1 Lidan dan ligía, aba ladagarun aban óunwenbu likesin éigini lidan fulasu ligía, bóugudin luéi le meha adagarubei dan meha wínwangili Abüraámü. Ligía lébubei lidin Isaakü Gerarü, le buga ñein lubéi laganawa Abimélekü le harúeite Filistéana. 2 Ñein lasaliragua Bungiu lun, lariñaga lun:

—Mídinba Ehiptu. Rédeiba le ñein lumuti nariñagun bun, 3 guentó redei yebebá aganawa lidan ageiraü le, búmabadina, nabinirubadibu, ladüga níchugubei múa le bun habu sun badügawagun. Ítara luba nagunfulirun lau dimurei le nariñagubei lun Abüraámü le búguchi. 4 Nadügüba lun gibe hamá badügawagun kei waruguma ha siélubaña, ábame níchuguni sun múa le houn, habinirúba giñe sun néchani ha ubouagubaña hádangiñe badügawagun, 5 ladüga aganba lumutina meha Abüraámü, gúnfulilei le nubeibei, nugumadin, nilurudun luma narufudahan.

6 Ábati lerederun Isaakü Gerarü, 7 danti le hálügüdüni lílana fulasu ligía tuagu lúmari, aba lariñagun houn luagu litu tan. Hanufudeti lariñagun luagu lúmari lan Rebeka, ladüga magadiñe tan, haritaguatiti luagu háfarubei lan lílana ageiraü ligía tuéigiñe.

8 Ábati lerederun ñein. Luagu aban weyu ñeinñein Abimélekü aríaaha luéigiñe funedera, ligía larihini Isaakü íchuaha tuma Rebeka to lúmari. 9 Ábati lóunahan luagu, lariñaga lun:

—Ma búmari würi to, adian? Kati uagu bariñaga nun luagu bitu lan?

Lariñaga Isaakü lun:

—Ladüga naritagun luagu gayara lan háfarunina tuéigiñe.

10 Lariñaga Abimélekü lun:

—Kame badügei katei le woun? Ítagaraü yebe badügün lun larounrun aban lílana fulasu tuma búmari; aba hamuga bafigoungüdüniwa.

11 Ábati lariñagun Abimélekü houn sun lílana fulasu: «Le añawarihati lun wügüri le odi tun lan lúmari, lasiadirúba lun lounwen».

12 Lidan irumu ligía aba lábunagun Isaakü lidan ageiraü ligía. Ma lubuidun lalubahan, lárigiñe aba labiniruni Bungiu. 13 Aba larisidun, aba lagibedun lúmati. 14 Saragu haña lilügüniña mudún, bágasu, musu, darí lun hagimugadun Filistéana lun. 15 Ligía hadouhanbalin sun fusu le burí hachíahabei lumusuniña Abüraámü, le lúguchi Isaakü, dan meha le wínwangili Abüraámü. 16 Darí lun lachülürün dan, lun lariñagun Abimélekü lun Isaakü:

—Beiba yáagiñe, ladüga rísihadibu sügǘ wau.

17 Aba lidin Isaakü, aba ladügün likianpun lidan fulasu wayati le gíribei Gerarü, aba lerederun aganawa ñein. 18 Ábaya lachigini burí fusu le meha achigíbei dan meha le wínwangili lúguchi, le burí meha hadourubei Filistéana lárigiñe lounwen, aba líchuguni írimeme burí le meha líchugubei lúguchi luagu.

19 Luagu aban weyu hachigiña lumusun Isaakü aban fusu lidan fulasu wayati, aba hadarirun aban lísensen duna. 20 Gama lumoun ábaha hageindagun hóuniri mudún ha Gerarüna hama hóuniri lilügüniña Isaakü, ladüga hariñagun luagu hadunari lan duna ligía. Ligía líchugunbei Isaakü luagu fusu ligía «Wuribu» ladüga hawuribuhan luma.

21 Lárigiñe ábaya hachigin lumusuniña Isaakü ábanya fusu, ábaya hageindagun luéigiñe, aba líchugun Isaakü liri fusu ligía «Gáganiguaü».

22 Aba lidin Isaakü dise ñéingiñe, ábaya lachigin aban fusu. Keiti mageindagunhaña lubéi luéigiñe, aba líchugun luagu «Esefuruni», lariñaga:

—Ígira láadiwa Bungiu lun gayara lan wawanserun lidan fulasu le.

23 Ñéingiñe aba lidin Isaakü Bérüsewoun. 24 Aba lasaliragun Bungiu lun áriebu ligía, lariñaga lun:

«Au le, Lubungiute Abüraámü le búguchi.

Manufudedabá, anahein buma.

Nabinirubadibu luéigiñe lóubadina Abüraámü,

gánwoungüdanañame badügawagun saragu».

25 Ábati ladügün Isaakü aban latarü ñein lun lafurieidun lun Bungiu, aba lerederagun lidan fulasu ligía, aba hachigin lumusun aban fusu.

26 Luagu aban weyu aba liabin Abimélekü Gerarügiñe lun ladimurehan luma Isaakü. Ñǘbuinti Ausatü le lumada luma, labu Fikolu le hábuti lisudaran. 27 Lariñaga Isaakü houn:

—Anhein mínsiñen nubéi hun, darí lun habugunina hageiragiñe, ka uagu hiabin arihana?

28 Aba hóunabuni:

—Ariha wamaali luagu anihein lan Bungiu buma, saminaadiwati wadügün aban daradu buma. Anihán daradu le lunbei wadügüni buma, 29 lun madügün ban ni murusun wuribati woun, ladüga mañawarihangidiwa bun. Lubaragiñe lira, adügarügütiwa buiti bun, aba wóunahanibu lau lubuidun, guentoti labiniruñadibu Bungiu.

30 Ábati ladügün Isaakü aban óunwenbu fedu houn, aba heigin, gurá hagía. 31 Larugan binaafin aba hásaarun, aba háfiñurun hámagua. Lárigiñe aba layouragun Isaakü houn, aba houdin keisi umadagu.

32 Weyuméme ligía aba hayabin lumusuniña Isaakü ariñaga lun luagu hadarirun duna lidan fusu le hachigibei. 33 Aba líchugun Isaakü liri fusu ligía Sewa ligía Bérüsewamemegili lubéi liri uburugu ligía.

34 Dan le bián wéinhali irumu lau Esaú aba lamarieidun tuma Hudidi to liráü Beerí le Étüna. Maríei ligía giñe tuma Basemátü liráü giñe aban Étüna gíriti Elón. 35 Rútiña bián würiña ha ligifi ibagari lun Isaakü tuma Rebeka.