1 Luagu aban amidirugu, dan anihán lan Abüraámü ñun tigibugiñe likianpun lidan áraabu le tani ensina le lani Mamüré, aba lasaliragun Bungiu lun. 2 Dan le liñuraguni Abüraámü larihin, ñéinñanu ǘrüwa wügüriña rara ligibugiñe. Aba lásaarun furese lun leresibiruniña, aba labuluchagun darí ladagarun lerebe múarugu, 3 lariñaga:

—Naburemegu, adüga humá fulesei nun, midin humá yebe. 4 Anhein buidu larihín hun, namuriaha murusun duna lun lachibún hugudi, lárigiñeme ábame hemeraagun murusun lábugiñe lamuña tídibu wewe to. 5 Kei sügühadün lubéi ligibugiñe ñein lubéi naganawa, nanüga somu katei hun lun heigin lun héreme lubá hasigiruni héibugun.

Aba hóunabuni:

—Buiti, adügabéi.

6 Aba lebelurun Abüraámü lúbiñoun, aba lariñagun tun Sara:

—Furesebá! Barüba bián-wein líburu tídangiñe tubuidun-agei fulúaru ábame badügün fein.

7 Aba léibaagun Abüraámü le ñeinhin habéi lilügüniña bágasu, aba lanúadahani lubuidun-agei liraüraü bágasu le ñeinbei, aba líchuguni lun aban hádangiñe lumusuniña, aba laranseruni furese lun éigini. 8 Bóugudin luéi liraüraü bágasu ligía, ruti Abüraámü furumasu houn luma míligi, aranseñu ligía lun leseriwiduniña sun añaha lan eiga, lábugiñe tídibu wewe. 9 Dan le lásurun heigin, aba hálügüdüni bisidatiña hagía Abüraámü:

—Hagóun Sara to búmari?

Lariñaga houn:

—Anuhán ñein tidan kianpu.

10 Aba lariñagun aban hádangiñe:

—Niábiyaba arihabu leweñegua irumu, lúmounme dan ligía garaüharume Sara aban wügüri irahü.

Sun bugati dan le, anuhán buga Sara aganbahei sun le hariñagubei lun Abüraámü, lubadugiñe tubenari kianpu, ibidiñounga lun Abüraámü. 11 Abüraámü tuma Sara wéiyougaaña, miábinhaliha tidaani Sara tun. 12 Ligía tásiñarunbalin Sara éherahani ligía awanda, aba tasaminarun túnguarügü:

—Ida luba san lasuseredun katei le, guenlé dan le wéiyougaadiwa nuguya lau sun númari?

13 Aba lariñagun Bungiu lun Abüraámü:

—Ka uagu téheraha Sara? Mafiñetu luagu gayara lan tagaraüdün lau sun wéiyaaru lan? 14 Anihein funagia katei wéiriti lénrengun lun lásiñaruni Bungiu adüga? Niábiyaba arihabu leweñegua irumu, lúmounme dan ligía garaüharume Sara aban wügüri irahü.

15 Dan le taganbuni Sara katei le, aba tanufudedun, aba tabusenrun yebe teyeedagun. Tariñaga:

—Méherahantina.

Lariñaga Bungiu tun:

—Subuseti nun luagu éheraha ban.

16 Lárigiñe aba hásaarun bisidatiña hagía, aba hagumeserun éibuga uburugun Sodoma. Aba lidin Abüraámü úara hama lun layouragun houn. 17 Aba lasaminarun Bungiu: «Mosu nariñaguni lun Abüraámü kaba lan nadüga, 18 ladüga lúguchibei aban néchani wéiriti ani héreti. Füramasetina lun luagu nabinirubaña lan sun néchanigu ha ubouagubaña lídangiñe. 19 Anúadira naali lun lagumadiruniña lirahüñü hama ladügawagun lun hadügüni le narufudahabei houn, adüga hameime sun le buídubei luma le úaraguabei, lun gayara lan nagunfulirun lau sun le füramase náalibei lun».

20 Aba lubeiti lariñagun Bungiu:

—Wuribati ladimurehoun hawagu gürigia ha Sodomana hama Gomorana, hanarimeti giñe hafigoun, 21 néibuga lubeiti ñein guentó arihei anhein inarüni lubéi luagu weiri lan hariban kei lariñawagúniwa nun. Ítara luba nasubudiruni.

22 Aba houdin biama hádangiñe bisidatiña hagía ñéingiñe lun uburugun Sodoma, anhein Abüraámü ábameme lerederun ligibugiñe Bungiu. 23 Aba layarafadunmémeraü luagun, aba lariñagun lun:

—Bagumuchaguagüdübaña san giñe ha madurunbaña úara hama ha gadurunbaña? 24 Háfuga añahein dimí-san gürigia maduruntiña, bagünrinchaguamemebei uburugu ligía, úabei ferudunabani hawagu dimí-san hagía? 25 Mafiñentina anhein bagünrinchagubei lubéi le madurunbei úara luma le gadurunbei, kamá hamuga ábanmeme hafigoun biángubei hagía! Madügabéi lira! Buguya le aguseragüdüti íñugutimati lidan sun ubóu, Maguseragüdünbadibu san lau irichaü?

26 Ábati lóunabuni Bungiu:

—Ánhana adarira dimí-san gürigia maduruntiña Sodoma, hadüga dimí-san hagía feruduna nubaña sun ha ñéinbaña.

27 Ábaya lariñagun Abüraámü:

—Ferudunabana luagu nadimurehan bun ítara, ladüga Bungiu buguya, anhein au wügürirügüñadina, 28 fagua mégeibaña seingü lun hóustarun dimí-san maduruntiña. Hawagurügü seingü hagía bagünrinchagubei san uburugu?

Aba lóunabuni Bungiu:

—Ánhana adarira bián-wein-seingü maduruntiña, magünrinchagun nubéi.

29 Ábaya lariñagun Abüraámü:

—Angia hamuga lun bián wéinrügüñanu lan maduruntiña ñein.

Lariñaga Bungiu:

—Magünrinchagun nubéi uburugu ligía hawagurügü bián wein hagía.

30 Ábaya layumuragun Abüraámü, lariñaga:

—Magañidabátia numa luagu nagiribuhan saragu luagu ábanmeme katei, fagua badarirun darandirügü maduruntiña.

Ábaya lóunabuni Bungiu:

—Feruduna nubéi uburugu ligía hawagurügü darandi hagía.

31 Ábameme lagiribuhan Abüraámü, lariñaga:

—Nabureme, afiñetina gíbeyaali lan namuriahan, gama lumoun kaba san asusereda ánhabu adarira wéinrügü maduruntiña?

Aba lóunabuni Bungiu:

—Magünrinchagun nubéi uburugu hawagurügü wein hagía.

32 Agiribuhamémegili Abüraámü, lariñaga:

—Magañidabatia numa Nabureme, lagumuhóun namuriahan le, mananihanhadiname bun. Kaba san badüga ánhabu adarira díisirügü?

Lariñaga Bungiu lun:

—Magünrinchagun nubéi uburugu hawagurügü diisi hagía.

33 Dan lásurun ladimurehan Bungiu luma Abüraámü, aba lidin ñéingiñe, aba lagiribudun Abüraámü tidoun likianpun.