1 Wéiyaali bugaha Abüraámü saragu, ani biní laali Bungiu lidan sun katei. 2 Luagu aban weyu, aba lagúarun lun lumusun le wéiyatimahalibei hádangiñe súngubei, le arihubei lau sun lúmati Abüraámü, aba lariñagun lun:

—Rubei búhabu lábugiñe niyada, 3 fiñuba luagu liri Bungiu le Labureme sielu luma múa, luagu mígirunbadibu lan lun lamarieidun niráü Isaakü tuma aban würi to yaana Kanán le ñein lubéi naganawa, 4 bídiba lan nageira lun banúadahan lúmari hadan niduheñu.

5 Aba lóunabuni musu ligía:

—Ánhounti maha würi tuguya tiabin numa, kábagia nadüga? Mosu lubeiti nanügüni biráü lidoun fulasu le ñéingiñe lubéi báfurida!

6 Lariñaga Abüraámü lun:

—Uá, manügabéi niráü ñeinhin! 7 Babureme le Lubungiute sielu, ligía asagarubalina lúbiñegiñe núguchi luma hageiragiñe niduheñu, aba lariñagun nun luagu líchugubei lan múa le houn nadügawagun, lóunahabei lani ánheli bubá bubá lun banügün aban würi yétegiñe lun lúmarime niráü. 8 Anhoun maha würi tuguya tiabin buma, madurunbadibu, gama lumoun manügabéi niráü yágütoun!

9 Ábati líchuguni musu ligía lúhabu lábugiñe liyada Abüraámü, aba láfiñurun lun luagu ladügübei lan le lamuriahabei luma. 10 Lárigiñe aba lanúadahan idewesei lídangiñe burí le buídutimabei luma labureme, aba lanügün diisi kameyu aba lidin uburugun le meha ñein lubéi laganawa Naoru lidan Mesopotamia. 11 Dan le lachülürünbei yarafa lun uburugu ligía lagumeseruña aburigada. Ligía oura ligía houdin würiña adabura duna. Aba lemeraaguagüdüniña musu kameyu laru aban fusu, 12 aba lagumeserun afurieida:

—Aburemei, Lubungiute niyubudiri Abüraámü, adügabá lun buidu lan lidin nun uguñe, arufudabéi bareini lun niyubudiri Abüraámü. 13 Neredera ya laru fusu, lubá hayabin würiña irahüñü ha lílana fulasu le adabura duna. 14 Adügabá lun to lanme irahü to untu nariñaga: «Adügabá fulesei nun, rarigüdabéi bidinan lun natun duna» lun tóunabunina: «Guraba, níchiga giñe duna houn bilügüniña kameyu», lun tuguya lan to banúadiruboun lun Isaakü. Ítara luba nachoururuni bareini lun niyubudiri.

15 Másugili lafurieidun, ligía larihin tiabin Rebeka to liráü Betueli lau tidinan tégewagu. Betueli, tiráü bugaha Milüká lau Naoru le lamulen Abüraámü. 16 Magadiñetu buga Rebeka ani mámarigiru; magamaridun lágiru ni aban wügüri. Aba taragachun lidoun fusu, aba tárürüni tidinan, tagiribuda yebe 17 ligía léibaagun musu ligía tárigi, lariñaga tun:

—Adügabá fulesei nun. Ruba murusun duna nun lídangiñe bidinan lun natun.

18 Aba tóunabun:

—Guraba.

Aba tarariragüdüni tidinan, aba tágüdahani túhaburugu, aba tíchugun duna lun lun latun. 19 Dan le lásurun latun, aba tariñagun lun:

—Nadabura giñe duna houn bilügüniña kameyu lun hátuni sun le habusenrun.

20 Furesegueina, aba téseruni lila tidinan lidoun hátagüle animaalu aba téibaagun saragu wéiyaasu adabura, darí lun hatun sun kameyu. 21 Anihánti buga musu le aríaguoun mariñagunga ni kata, ladüga busenti lachoururuni luagu adügaali lan Bungiu lun buidu lan lidin lun lidan luéiyasun.

22 Dan le lásurun hatun kameyu, aba lanügün wügüri ligía aban bagü golu le hǘrüti kei burí sisi güramu, aba líchuguni luagu tígiri. Ru ligía bián bángüli le golu tun le hǘrüti, 23 lariñaga tun:

—Ariñagabéi nun ka lan iráü buguya, anhein giñe anihein lubéi ubaraü lúbiñe búguchi le ñein lumuti gayara lan násügürüni áriebu hama nánigu.

24 Aba tóunabun:

—Liráü Betueli nuguya, le tiráü Milüká lau Naoru. 25 Ígiraguati ubaraü wábiñe lun básügürüni áriebu, anihein giñe sagadi luma éigini houn bilügüniña kameyu.

26 Ábati láhuduragun musu, aba leteingiruni Bungiu, 27 ariñaga ligía ítara:

—Biniwati Wabureme, le Lubungiute niyubudiri Abüraámü! Ladüga úarati ani areida ligía lun niyubudiri, ani adundeha láadina luagu üma lun hábiñoun liduheñu niyubudiri!

28 Aba tidin Rebeka éibaagueina túbiñoun túguchu, abahüdaguei sun le asuseredubei tun. 29 Ñeinñein aban tati gíriti Lawán, aba lidin éibaagueina lubadun fusu áluahei wügüri ligía, 30 ladüga ariha lumuti bagü luma bángüli le luagu tarüna litu, aganbaléi giñe tabahüdaguni le lariñagubei wügüri ligía tun. Aba liabin Lawán luagun lumusun Abüraámü ligía kei anihagua lan buga hau lilügüniña kameyu laru fusu, 31 lariñaga lun:

—Higabu, wügüri biní lumuti Bungiu. Ka uagu beredera bóugudi? Aranse naaru muna luma aban ubaraü houn bilügüniña kameyu.

32 Ábati lidin wügüri ligía múnadoun. Aba larariragüdüni Lawán hanügün kameyu, aba líchugun éigini houn, lárigiñe, aba lanügün duna lun wügüri ligía hau sun ha úarabaña luma lun hachibuni hagudi. 33 Dan le heseriwidun éigini houn, aba lariñagun, lumusun Abüraámü:

—Méiginbadina darime ariñaga naali le lunbei nariñaguni.

Lariñaga Lawán lun:

—Badimureha.

34 Aba lariñagun:

—Lumusun Abüraámü au. 35 Biní laali Bungiu niyubudiri saragu ani rísigüda laali giñe. Rúhali burí bágasu lun, pülata, golu, musu, kameyu hama burigü. 36 Garaüharu giñe Sara to lúmari aban wügüri irahü lau sun wéiyaaru lan, ígira láaliti niyubudiri sun lúmati lun liráü ligía. 37 Aba láfiñuragüdünina niyubudiri, lariñaga nun: "Mígirunbadibu lun lamarieidun niráü tuma aban würi yaana Kanán le ñein lubéi naganóua. 38 Lubaragiñe lira beiba hadoun liduheñu núguchi, báluahame lúmari hadan niduheñu". 39 Aba nariñagun lun: "Nabureme, ánhounmeti maha würi tuguya tiabin numa?" 40 Aba lóunabunina: "Éibugaadina lidan lémeri Bungiu, lóunahabei lóunagüle buma, lun buidu lan buéiyasun. Banügüba aban würi lun niráü lun lúmarime hádangiñe niduheñu ha liduheñu núguchi. 41 Ánhabugubeirügü ñüdün hábiñe niduheñu, hamaharame híchugunu irahü bun, ligíarügüba madurun ban luagu áfiñuruni le badügübei".

42 —Ítara liña lubeiti nachülürün uguñe laru fusu, aba nafurieidun lun Lubungiute niyubudiri Abüraámü, nariñaga: "Anhein inarüni lubéi luagu badügüba lan lun buidu lan nuéiyasun, 43 ayumuraguatina bun lun to lan irahü to ñǘbuintu adabura duna, to untu nariñaga: Adügabá fulesei nun, ruba murusun duna nun lídangiñe bidinan lun natun, 44 tariñagameti nun: Guraba, nadabura giñe lun hatun bilügüniña kameyu, lun tuguya lan würi to banúadiruboun lun lúmarime liráü niyubudiri". 45 Másugili yebe, nafurieidun, ligía narihin tiabin Rebeka tau aban dina tégewagu. Aba taragachun lidoun fusu adabura duna, aba nariñagun tun: "Adügabá fulesei nun, ruba murusun duna nun». 46 Aba tarariragüdünu tidinan, aba tariñagun nun: «Guraba, nadabura giñe haniñe bilügüniña kameyu". Aba tíchugun duna nun luma houn nilügüniña kameyu. 47 Lárigiñe aba nálügüdünu. Ka iráü buguya? Aba tóunabunina: "Liráü Betueli nuguya, le liráü Naoru tau Milüká". Ábati níchugun aban bagü luagu tígiri luma bián bángüli luagu tarüna; 48 aba náhuduragun eteingirei Bungiu, le Lubungiute niyubudiri Abüraámü luagu ladundehanina luéigiñe üma le úaraguabei, lun nanügünu liráü lamulen niyubudiri lun liráü. 49 Guentoti, ariñaga huméi nun anhein furangubadün lubéi luma niyubudiri, ánheinti madügün hubéi lubéi ítara, ariñaga huméi giñe nun, subudi náamugei kaba lan nadüga.

50 Ábati hóunabuni Lawán luma Betueli:

—Lúmagiñe Bungiu liabin sun le, siñati lubeiti wariñagun bun ni anha, ni uá. 51 Anuhán Rebeka; barüboun, beiba tau lúmari táamuga liráü biyubudiri, keisi laranseruni Bungiu.

52 Dan le laganbunbalin lumusun Abüraámü dimurei le, aba láhuduragun ligibugiñe Bungiu darí ladagarun lerebe múarugu. 53 Aba lasagarun saragu katei le lauti pülata luma golu, tuma daüguaü, aba líchuguni tun Rebeka. Edewehati giñe lun tati luma tun túguchu. 54 Lárigiñe aba leigin hau sun lupaanágu, gurá hagía, aba hásügürüni áriebu ñein. Larugan dan le hásaarun, aba lariñagun lubúein Abüraámü houn:

—Ígira humana lun nagiribudun lúbiñoun niyubudiri.

55 Aba tariñagun túguchu Rebeka luma tati lun:

—Rédeita Rebeka díisiraüya weyu wama, lárigiñeme, gayaraahalime tidin buma.

56 Lariñaga musu houn:

—Hebé heredehanina. Adügaali Bungiu lun buidu lan nuéiyasun, ígira humana lubeiti lun nagiribudun lúbiñoun niyubudiri.

57 Aba hóunabun:

—Waguara tun Rebeka, kaba lan tariñaga.

58 Aba hagúarun tun aba hálügüdünu:

—Busentibu bidin luma gürigia le?

Aba tóunabuniña:

—Anha.

59 Ábati hígirun lun tidin Rebeka, tuma giñe würi to óunigirubarun súnwandan, luma lumusun Abüraámü hau sun ha úarabaña luma. 60 Aba habinirunu Rebeka ítara:

«Wamulelua, háguchuba saragu míñunu!

Gañei haméi badügawagun haburugute háganiñu!»

61 Ábati tawarirun Rebeka hau tumusuniña hawagun kameyu, aba hafalaruni lumusun Abüraámü. Ítara liña lanügünu musu ligía Rebeka aba lidin ñéingiñe.

62 Lagiribuduña Isaakü luéigiñe fusu le gíribei «Wínwanti le aríagubei nun», kei lóubawagu lubéi Négebü laganawa. 63 Furihaliti buga ebeluha úara luma laguñeedun. Sódini larihin ayarafadeina hamá átiri kameyu. 64 Aba giñe tarihini Rebeka, dan le tarihinbalin Isaakü, aba tararirun luéigiñe kameyu. 65 Aba tálügüdüni musu:

—Katei san eyeri lite le ñǘbuinbei wawagun?

Aba lóunabunu:

—Niyubudiri.

Ábati tanügünu tubelun, aba tadouragun lau tigibu.

66 Aba labahüdaguni musu sun le ladügübei lun Isaakü. 67 Aba lanügünu Isaakü Rebeka tidoun tikianpun Sara to lúguchu, aba lamarieidun tuma. Aba tínsiñedun Rebeka lun Isaakü saragu, ítara liña lárügüdagun lungua lárigi tounwen lúguchu.