1 Ábati lariñagun Bungiu lun Moisesi:

—Nadüga lun ítara ban kei Bungiu ligibugiñe urúei, ladimurehame bíbugaña Aarón báugiñe. 2 Bariñageime sun le nariñagubei bun lun Aarón, ábameti ladimurehan Aarón lun urúei lun lígiragüdüniña Ísüraelina lun háfuridun Ehiptugiñe. 3 Gama lumoun nedereragüdüboun lanigi urúei, ábame nadügün saragu seini luma katei hanarimeburiti Ehiptu. 4 Madügünbei urúei gasu hau, gama lumoun narufudubei nubafu luagu Ehiptu, ábame nasagaruniña numutuniña hameme nisudaranigu ñéingiñe lau óunwenbu nubafu. 5 Lárigiñeme narufuduni nubafu luagu Ehiptu, saganáñame numutuniña ñéingiñe, ligíame hasubudiruni Ehiptuna luagu au lan Aburemeibei.

6 Aba hadügüni Moisesi luma Aarón sun katei keisi lariñaguni Bungiu houn. 7 Gádürü-wein irumu lau Moisesi, gádürü-wein-ǘrüwa lau Aarón dan le hadimurehanbei luma urúei.

8 Aba lariñagun Bungiu lun Moisesi luma Aarón:

9 —Anhein amuriaha urúei lun hadügün aban milaguru lun, bariñagame lun Aarón lun lanügüni lubadun, ábame láguruni múarugun ligibugiñe urúei, ábame lasaliragun héweme.

10 Aba houdin Moisesi luma Aarón lumoun urúei, aba hadügüni le lariñagubei Bungiu houn: Aba láguruni Aarón lubadun múarugun, aba lasaliragun héweme. 11 Aba lóunahan urúei hawagu lánigu ha chúbaña au hama ha garíaahadibaña, aba giñe hadügüni le ladügübei Aarón. 12 Kada aban hádangiñe aba láguruni lubadun múarugun, aba giñe lasaliragun héweme, gama lumoun aba léigini lubadun Aarón habadun lánigu urúei. 13 Lau sun lira aba tedererun lanigi urúei, aba madügün lan gasu hau, ítara kei lariñaguni Bungiu.

14 Lárigiñe, aba lariñagun Bungiu lun Moisesi:

—Deré lanigi urúei ani máhati lígiragüdüniña Ísüraelina. 15 Haruga binaafin, bídiba lumoun danme laragachun dúnahoun. Bagurabeime laru duna, barüinabeime bubadun búmagua le buga asaliragubei héweme. 16 Bariñagame lun ñein: "Wabureme le Habungiute Ebüréana, lóunahañadina ariñaga bun lun bígiragüdüniña lumutuniña lun houdin áhuduragua lun lidan fulasu mageirawati. Gama lumoun dagá lumoun dan le, madügüngidibu gasu. 17 Lariñahare lubeiti Bungiu: Guentó, basubudiraali luagu ligía lan Aburemeibei. Danme naguuruni duna lau badun le núhaburugubei, lasaliraguba duna hítaüme. 18 Ábame hóunwegun úduraü ha lídanbaña, ábame língidun duna saragu darime lun háhünedun Ehiptuna lun hátuni".

19 Ariñagati giñe Bungiu lun Moisesi:

—Ariñagabá lun Aarón lun lanügüni lubadun, liñureime lúhabu luagun sun duna chururunti, gürigü, lagunu luma sun katei le gálati duna lun lasaliragun sun duna le ñeinbei hítaüme. Ítara, ñeinbei hitaü íbini lidan lagei duna le lauti wewe luma le lauti dübü!

20 Aba hadügüni Moisesi luma Aarón le uágubei lariñaga Bungiu houn, aba liñuruni Aarón lubadun, aba laguuruni duna lau, ligibugiñe urúei hau sun ábutigu, aba lasaliragun duna hítaüme. 21 Aba hóunwegun úduraü, aba língidun duna saragu darí lun siñá lan hatun Ehiptuna duna lídangiñe. Ñeinñein hitaü lidan sun fulasu Ehiptu!

22 Gama lumoun aba giñe hadügüni garíaahatiña ha Ehiptuna ligiaméme, ábati tedererun lanigi urúei, aba madügün lan gasu lau Moisesi luma Aarón, kei buga lariñaguni Bungiu. 23 Aba lagiribudun urúei tidoun lani palasiu meberesenga lau katei le, 24 gásuti hachíahan Ehiptuna fusu laru duna lun hadaburun duna harumati, ladüga siñá hatun duna éibaaguati.

25 Sedü weyu lárigiñe láfaruni Bungiu lubadun dúnarugu,