1 Aba ladügüni Besaléli latarü le lánina adagaragüdüni gudawarügüti lau fulansu akasia. Aban lau limigifen luma lidabuberen, bián méturu wein-seingü sentimeturu luéigiñe kada louba, luma aban méturu wein-seingü sentimeturu liñun. 2 Lun gádürü larigei, adügati gádürü ganchu le ábanmemebei pisi luma latarü, ani afurarúati lau buronse. 3 Adüga lumuti giñe sun lumegegun latarü lau buronse, lagei baligi, chóbuli, kopu wéinamuti, fígiedu luma lagei leñegura watu. 4 Adügati giñe aban baríeiru lauti buronse, aba líchuguni lábugiñe laru latarü, lamidangua liñun. 5 Adügati giñe gádürü bángüli lun gádürü larigei ayarawaguni lauti buronse, lun lacharúniwa ebu lidoun. 6 Lárigiñe aba ladügüni ebu lau akasia lun latarü aba lafuraruni lau buronse, 7 aba ladouruni labadinaguagiñe bángüli le lóubawagubei latarü lun gayara lan lanügǘn. Hunrenti ladügüni latarü ani lauti giñe fulansu.

8 Aba ladügüni Besaléli ágeidinaü tau isubusei lautu buronse to hani würiña ha eseriwidubaña tubenari kianpu lánina óundaraguni, adüga lumuti giñe lebu lau buronse.

9 Aba layaraaguni Besaléli bürürü tau korutína. Luéigiñe louba suru, ñeinñein bián-wein-seingü méturu korutína tautu linu fínutu. 10 Lauti buronse wein tuágaburi luma wein tebu, tipinin luma tubagün lauti pülata. 11 Luéigiñe nórute, ñeinñoun korutína to bián-wein-seingü méturu timigifen lau wein tuágaburi luma wein ebu buronse, luma tipinin luma tubagün lauti pülata. 12 Luéigiñe oubaü le ñeinhin lubéi lálüda weyu, ñeinñoun wein-bián méturu dimí korutína lau diisi wagabu luma diisi ebu. Lipinin wagabu luma lubagün, lauti giñe pülata. 13 Luéigiñe oubaü le ñéingiñe lubéi láfuacha weyu, ñeinñoun wein bián méturu dimí korutína. 14 Lóubagiñe ebelaagülei, ñeinñoun sedü méturu korutína, lau ǘrüwa wagabu luma ǘrüwa ebu, 15 luéigiñe le aban louba ebelaagülei ligía, ñeinñoun sedü méturu korutína, ǘrüwa wagabu luma ǘrüwa ebu. 16 Sun korutína to geyeguboun lau bürürü tautu linu fínutu. 17 Lauti buronse lébudina wagabu, anhein lipinin luma lubagün lauti pülata, afurarúati burí wagabu íñugiñe libiti lau pülata. Sun luagaburi bürürü ñeinñein bagü pülata luagu.

18 Korutína to luáguboun lebelaagüle bürürü aborudahóuatu tuagu gamisa díngutu, gamisa koloru guchu, gamisa funatu tuma linu giñuriwatu. Nefu méturu timigifen, bián méturu wein-seingü sentimeturu tiñun, ítara kei likorutinan bürürü. 19 Gádürüñein tuágaburi lau gádürü lebu lauti buronse; lipinin luma lubagün lauti pülata, afurarúati wagabu lau pülata íñugiñe libiti. 20 Sun tupegin sanduariu luma bürürü le geyegubei tau, lauti buronse.

21 Lau lererun Moisesi, lábugiñe laríaahan Itamárü le liráü fádiri Aarón, abahüda hamuti lewitagu buronse, pülata, gürabu, luma golu le ayusurubei lidan tadügǘniwa sanduariu lánina daradu.

22 Adüga lumuti Besaléli le liráü Urí, libari Uru lídangiñe lani Hudá türibu sun le lariñagubei Bungiu lun Moisesi lun ladügüni. 23 Íderagua lumuti Oliabü le liráü Aisamákü, le lídangiñebei lani Dan türibu, le nadagimeinbei gürabu, adaagua ligía gamisa, aborudaha ligía gamisa díngutu, gamisa koloru guchu, gamisa funatu tuma linu fínutu.

24 Sun golu le ayusurubei lun ladügǘniwa sun le temegeirubei sanduariu, híchugun gürigia kei idewesei lun Bungiu, nefu-san-ǘrüwa-wein-seingü kilu luma darandi güramu, según lepesahóuniwa tidan sanduariu.

25 Pülata le oundarúbei hadan gürigia: Ǘrüwa-milu-ǘrüwa-san-disinéfu kilu seingü-san-wein-seingü güramu según lepesahóuniwa tidan sanduariu. 26 Sun ha abahüdǘbaña ha lóugiñeti wein irumu hau: Sísiñanu-san-ǘrüwa-milu-seingü-san-dimí gürigia, kada aban hádangiñe, ruti seingü güramu dimí pülata según lepesahóuniwa tidan sanduariu. 27 Ñeinñein giñe ǘrüwa-milu-ǘrüwa-san kilu pülata lun ladügǘniwa tebu sanduariu luma tebu belu. Luagu san ebu layusurúa sun pülata le, darandi ǘrüwa kilu pülata luagu kada ebu. 28 Lau pülata le oundarúbei hadan sun gürigia ladügei Besaléli lipinin wagabu, lidáü le íñugiñebei luma lubagün.

29 Buronse le edewehóubei lun Bungiu: Bián-milu-ǘrüwa-san-darandi-sisi kilu luma gádürü-san güramu, 30 lau buronse ligía ladügǘwa ebu lun tubenari kianpu lánina óundaruni, latarü le lauti buronse luma lani ayarawaguni lauti buronse, luma sun lumegegun latarü, 31 ebu burí giñe luma giñe luéwena bürürü le geyegubei tau sanduariu luma ebu lun lubenari bürürü.