1 —Lun badireiruni Aarón hama lirahüñü keisi nufadirinigu, anihán le lunbei badügüni houn: Barüba aban bágasu wügüri hama bián mudún wügüriña ha úati mégeiti hawagu; 2 badügame fein maganatu lébini tau tubuidun-agei fulúaru to añoundawagutu lau garaba, tuma furidasi maganatu lébini to hurúaguatu lau garaba, 3 bíchigounme lidoun aban liraüraü faniñe lun tanügǘn tidoun sanduariu, úara luma liraüraü bágasu hama bián mudún. 4 Banügeime Aarón hau lirahüñü luagun tubenari kianpu lánina óundaruni, badügame lun hagoun; 5 lárigiñeme ábame banügünu daüguaü to lánina afadirihani, ábame badaüraguagüdüni Aarón tau dúnigu, tuma tidáü épanu, luma tau épanu luma lidáü aniguagu. Bagüreime tubelitina épanu luagu; 6 badaüreime búnedu lábulugu, luáguti búnedu bíchigeime bürüti le ariñagubei: «Díreiwaali lun Bungiu». 7 Banügeime garaba lánina anúadiruni lun Bungiu, ábame bederegeruni Aarón keisi fádiri, lau béseruni garaba lábulugun. 8 Banügañame giñe lirahüñü, ábame badaüraguagüdüniña tau gounu. 9 Dandu Aarón kei lirahüñü, bagüreime habelitin hawagu, daübeime búnedu hawagu. Ítara luba bíchugun ubafu houn, ani ábanbei lúrudu le lunti sun dan hafadirihan.

10 —Lárigiñeme, ábame banügüni bágasu tidoun kianpu lánina óundaruni, lun líchugun Aarón hama lirahüñü háhabu lábulugu animaalu ligía, 11 ábame báfaruni bágasu ligía ñein ligibugiñe Bungiu, tubenari kianpu lánina óundaruni. 12 Banügame murusun lídangiñe lita bágasu ligía lau aban bifinga, ábame báhuruduni luagu lipinin latarü, le líbiri hitaü, ábame báturuni luagun lugudi latarü. 13 Bagidareime agülei le luágubei lisasa, lubana, lani riñón ábame báguduni luagu latarü, 14 ánheinti lǘgürügü, lura luma lídiga, bágudeime bóugudi tuéi kianpu, ladüga adagaragüdüni lan le luáguti figóu.

15 —Banügame aban hádangiñe bián mudún, ábame líchuguni Aarón hama lirahüñü háhabu lábulugu mudún ligía. 16 Lárigiñe, ábame báfaruni, ábame babahichaguni lita luagun latarü luma geyegua lau; 17 lárigiñe ábame bapiisihani, bachibeime lisasa luma lugudi, bíchigeime lidoun líbiri le bapiisihabei luma lábulugu. 18 Ábameti badagaragüdüni mudún luagu latarü lidan liri Bungiu, keisi idewesei gudawarügüti le buiti líhemen.

19 —Banügeimeti le aban mudún, líchigeime Aarón hama lirahüñü háhabu lábulugu. 20 Báfareime mudún, banügame murusun lídangiñe lita, bíchigeime ǘnabu libiti larigei Aarón le lóunwenren luma giñe ǘnabu libiti harigei lirahüñü le hóunwenren, luagu lúguchi háhabu le hóunwenren, luma luagu lúguchi hagudi le hóunwenren. Babahichagueime líbiri hitaü luagun latarü luma geyegua lau. 21 Banügame lídangiñe hitaü le luágubei latarü luma lídangiñe garaba lánina ederegeruni lun Bungiu, ábame babahichaguni luagun Aarón luma tuagun ladaüragun, luma hawagun lirahüñü luma giñe tuagun hadaüragun. Ítara luba badireiruni Aarón hama lirahüñü tuma giñe hadaüragun nun.

22 —Banügeime lagüle lili mudún, lagüle lisasa luma lagüle lubana, barübéime biángubei lani riñón lau agülei le luágubei, luma liyada le lóunwenren ladüga aban lan mudún le lunti heresibihan fádirigu. 23 Tídangiñe fein to maganatu lébini to lídanboun aban faniñe ligibugiñe Bungiu, banügame aban fein róunutu, aban to añoundawagutu lau garaba tuma aban furidasi; 24 bíchigounme súngubei lúhaburugun Aarón hama lirahüñü, ábame badügüni ayudeihani le lánina arufudúni liñúarü Bungiu. 25 Lárigiñeme ábame banügüni háhaburugugiñe, ábame báguduni luagu latarü úara luma adagaragüdüni gudawarügüti lun íhemeni buiti ligibugiñe Bungiu. Aban idewesei le agudúti lun Aburemei lira.

26 —Banügeime laniguagu mudún le lánina eresibihani, ábame badagaragüdüni nigibugiñe. Laniguaguba mudún ligía eredera bun. 27 Díreibei laniguagu mudún le arufudúbei kei idewesei buíduti, luma liyada mudún le edewehóubei kei ídemuei, ligíaba ichugúa lun Aarón hama lirahüñü, lídangiñe idewesei lánina eresibihani. 28 Lánibei Aarón hama lirahüñü lira. Aban lúrudu le lunti sun dan le houn Ísüraelina: Idewesei le, ábanbei ufanrani le híchugun Ísüraelina keisi aban adagaragüdüni luagu harandarun luma Wabureme.

29 —Halaganteboun lirahüñü Aarón ladaüragun to sagüráuboun, danme heresibihan keisi fádirigu. 30 Fádiri le liráü Aarón le árügüdüti lilugaarun, lun lebelurun tidoun kianpu lánina óundaruni, gasu luagu tan daüguaü tuguya lidan sedü weyu.

31 —Lárigiñeme banügeime mudún le lánina eresibihani, ábame bábouguni lidan aban fulasu sagüráuti. 32 Ábame léigini Aarón hama lirahüñü mudún ligía tuma fein lídangiñetu faniñe, tubenari kianpu lánina óundaruni. 33 Héigibei, ladüga lun ferudunawa lan hafigoun ladagarawagüdüwa dan le heresibihanbei keisi fádirigu. Méiginbei ni aban terencha lídangiñe katei le, ladüga sagüráuti. 34 Anhein ígiragua lídangiñe lubá le aban weyu, ábame báguduni, siñabei léigini ni aban, ladüga sagüráuti.

35 —Adügabéi sun le lau Aarón hama lirahüñü kei narufudahani bun. Barüba sedü weyu lun bíchugun ubafu houn, 36 ábame badagaragüdün aban bágasu wügüri sagü weyu keisi adagaragüdüni lun ferudunawa lan figóu; harumagüdabei latarü lau badagaragüdün luagu lun ferudunawa lan figóu, ábame báwiyurun garaba luagun lun badireiruni lun Bungiu. 37 Sédübei weyu badagaragüdün luagu latarü luagu figóu, ítara luba badireiruni lun Bungiu, ábame aban lan latarü le sándutimati: Furumiñeguarügü katei le adagaruti luagu lerederuba díreiwañu lun Bungiu.

38 —Gasu badagaragüdün bián mudún ha ábanti irumu hau, sagü weyu. 39 Badagaragüdame aban binaafin, aban rábounweyu. 40 Úara luma furumiñeti mudún, badagaragüdüba bián kilu tídangiñe tubuidun-agei fulúaru, to mígisiwatu lau aban líturu lagüle oliwu, ábame báwiyurun aban líturu diwéin keisi idewesei. 41 Ítara luba giñe badüga rábounweyu lau le aban mudún luma tau idewesei to fulúaru tuma diwéin, idewesei gudawati le buiti líhemen lun Bungiu. 42 Idewesei burí le agudahóubei nun, ligía le lunbei harufudahani agübürigu houn hasaanigu lun ladügǘniwa nun súnwandan, tubenari kianpu lánina óundaruni, le ñeinba lubéi nadunragua buma lun nayanuhan hun. 43 Ñeinba nadunragua hama Ísüraelina, ábame ladireirúniwa fulasu ligía luagu niñúarü. 44 Neresibiruboun kianpu lánina óundaruni luma latarü keisi katei le díreiwaali nun, neresibirubei giñe Aarón hau sun lirahüñü keisi fádirigu ha díreiwaaña nun. 45 Naganóuba hadan Ísüraelina, Auba Habungiute. 46 Ítara luba hasubudiruni luagu au lan Haburemebei, Bungiu le asagarubaliña Ehiptugiñe lun naganóun hadan: Au Aburemeibei le Hubungiute.