1 Lariñaga Moisesi:

—Mafiñenbaña nun, meberesen hagíame nau. Lubaragiñe lira, ariñagarügübaña nun: "Marufudagungili Bungiu lungua bun".

2 —Ka búhaburugubei? —liña lálügüdüni Bungiu.

—Aban badun, —liña lóunabun Moisesi.

3 —Fuibei múarugun, —liña Bungiu lun.

Aba lígiragüdüni Moisesi múarugun, lidan oura ligía, aba lasaliragun badun ligía héweme. Aba léibaagun Moisesi tuéi, 4 gama lumoun lariñaga Bungiu lun:

—Ragüboun luéigiñe tili.

Dan le lárügüdünu Moisesi, ábaya tasaliragun bádunme.

5 Lariñaga Bungiu lun:

—Anihán le lun hafiñerun bun luagu arufudaguaali lan Bungiu le Habungiute bagüchagu lungua bun, le Lubungiute Abüraámü, Isaakü luma Hakobu.

6 Lariñaga Bungiu lun:

—Guentó dabei búhabu búgalagoun. Aba ládaruni Moisesi lúhabu lúgalagoun, dan le lasagarunbalin, sándihali lúhabu lau guméi mareidaguaditi haruti kei mouru.

7 Ábati lariñagun Bungiu lun:

—Dayabéi búhabu búgalagoun, ábaya ládaruni Moisesi, dan le lasagarunbalin areidaguaali kei sun lúgubu.

8 Lárigiñe, aba lariñagun Bungiu lun:

—Ánhaña mafiñerun bun lau furumiñeti seini, hafiñeruba lau libiaman; 9 gama lumoun ánhaña mafiñerun, meberesen hagíame bau lau ni aban lídangiñe bián seini le, ábame badaburun duna dúnarugugiñe, ábame báwiyuruni múarugun, keime ladagarun múarugun, ítara luba lasaliragun hítaüme.

10 Aba lariñagun Moisesi:

—Nabureme, au mariñagaditinatia buidu, ani mama luagu badimurehan nun nadagadagahanbei ítaragubeiñadina. Sagü nadimurehan nadagadagahan.

11 Lariñaga Bungiu lun:

—Kagia adügübalin hayuma gürigia? Ma au adügübei lun mariñagadi lan, o maganbadi lan, o marihin lan o gayara lan larihin? 12 Beiba lubeiti, búmabadina danme le badimurehan, narufudubei bun kaba lan bariñaga.

13 Lariñagameme Moisesi:

—Nabureme, adügabéi fulesei ligía nun, óunahaba amu gürigia!

14 Ábati lagañidun Bungiu lun Moisesi aba lariñagun lun:

—Anihein bíbiri Aarón le lewita! Subudi numuti luagu gariñagadi lan buidu buidu. Ani anitén bubaroun ani wéiribei lugundan lau larihinibu. 15 Badimureha luma, ariñagabéi sun le lunbei lariñaguni lun urúei; au, ñéinbadina huma danme le hadimurehan, narufudahabei hun kaba lan hadüga. 16 Badimurehaba lun Aarón kamá hamuga au adimurehabei lun, ábame láguyuguagüdüni Aarón le bariñagubei lun houn gürigia. 17 Barübei badun le búmagua, ladüga badügüba burí katei wéirigubuti lau.

18 Aba lagiribudun Moisesi lúbiñoun Heturó le límedamuru, aba lariñagun lun:

—Gasu nagiribudun Ehiptun le ñein habéi nirasan. Busentina narihin anhein wínwangiña lubéi.

Lariñaga Heturó lun:

—Beiba, buidu láamuga buéiyasun.

19 Dan buga anihagua lan Moisesi lidan ubóu le gíribei Madián, ariñagati Bungiu lun:

—Giribubá Ehiptun, ladüga hilagua sun buga ha abusenrubaña háfarunibu.

20 Ábati lanügünu Moisesi lúmari luma liráü, aba lagiribudun Ehiptun. Barüina liñalin badun le arufudubalin lubafu Bungiu lúhaburugu. 21 Lárigiñe aba lariñagun Bungiu lun Moisesi:

—Danme bachülürün Ehiptu, badügeime sun burí katei wéiriguti le uágubei níchiga ubafu bun lun badügüni ligibugiñe urúei. Nedereragüdüboun lanigi lun mígiragüdün lániña Ísüraelina. 22 Ábameti bariñagun lun urúei: "Lariñahare Bungiu: Ísüraelina nirahüñü ha hínsiñetimabaña nun. 23 Ariñagaadina bun lun bígiragüdüniña nirahüñü, lun houdin áhuduragua nun, gama lumoun kei maha ban bígiragüdüniña, náfaraali bígirama hilagubei".

24 Ǘmada yebe, lidan fulasu le ñeinba lubéi lásügürei Moisesi áriebu hau liduheñu, aba liabin Bungiu lubaroun Moisesi aba labusenrun yebe láfaruni hilagubei. 25 Ábati tanügün Séfora aban gusiñu lautu dübü, aba tíchugun seini tuagu lóustarun tiráü; lárigiñe aba taguuruni lugudi Moisesi lau uraü ligía, aba tariñagun:

—Aban úmari le lánina hitaü buguya nun le tímatimaati.

26 Ábati lígiruni Bungiu Moisesi lun lidin. Aba tariñagun Séfora luagu aban lan úmari le lánina hitaü Moisesi, ladüga seini tuagu óustaruni.

27 Ariñagaalimeti buga Bungiu lun Aarón:

—Beiba lidan fulasu mageirawati adunragua luma Moisesi.

Ábati lidin Aarón adunragua luma Moisesi luagu luwübüri Bungiu. Aba labusurun lun ñein lau aban chuti. 28 Ábati labahüdaguni Moisesi lun Aarón sun katei le uágubei lariñaga Bungiu lun lariñaguni, luma sun lanarime katei le lunbei ladügüni. 29 Aba houdin biángubei hagía óundaraña ábutigu ha Ísüraelina, 30 aba lariñaguni Aarón sun katei le lariñagubei Bungiu lun Moisesi houn, adügaléi sun luéinamun katei le uágubei lariñaga Bungiu lun, lun ladügüni hagibugiñe.

31 Aba hafiñerun gürigia. Ani dan hasubudiruni luagu berese lan Bungiu hau, ani luagu ariha laali lan ida liña lan hasufurirun, aba háhuduragun alawahei.