1 Adimurehati Bungiu lun Moisesi luma Aarón Ehiptu, lariñaga houn:

2 «Hati le, ligíaba furumiñeti lidan irumu hun. 3 Ariñaga humá houn sun Ísüraelina: Weyu diisi lidan hati le, lunti lanügün kada aban hídangiñe aban mudún o aban lan liraüraü gábara, aban hawagu kada iduheñu, aban tuagu kada muna. 4 Ánheinti mibe habéi tidan aban muna lun héigini sun animaalu ligía, ábame léigini tabureme muna luma lubesinan le yarafatimabei lun, hafanreinragueime según hibe gürigia, luma le liyaraati kada aban eiga. 5 Lunti ábanbei lan irumu lau animaalu ligía, lunti giñe ábanbei lan wügüri animaalu le úati mégeiti luagu, gayaraati aban lan mudún o aban lan liraüraü gábara. 6 Hareidubei darí katorusu lidan hati le, wéyume ligía, sun gürigia Ísüraeli, ábame háfaruni animaalu ligía rábounweyu. 7 Ábame hanügüni lita animaalu ligía, háhurudagueime luagu lumarukun tubenari muna to ñeinba lubéi heigei animaalu ligía. 8 Guñoun ligía, héigeime lǘgürügü animaalu ligía ásürahouarügü, lau híduru gífiti tuma fein to maganatu lébini. 9 Meiga humá ni murusun lídangiñe íñeuga, ni le áhurahati. Sun animaalu ligía dandu lábulugu kei lugudi luma sun le lurageirugubei, gasu ásürahouarügü lan, 10 mígirunbadün giñe lídangiñe luba le aban weyu, le erederuti lídangiñe, ábame háguduni. 11 Sánsiguñu humá aranseñu lubá wéiyaasu, daüñu humounme higeidin, anihame hubadun húhaburugu, ábame furese lan héigini animaalu ligía, ladüga uguñe lan luéyuribei nesefurunün lídangiñe amudirawaguni. 12 Áriebu ligía, násügürüba lídangiñe sun Ehiptu, ábame náfaraguniña sun ígiramaügu hadan kada haduheñu Ehiptuna, hama sun furumiñetiña hadan harahüñü habiñanigu, ábame nasiadiruniña sun lubungiutegu Ehiptu. Au le Aburemei ariñagubalin.

13 "Leseriwiduba hitaü hun lun harufudunu muna to ñein humuti. Ítara luba, danme náfaraguniña Ehiptuna, le ñein lumuti nariha hitaü luagu bena, sügürügübadina dísegiñe. 14 Weyu le, lunti haritagun luagun, lunti giñe hadügün óunwenbu fedu, luagu linebese Habureme. Ábanbei lúrudu le hun lun hefeduhani fedu le lun súnwandan, le lunti lásügürün hámagiñe agübürigu hamoun isaanigu. 15 Héigiba fein maganatu lébini sedü weyu; lúmagiñe lubeiti furumiñe lidan hati ligía, úabei lébini húbiñe. Furumiñeguarügü le éigiti fein gaganatu lébini lidan sedü weyu ligía, lagidarúba hádangiñe Ísüraelina. 16 Lídanme furumiñeti luma lisedün weyu, lunti hadügün aban óundaraguni le sánduti lau lueirin inebesei laganagua. Mawadigimaribadün lidan weyu ligía, luéidigia hábougun heigin. 17 Gasu hefeduhani tufedun fein maganatu lébini, ladüga ligía weyu nasagarunün Ehiptugiñe sun huguya. Hanügübei kei aban lúrudu magumuchaguaditi, lásügürüba hámagiñe agübürigu lun hamoun isaanigu. 18 Héigiba fein maganatu lébini lúmagiñe katorusu lidan furumiñeti hati rábounweyu, darí wein aban lidan hatiméme ligía. 19 Sédübei weyu lun ua lan lébini húbiñe, furumiñeguarügü le éigiti fein gaganatu lébini, lagidarúba hádangiñe Ísüraelina, terencha mama terencha. 20 "Meiga humá lubeiti ni kata gaganati lébini. Le ñein lumuti haganawa, lunti heigin fein maganatu lébini" ».

21 Aba lóunahan Moisesi hawagu sun wéiyaaña mutu Ísüraelina, lariñaga houn:

—Ragǘ humá aban mudún o aban lan liraüraü gábara houn hiduheñu háfareime, lun hefeduhani luéyuri hesefurun lídangiñe amudirawaguni. 22 Hígireime lita animaalu ligía lidan aban ágeidinaü: Lárigiñeme, ábame hanügün aban güraguati lilimun isopu, hadüdüragüdeime lidan hitaü ligía, ábame háhurudaguni sun laru tubenari huban lau. Moun lumuti láfuridun ni aban lúbiñegiñe lubaragiñe larugadun. 23 Danme lásügürün Bungiu lun láfaraguniña Ehiptuna, larihubei hitaü luagu sun laru hubenari, ábame lásügürün tau muna tuguya. Mígirunbei Bungiu lun lebelurun le gagünrinchaguadibei húbiñoun. 24 Linebeduba gumadi le hun luma houn hadügawagun, keisi aban lúrudu magumuchaditi. 25 Danme beluhadün lidoun aüdü le lunbei líchuguni Bungiu hun, keisi lariñaguni, lunti hasigirun efeduhei Luéyuri Esefuruni lídangiñe amudirawaguni. 26 Dánmeti hálügüdünün hisaanigu ka lan mini lan fedu le, 27 hariñagame houn: "Afarúati animaalu le lidan Luéyuri Esefuruni lidan liri Bungiu Dan le láfaragunbaliña Ehiptuna, sügürügüti tau haban Ísüraelina ha meha aganóubaña Ehiptu, ítara liña lesefuruniña waduheñu".

Ábati habuluchagun Ísüraelina, 28 lárigiñe aba houdin, aba hadügüni sun katei keisi lariñaguni Moisesi luma Aarón houn.

29 Amidi áriebu, aba láfaraguniña Bungiu hágiramagu kada iduheñu Ehiptuna hilagubei, dandu lígirama urúei le añuurubei luagu lálana arúeihani, kei lígirama le adaürǘbei furisunrugu, hama giñe hágiramagu animaalugu. 30 Aba lásaarun urúei áriebu hau sun lánigu hama sun Ehiptuna, aba ñein lan burí óunwenbu agúarahani lau igarigu lidan sun Ehiptu. Úatu ni aban muna to ñein lumuti ua lan hilaali. 31 Áriebumeme ligía, aba lóunahan urúei luagu Moisesi luma Aarón, lariñaga houn:

—Heiba, dise humá hawéi numutuniña, huguya hau sun Ísüraelina. Heiba áhuduragua lun Bungiu, ítara kei hariñaguni. 32 Barǘ humaña giñe hilügüniña mudún, bágasu, heiba. Ayumuragua humá giñe lun Bungiu nuagu.

33 Aba hóufudahaniña Ehiptuna Ísüraelina lun háfuridun hageiragiñe furese, ladüga haritagun luagu hóunwegua lan sun hagía. 34 Aba hanügünu Ísüraelina fulúaru maganatu lébini to hañoundaguboun lidan dabarasi aba hóuburagunu tidan hadaüragun, aba híchugunu hégewagu. 35 Aba giñe hamuriahan ílagu le golu luma pülata, tuma daüguaü hámagiñe Ehiptuna, kei lariñaguni Moisesi houn. 36 Aba ladügün Bungiu lun híchuguni Ehiptuna sun le hamuriahabei Ísüraelina hama houn, ítara liña hagidaruni Ísüraelina hámati Ehiptuna hawéi mafosurunga hamaña.

37 Aba háfuridun Ísüraelina Ramüsésigiñe lun Sukotun. Hawara sisi-san milu wügüriña ha gayaraahali hasudarahan, mabahüdünga würiña hama irahüñü. 38 Ñǘdüntiña saragu hawuyerigu gürigia hama, bóugudin hawéi saragu mudún hama bágasu. 39 Keiti buga madaani habéi lun haranserun heigin ladüga habugaguniña Ehiptuna hageiragiñe, aba hadügün fein maganatu lébini tau fulúaru ñóunwaguaaru to buga hasagaruboun Ehiptugiñe.

40 Gádürüñein-san-darandi irumu hau Ísüraelina aganawa Ehiptu, 41 weyu le lagunfulirun gádürü-san-darandi irumu, ligía háfuridun sun lumutuniña Bungiu Ehiptugiñe. 42 Áriebu ligía aranseñu liña Bungiu lun lasagaruniña Ehiptugiñe. Ligía láriebutebei Bungiu, áriebu le giñe lunbei hareiduni Ísüraelina luagu linebese, inebanfangu hárigi inebanfangu.

43 Lariñaga Bungiu lun Moisesi luma Aarón:

—Anihán lúrudu luáguti Luéyuri Esefuruni: Méiginbei ni aban terencha lidan animaalu le adagaragüdüwabei, 44 ánheinti idamuni le agañeihóuarügüti lau seinsu, gayaraabei leigin lídangiñe, anhein ibiha lubalin seini tuagu lóustarun. 45 Siñabei leigin ni aban terencha ni le éibudügüti, ni le nadagimeinti luagu fáyeiti lídangiñe animaalu ligía, 46 le lúntibei leiginiwa tidan ábanrügü muna. Masagarúnwabei ni murusun úi lídangiñe animaalu ligía múnadagiñe, máhalachawagunbei giñe labu. 47 Sun Ísüraelina hagíaba adügei katei le. 48 Gama lumoun anhein ñein aban terencha aganawa huma, ani busenti lefeduhani Luéyuri Esefuruni lidan linebese Bungiu, furumiñe, gasu hibihini sun wügüriña ha hádanbaña liduheñu seini tuagu hóustarun, lárigiñeme, gayaraahalime lefeduhani Luéyuri Esefuruni, ítarahalime kei ha águrahoubaña fulasurugu. Gama lumoun siñabei leigin ni aban le mibihin lágili seini tuagu lóustarun lídangiñe animaalu ligía. 49 Ábanmemeba lúrudu houn ha águrahoutiña fulasurugu kei houn terencha ha aganóubaña haganagua.

50 Aba hadügüni Ísüraelina sun katei, keisi buga lariñaguni Bungiu lun Moisesi luma Aarón. 51 Lídanmeme weyu ligía, aba lasagaruniña Bungiu Ísüraelina Ehiptugiñe.