1 Lariñaga Bungiu lun Moisesi:

—Wariba luma Aarón, Nadabü luma Abiu, hama ǘrüwa-wein-diisi hádangiñe wéiyaaña mutu Ísüraelina lidoun fulasu le ñein nubéi, herederame díseraü, ábame háhuduragun ñein. 2 Buguyarügübei gayara bayarafadun nun; ha híbiri mayarafadunbaña, mamudeirun hagíame gürigia buma.

3 Aba lidin Moisesi, aba labahüdaguni le lariñagubei Bungiu lun houn gürigia, aba hóunabun súngubei:

—Wadügübei sun le lariñagubei Wabureme!

4 Ábati labürühani Moisesi sun le lariñagubei Wabureme lun, larugan aba lásaarun binaafingiua, aba ladügün aban latarü lugudina wübü, aba líchugun duusu dübü sagüráuti luagun, aban hawagu kada aban lani Ísüraeli türibu. 5 Lárigiñe, aba lóunahan fiu nibureinhaña Ísüraelina lun háfarun átiri bágasu wügüriña lun hadagaragüdüniña kei adagaragüdüni luáguti arandaruni. 6 Aba lanügün Moisesi lamidan hata bágasu hagía aba líchuguni lidoun burí kopu wéinamuti, le líbiri aba labahichaguni luagun latarü. 7 Lárigiñe, aba lanügünu líburu to lánina daradu, aba laliihanu houn gürigia, aba hariñagun:

—Wíchaaguba woungua lun wadügüni sun le ariñaga láalibei Wabureme.

8 Ábati lanügüni Moisesi hitaü, aba labahichaguni hawagun gürigia, lariñaga:

—Anihán hitaü le añuuragüdübalin daradu le ladügübei Wabureme huma, danbei líchuguni sun gumadi le.

9 Aba lawarirun Moisesi luagun wübü luma Aarón, Nadabü, Abiú hama ǘrüwa-wein-diisi wéiyaaña mutu Ísüraelina. 10 Ñein harihei Lubungiute Ísüraeli: Lábugiñe lugudi, ñeinñein aban katei miriti kei safiru, harugoungati kei sielu guánarügü. 11 Madügünti Bungiu damichi houn wügüriña wéirigutiña Ísüraelina ha, ha arihubalin Bungiu, lárigiñe aba heigin ani gurá hagía.

12 Lariñaga Bungiu lun Moisesi:

—Wariba luagun wübü le ñein nubéi, bagurabaname ñein, níchigaali dübü fadati le ñein lubéi bürüwañu lan lúrudu luma gumadi le nabürühabei, lun barufudahani houn Ísüraelina.

13 Aba lásaarun Moisesi, aba lawarirun luagun luwübüri Bungiu ligía luma Hosué le íderagubalin. 14 Lariñaga houn wéiyaaña mutu:

—Aguraba humawa lidan fulasu le, darí wagiribudun. Lerederuba Aarón luma Uru huma ya, anhein ñein somu katei uáguti labusenrun aban hídangiñe lálügüdahan, lídinme hamoun.

15 Lárigiñe lariñaguni Moisesi katei le, aba lawarirun luagun wübü, aba ladouragun aban dúeri lau wübü ligía. 16 Aba liabin luéirigun Bungiu luagun wübü le Sinaí, aba lerederun dúeri ligía darugu lau wübü ligía sisi weyu. Luagu lisedün weyu, aba lagúarun Bungiu lun Moisesi lídangiñe dúeri. 17 Aba harihini Ísüraelina luéirigun Bungiu kamá aban watu gemeti le gagumuchaditi lau sun katei, luagu liñun-agei libiti wübü. 18 Aba lebelurun Moisesi lidoun dúeri, aba lawarirun luagun wübü, aba lerederun ñein bián wein weyu luma bián wein áriebu.