1 Aba lariñagun Bungiu lun Moisesi:

—Beiba yáagiñe hau gürigia ha basagarubaña Ehiptugiñe. Heiba lidoun fulasu le füramase nubéi lun Abüraámü, Isaakü luma Hakobu luagu níchugubei lan houn hadügawagun. 2 Nóunahabei nani ánheli lun ladundehanibu, nabugubaña Kananna, Amoruna, Étüna, Féresüna, Eweuna hama Hebusuna fulasurugugiñe. 3 Heiba lidoun fulasu rísiti ani buiti lun ábunaguni. Gama lumoun mídinbadina huma luéi nagünrinchagunün luagu üma, ladüga gürigia deré taganbun huguya.

4 Aba hírudagun Ísüraelina lau haganbuni dimurei burí dereti le, aba ua lan ni aban adaürüti lumegen lauti golu, 5 lugundun ariñagaali buga Bungiu lun Moisesi:

—Ariñagabá houn Ísüraelina: «Gürigia deré taganbun huguya le, ánhana hamuga eredera haganagua luagu murusun dan, nagünrinchaguñadün hamuga! Gidá huméi humegen lauti golu huáriua guentó, ábameti narihin kaba lan nadüga hau».

6 Lárigiñe lubeiti hígiruni wübü Orebü, aba mayusuhaña lan Ísüraelina umegeni lauti golu.

7 Aba lanügünu Moisesi kianpu aba líchugunu dise bóugudi tuéi kianpu-agei, aba lagúarun tun kianpu lánina óundaraguni luma Bungiu. Danti le anihein lan abusenruti lálügüdahan somu katei luma Bungiu, aba lidin tidoun kianpu to bóugudiboun tuéi kianpu-agei. 8 Dánhati le lidin Moisesi tidoun kianpu lánina óundaruni to buga líchuguboun Moisesi bóugudi tuéi kianpu-agei, sun gürigia aba hásaarun, aba herederun rara tubenari hakianpun, aríagueina lárigi Moisesi darí lun lebelurun tidoun kianpu lánina óundaruni luma Bungiu. 9 Dan lebelurun Moisesi tidoun, aba lararirun dúeri le lánina liñúarü Bungiu aba lararamun tubenari kianpu lánina óundaruni sun anihán lan Bungiu adimureha luma Moisesi. 10 Danha le harihin gürigia lerederagun dúeri tubenari kianpu, aba láhuduragun kada aban tubenari likianpun lau inebesei.

11 Ábaha ladimurehan Bungiu luma Moisesi gagibugu, kei ladimurehan aban gürigia luma lumada, lárigiñe, ábaha lagiribudun Moisesi tidoun kianpu-agei. Gama lumoun súnwandan turageiruguñein lan kianpu-agei Hosué, liráü Nun, le íderagubalin Moisesi.

12 Lariñaga Moisesi lun Bungiu:

—Ariñagatibu nun lun nadundehaniña gürigia ha, gama lumoun mariñaguntibu nun kaba lan bóunaha numa. Ariñagatibu giñe luagu weiri lan bafiñen nuagu, luagu giñe gañei naali lan bufulesein. 13 Ánheinti ítara liña lubéi, subudigüdabei baransehan nun, gayara láamuga nemenigidun buagu, gayara ligíame nasigirun eseriwidabu númameme láamuga bufulesein. Haritaguabatia luagu bánigu lan mutu ha.

14 Lariñaga Bungiu lun:

—Au guánarügüba ñüdün buma ábame nemeraaguagüdünibu.

15 Lariñaga Moisesi lun:

—Ánheintia mídinbadibu lubéi wama, masagarabáwatia yáagiñe. 16 Lugundun ánhabu midin wama, ida lubagia lasubudirúnia luagu anihein lan bufulesein numa labu hama bánigu? Ítararügüñein gayara lan wasubudirúniwa hawéi híbiri gürigia au hama bánigu.

17 Lariñaga Bungiu lun:

—Nadügübei giñe le uágubei bariñaga, lugundun hemenigitina buagu, ani gañei baali nufulesein.

18 Aba layumuragun Moisesi, lariñaga:

—Arihagüdabei buéirigun nun.

19 Lariñaga Bungiu lun:

—Násügüragüdaali sun nareini bigibugiñe, ábame níriduni niri bigibugiñe. Gudemehabubadina lun le unti nabusenra, sandi aume ihürügu lau le unti nabusenra.

20 Gama lumoun furangutina bun luagu siñabei lan barihini nigibu, lugundun úati wügüri lun gayara lan larihini nigibu lun lasigirun abagarida.

21 Ariñagati giñe Bungiu lun:

—Anihán aban ubaraü ya nubadu. Ráramaba ligibuagu dübü. 22 Danme le násügürün lau nuéirigun, ábame níchugunibu lidoun aban luhuyun dübü, ábame nadouragun bau lau núhabu darí násügürün. 23 Lárigiñeme, ábame nagidaruni núhabu, ábame gayara lan barihini nanagan, ánheinti nigibu moun lumuti larihíniwa.