1 Aba lóundaruniña Moisesi sun Ísüraelina, aba lariñagun houn:

—Rúhali Bungiu dimurei nun lun ladügǘniwa katei le. 2 Gayaraabei luadigimariniwa sisi weyu lidan dimaasu, gama lumoun lisedün weyu, ábanbei weyu sagüráuti hun, lunti hemeraaguni sunsuinagubei lidan liri Bungiu. Furumiñeguarügü le awadigimariduti lidan weyu ligía, lasiadirúba lun lounwen. 3 Furumiñeguarügü fulasu le ñein lumuti haganawa, moun lumuti ni íbini lun háfuragun watu lidan luéyuri emeraaguni.

4 Aba lariñagun Moisesi houn sun Ísüraelina:

—Anihán le lariñagubei Bungiu lun ladügǘniwa: 5 Óundaragua humá aban idewesei hídangua lun Bungiu. Sun ha busentiña híchuguni hadewese lun Bungiu lau hagundan, tau sun hanigi, lunti hanügün golu, pülata, buronse, 6 gamisa díngutu, gamisa koloru guchu, gamisa funatu, linu fínutu, liyu gábara, 7 lura mudún le féindiwati lau funati, uraü fínuti, wewe le akasia, 8 gasi lun lanpu, ibiñein lun garaba le lunti ederegeruni luma lun kupali hémeti, 9 dübü le wéndeti luma amu burí dübü fínuti lun lichugún tuagu épanu luma tun lidáü laniguagu fádiri le íñutimabei.

10 —Sun ha gadiñeburibaña, lunti hayabin lun hadügüni wadagimanu le uágubei lariñaga Bungiu: 11 Sanduariu tau tikianpun, tidáü kianpu, tiganchun, tufulansun, wewe le tanaaha, tuágaburi, tebu, 12 bágüsi lau índanu luma tidáü, belu to adouraguboun tau, 13 dábula lau burí lani índanu luma sun le ayusurúbei luagu, fein to deregewaboun lun Bungiu, 14 lebu sanudelu lau sun le ayusurúbei luagu luma burí lilanpun, gasi lun lanpu 15 latarü le lani kupali luma burí lani índanu, garaba lánina ederegeruni, kupali hémeti, korutína lun tubenari sanduariu, 16 latarü le lunti adagaragüdüni gudawarügüti lau layaraawagun le lauti buronse, lani índanu luma sun le ayusurúbei luagu, ágeidinaü lau lebu, 17 korutína burí lun bürürü, lau tuágaburi luma tebu, korutína lun lubenari bürürü, 18 pegi burí lun tagürahóuniwa sanduariu, luma pegi lun bürürü le ñein lubéi tagürahóua kianpu, lau burí lugurudunina, 19 daüguaü hüchawatu lun ladügǘn kultu tidan sanduariu, ladaüragun Aarón to sagüráuboun tuma hadaüragun lirahüñü to lánina hafadirihan.

20 Aba hayouragun sun Ísüraelina lun Moisesi, 21 lárigiñe, sun ha asandirubaña ugundani tidan hanigi lun hídehan, aba hagiribudun lau idewesei lun Bungiu, lun tadügǘniwa kianpu lánina óundaruni lau sun le temegeirubei, tuma giñe daüguaü to buíduburitu lánina afadirihani. 22 Ñǘbuintiña wügüriña hama würiña, sun hagía barütiña lau ugundani tau sun hanigi, bagü, bángüli, luma sun luwuyeri burí katei lauti golu. Barǘ hamuti kada aban hádangiñe idewesei golu le buga ru hamaalibei lun Wabureme. 23 Ha gámatiña gamisa díngutu, gamisa koloru guchu tuma gamisa funatu, linu fínutu, liyu gábara, lura mudún le féindiwati lau funati o uraü le fínuti, aba burí híchuguni. 24 Ha íchugutiña idewesei le pülata o buronse, aban burí hanügüni ligibugiñoun Bungiu; hati gawewentiña le akasia, aba hanügüni lun leseriwidun lidan tadügün sanduariu. 25 Aba burí híchugun würiña ha gadügadibaña gamisa lau háhabu, gamisa díngutu, gamisa koloru guchu tuma linu fínutu, 26 würiña ha gayaraabaña ha busenbaña hadügüni, arurahatiña liyu gábara lun giñe híchugun hadewese. 27 Ha ábutigu aba hanügün burí dübü wéndeti luma burí amu dübü fínuti lun lichugúniwa tuagu épanu luma tuagu lidáü aniguagu to lani fádiri le íñutimabei, 28 barütiña giñe ibiñein luma gasi lun lanpu, lun garaba lun ederegeruni luma lun kupali hémeti.

29 Sun wügüriña hama würiña Ísüraelina ha gagundanbaña lun hídehan, lun ladügǘniwa le uágubei lariñaga Bungiu lun Moisesi, barǘ hamuti hadewese lun Bungiu.

30 Aba lariñagun Moisesi houn Ísüraelina:

—Hádangiñe lani Hudá türibu, anúadaha laali Bungiu Besaléli le liráü Urí, libari Uru, 31 buíngüda laali lau lani Bungiu sífiri, lichú aau, gunfurandaü, subudi luma ubafu, 32 lun ladaagun wadagimanu lau golu, pülata luma buronse 33 lun laransehan dübü buíduburiti lun larihíniwa buidu luma lun luadigimaridun furumiñeguarügü wewe arihúa láamuga giñe wéndeñu. 34 Rúhali giñe ubafu lun Besaléli lun larufudahan luma lun Oliabü le liráü Aisamákü, le lídangiñebei lani Dan türibu, 35 buíngüda naaña lau ubafu lun hadügün furumiñeguarügü wadagimanu le adibuhóuti o le lan adügǘti lau wewe, luma le aborudahóuti tuagu gamisa díngutu, gamisa koloru guchu, gamisa funatu, tuma linu fínutu, luma lun háhüchün furumiñeguarügü wadagimanu wéndeti.