1 Lariñaga Bungiu lun Moisesi:

—Beiba arihei urúei, adügaadina lun tedererun lanigi, ligía hau sun lánigu, lun narufuduni óunwenbu burí katei le niyaraabei adüga, 2 lun babahüdaguni houn birahüñü luma houn bibañan, ida liña lan nadügün bula hau Ehiptuna, luma óunwenbu burí katei le nadügübei hadan. Ítara luba hasubudiruni luagu au lan Aburemeibei.

3 Aba lidin Moisesi luma Aarón lumoun urúei, aba hariñagun lun:

—Ítara liña lariñagun Wabureme, le Habungiute Ebüréana: "Darí san ídaba bíchaagua bungua ǘnabu nigibugiñe? Ígiragüdabaña numutuniña lun houdin áhuduragua nun; 4 ánhaña mígiragüdün ban, nadügüba lun hayabin chagagaru bageiroun haruga, 5 gíbebaña, darime lun hadouragun lau múa. Héigibei le erederubei lárigi huya dereguati, luma sun tídibu wewe le áraabubei. 6 Habuinchuba tidan buban luma tidan haban bánigu, luma tidan haban sun Ehiptuna. Ábanbei katei le meha marihin hamagilibei bagübürigu, ni bárugutigu lúmagiñe hadaani lumoun wadaani!"

Lásurun ladimurehan Moisesi, aba lagararaagun, aba láfuridun palasiurugugiñe. 7 Ábati hariñagun lánigu urúei lun:

—Ídaba san lagumucha líchugun wügüri le turobuli woun? Ígiraba lun houdin áhuduragua lun Habungiute le Aburemei. Marihin lumuti san warúeite luagu gádeihali lan Ehiptu?

8 Ábaya lóunahan urúei luagu Moisesi luma Aarón, lariñaga houn:

—Heiba áhuduragua lun Hubungiute, gama lumoun ariñaga huméi nun kátañaba lan ñüdün.

9 Aba lóunabun Moisesi:

—Gasu woudin hau wéiyaaña mutu, wasaanigu, wabiñanigu, ladüga ábanbei óunwenbu fedu woun, le lunbei wadügüni lun Bungiu.

10 Lariñaga urúei houn:

—Furanguti larihíniwa luriban haritagun! Haritaguatün luagu lídiba lan Bungiu huma, ani luagu nígiruba lan lun hidin hau sun hisaanigu? 11 Mama luba. Heiba, huguya wügüriña wéinamuhaña, lun háhuduragun lun Bungiu, kei ligía lubéi habusenrubei.

Aba lariñagun urúei lun habugawagun liñúarürugugiñe. 12 Lariñaga Bungiu lun Moisesi:

—Iñurabéi búhabu lóugiñe Ehiptu, lun hayabin chagagaru lun hagumuchuni sun nadü le Ehiptubei, luma sun le erederubei lárigi huya dereguati.

13 Aba liñuruni Moisesi lúhabu luagun Ehiptu, aba láfuragüdün Bungiu aban garabali luéigiñe oubaü le ñéingiñe lubéi laboucha weyu, ábati láfuragun garabali aban weyu luma aban áriebu. Laruganbei, barühali garabali ligía chagagaru, 14 aba habuinchuni sun Ehiptu. Úagiña saragu chagagaru, ani úadigiaaña giñe kei ha ñéinbaña lidan weyu ligía, 15 gíbetiña darí lun hadouragun lau múa, aba héiginu sun nadü to erederuboun lárigiñe huya dereguati. Meredeti ni murusun ubanaü lidan ni aban fulasu Ehiptu: Ni áraabu, ni luagu tídibu wewe.

16 Aba lóunahan urúei luagu Moisesi luma Aarón furese furese, aba lariñagun houn:

—Afigouhaadina ligibugiñe Hubungiute luma higibugiñe, 17 gama lumoun ayumuraguatina hun lun feruduna humani nifigoun, lun hafurieidun lun Hubungiute lun lagidaruniña igei gáfarahatiña ha nuéi.

18 Dan láfuridunbei Moisesi lúmagiñe urúei, aba lafurieidun lun Bungiu. 19 Ábati lasansiruni Bungiu lémeri garabali, aba láfurun here luéigiñe oubaü le ñéingiñe lubéi lálüda weyu, aba lanügüniña chagagaru, achagara lidoun barana funati. Meredeti ni aban chagagaru lidan sun Ehiptu. 20 Gama lumoun aba ledereragüdünu Bungiu lanigi urúei lun mígirun lan lun houdin Ísüraelina.

21 Ábati lariñagun Bungiu lun Moisesi:

—Iñurabéi búhabu sielun, lun liabin aban luburiga luagun sun Ehiptu dereguabei luburiga ligía darí lun gayara lan laguurúniwa.

22 Aba liñuruni Moisesi lúhabu sielun, aba ladagarun aban óunwenbu luburiga lidan sun Ehiptu, 23 luagu ǘrüwa weyu úati ni aban gayaraati larihini lubesinan, siñá lánhingichun lídangiñe fulasu le ñein lubéi. Ánheinti tidan sun haban Ísüraelina, harugoungati.

24 Ábati lóunahan urúei luagu Moisesi, lariñaga lun:

—Heiba áhuduragua lun Bungiu, barǘ humaña giñe hisaanigu, gama lumoun ígira humaña hilügüniña mudún hama bágasu ya.

25 Aba lóunabuni Moisesi:

—Lubaragiñe lira, buguya guánarügüba íchigaña animaalugu ha lúnbaña wadagaragüdüniña lun Wabungiute woun. 26 Ani hóudiba giñe wabiñanigu wama. Meredebei ni aban hádangiñe, ladüga gasu wanúadahan fiu hádangiñe lun wadagaragüdün lun Bungiu. Dariba wachülürün yágüta, wasubudirei kaba lan ibiñani wemegeira lun wadagaragüdün lun Wabureme.

27 Gama lumoun aba ledereragüdünu Bungiu lanigi urúei, lun mígiragüdün lániña. 28 Ariñagati giñe urúei lun Moisesi:

—Beiba yáagiñe, ani houchabá miábindigiaba arihana, ladüga wéyume biabin arufudagua bungua nigibugiñe, náfarubadibu hilagubei.

29 Aba lóunabuni Moisesi:

—Ítara liña. Marihindigia náadibu.