1 Aba lariñagun Bungiu:

—Guentoti barihaali kaba lan nadüga lun urúei, ladüga láurügüba erei lígiraün lun háfuridun lageiragiñe, ligía guánarüba ariñaga hun lun hidin.

2 Aba lariñagun Bungiu lun Moisesi:

—Au Aburemeibei. 3 Arufudaguatina nungua lun Abüraámü, lun Isaakü luma lun Hakobu lau niri le Bungiu Suntigabafu, gama lumoun marufudagúntina nungua houn lau niri le tímatimaati: Aburemei. 4 Adügatina giñe aban daradu hama lun níchuguni fulasu le Kanán houn, lememe fulasu le meha ñein lubéi haganawa kei terencha luagu aban dan. 5 Guentó, lau nasubudiruni luagu hasufuriruña lan Ísüraelina, luagu hafosuruñanu lan Ehiptuna lun hawadigimaridun, haritaguaadina luagun nidaradun. 6 Beiba lubeiti, bariñagame houn Ísüraelina: "Au le Aburemei. Nasagaraaña lídangiñe hamudirawagun luma lídangiñe lidere wadagimanu le gádanbaliña hama Ehiptuna. Narufudaali nubafu, nesefuraaña lau óunwenbu burí katei le lunbei nadügüni le lánina irichaü; 7 Nanügaadün keisi nánigu, auba Hubungiute. Ítara luba hasubudiruni luagu au lan Aburemeibei le Hubungiute, le esefurubalün lídangiñe lidere wadagimanu le ídounbei híchigaün Ehiptuna. 8 Nanügaadün lidoun ageiraü le füramase nubéi lun Abüraámü, Isaakü luma Hakobu, níchigaali hun lun hánime. Au Aburemeibei".

9 Aba láguyuguagüdüni Moisesi dimurei le houn Ísüraelina, gama lumoun meberesentiña lau, ladüga wéiriti maguraasuni hadan luma lueirin hamudirawagun. 10 Ábati lariñagun Bungiu lun Moisesi:

11 —Beiba ariñagabá lun urúei lun lígirun lun háfuridun Ísüraelina Ehiptugiñe.

12 Lariñaga Moisesi lun Bungiu:

—Ni íbini Ísüraelina, madügüntiña gasu nau, ida lubati ladügün urúei gasu nau, dagadagagubeitinabei?

13 Ábati lóunahani Bungiu Moisesi luma Aarón lun houdin ariñaga houn Ísüraelina luma lun urúei luagu ibihaaña lan dimurei deregüdati lun hasagaruniña Ísüraelina Ehiptugiñe.

14 Añahán hábutigu iduheñu luéigiñe hóubadina úguchiligu. Añahán lisaanigu Rubén le furumiñeti lisaani Ísüraeli: Hanoku, Falú, Esürón, luma Karümí. Hagía liduheñubaña Rubén.

15 Lisaanigu Simeón: Hemueli, Hamín, Oadü, Hakín Sóarü luma Saulu, le tiráü aban Kananna. Añahán liduheñubaña Simeón.

16 Sanñein-darandi irumu labagaridun Lewí. Anihán hiri lisaanigu lúmagiñe íbugañaü lumoun amuleñein: Gerüsón, Keatü luma Merarí. 17 Lisaanigu Gerüsón: Libüní luma Simí. 18 Sanñein-darandi-ǘrüwa irumu labagaridun Keatü, anihán hiri lisaanigu: Amürámü, Isarü, Ebürón luma Usieli. 19 Lisaanigu Merarí: Malí luma Musí. Hagía liduheñubaña Lewí, lúmagiñe íbugañaü lumoun amuleñein.

20 Aba lamarieidun Amürámü tuma Hokawédi to lóufuri, to agaraüdübalin Aarón luma Moisesi. Sanñein-darandi-sedü irumu labagaridun Amürámü.

21 Lisaanigu Isarü: Koré, Néfegü luma Sikürí.

22 Lisaanigu Usieli: Misaeli, Elisafán luma Sitürí.

23 Aba lamarieidun Aarón tuma Eliséwa to liráü Aminadábü, litu Naasón, to agaraüdübalin: Nadabü, Abiú, Eleasárü luma Itamárü.

24 Lisaanigu Koré: Asirü, Elikaná luma Abiasáfü. Hagía liduheñubaña Koré.

25 Eleasárü, le aban hádangiñe lisaanigu Aarón, aba lamarieidun tuma aban hádangiñe lisaanigu Futieli, aba tagaraüdüni Finesi. Hagía hábutigubaña haduheñu lewitagu.

26 Añahánmeme Aarón luma Moisesi hagía ha únbaña lariñaga Bungiu lun hasagaruniña Ísüraelina Ehiptugiñe. Afileiheina kei súdaragu 27 Aaronméme luma Moisesi adimurehabaña luma lurúeite Ehiptu lun hasagaruniña Ísüraelina Ehiptugiñe.

28 Weyu le ladimurehanbei Bungiu luma Moisesi Ehiptu, 29 aba lariñagun lun:

—Au Aburemeibei. Sun le lunbei nariñaguni bun, ariñagabéi lun urúei.

30 Aba lariñagun Moisesi:

—Nabureme, mariñagaditinatia buidu, ida lubati ladügün urúei gasu nau?