1 Daüguaü to adügǘboun lun leseriwidúniwa tidan sanduariu, tautu gamisa díngutu, gamisa koloru guchu tuma gamisa funatu. Hüchawatu ladaüragun Aarón ítara kei lariñaguni Bungiu lun Moisesi.

2 Lun tadügǘniwa épanu, yúsuati golu, gamisa díngutu, gamisa koloru guchu, gamisa funatu tuma linu giñuriwatu. 3 Lau golu adügǘwati átiri bürüti lau marüdiyu, le íbaahoubei kei filu lun laborudahóuniwa tuagu gamisa díngutu, gamisa koloru guchu, tuagu gamisa funatu luma tuagu linu. 4 Rúati bián dirandi tuagu épanu dungu luéigiñe bián lígirugu. 5 Béliti le tuágubei épanu, lauti golu, gamisa díngutu, gamisa koloru guchu, gamisa funatu tuma linu fínutu ítara kei lariñaguni Bungiu lun Moisesi.

6 Aba líchugun burí dübü ligibuagu árurugu golu lau hiri lirahüñü Hakobu chigawañu luagu kei aban seyu. 7 Lárigiñe aba líchuguni Besaléli luagu tidirandin épanu, lun laritawagún hawagun lirahüñü Hakobu, ítara kei buga lariñaguni Bungiu lun Moisesi.

8 Adügǘwatu giñe aban lidáü aniguagu lau aban aborudahóuati fínuti kei le tani épanu: Lau golu, gamisa díngutu, gamisa koloru guchu, gamisa funatu tuma linu giñuriwatu. 9 Lárigiñe ladobulirun, aba lasalirun lun gádürübei lan larigei, wein bián sentimeturu luagu kada louba. 10 Darúaguati lau lau gádürü laini dübü buíduburiti: Luagu furumiñeti laini ñeinñein aban rubí, aban kürisólitu luma aban ésümeralüda; 11 luagu libiaman aban güranate, aban safiru luma aban hade; 12 luagu lǘrüwan, aban hasintu, aban ágata, luma aban amatísüta, 13 luagu ligadürün, aban topasiu, aban kórunalina luma aban hásüpe. Dübü burí ligía luáguñein árurugu golu, 14 dúusuñein, luagu duusu hiri lirahüñü Hakobu; kada aban lídangiñe ñeinñein liri aban hádangiñe duusu türibu luagu.

15 Luagu lidáü aniguagu, adügatiña fiu iñari lauti golu aguribihóuati kei gúrudu. 16 Adügatiña giñe bián árurugu golu luma bián bángüli golu, aba híchuguni bángüli golu luagu bián tígirugu lidáü aniguagu íñugiñe tibiti, 17 liábinti iñari golu ligibuagu bián bángüli. 18 Aba híchuguni lígirugu bián güringüri ligía ligibuagu bián árurugu aba hámuruduni luagu tidirandin épanu, tigibugiñe. 19 Adügatiña giñe biámaya bángüli golu, aba híchuguni luagu bián tígirugu lidáü aniguagu le ǘnabugiñebei, ligibuagu bián aru le múnadagiñebei le tubadubei épanu. 20 Adügayatiña bián bángüli golu, aba híchuguni luagu tidirandin épanu, tigibugiñe, gama lumoun ǘnabugiñe yarafa lun hüchaguaü, íñuraü libiti tubelitin épanu. 21 Aba hadunraguagüdüni tubangülin lidáü aniguagu luma tubangülin épanu lau aban agürügaü guchu, lun terederuba lan lidáü aniguagu íñugiñe libiti tubelitin épanu, lun mafanreinragun tan luma, ítara kei buga lariñaguni Bungiu lun Moisesi.

22 Tau gamisa koloru guchu ladügǘwa tidáü épanu. 23 Ñeinñein aban huyu tamidangua tidáü épanu tuguya. Barúaguati lárurugu kei burí le tuágubei chaleku lautu gueru luéi taheiridagun. 24 Aba hewendedagüdüni taru idáü tau güranáda tautu gamisa díngutu, gamisa koloru guchu, gamisa funatu tuma linu giñuriwatu. 25 Adügatiña giñe lirahüñü raüwa lauti golu, aba hamigisiruni tuma güranáda, aba híchaahani tabadinagua geyegu lau sun taru. 26 Idáü lun eseriwiduni; aban raüwa, aban güranáda, ábanya raüwa ábanya güranáda, ítara kei lariñaguni Bungiu lun Moisesi.

27 Aban adaaguti gamisa adügübarun ligounun Aarón to tautu linu tuma hagounun lirahüñü, 28 ligía giñe adügübalin habunedun wéndeti le hábulugubei tuma galasunsiyu lautu linu fínutu; 29 béliti tauti linu giñuriwatu, gamisa díngutu, gamisa koloru guchu, tuma gamisa funatu, aborudahóuatu ítara kei buga lariñaguni Bungiu lun Moisesi.

30 Adüga hamuti giñe bürüti lau golu le adireirubalin kei fádiri, aba habürüdün luagu kei seyu: «Díreiwati lun Bungiu». 31 Aba híchugun aban agürügaü guchu luagu, lun ladibirun bürüti luagu búnedu íñugiñe libiti, ítara kei buga lariñaguni Bungiu lun Moisesi.

32 Aba lagumuchun tadügün sanduariu tuma kianpu lánina óundaruni luma Bungiu. Adüga hamuti Ísüraelina sun katei ítara kei buga lariñaguni Bungiu lun Moisesi, 33 aba hederegerunu sanduariu tuma kianpu lánina óundaruni lun Moisesi lau sun tumegegun: Pini, fulansu, tanaaha, wagabu luma ebu, 34 idáü lauti lura mudún le féindiwati lau funati, idáü le lauti uraü fínuti, belu lun tadourun tau bágüsi, 35 bágüsi to lagei daradu luma tebu, tidáü, 36 dábula lau sun lumegegun, fein to ederegerúboun lun Bungiu, 37 lebu sanudelu golu luma lilanpuna; lanpu burí le lunbei aranseñu lan, lau sun lumegegun; gasi lun ladurangun lanpu, 38 latarü lauti golu, garaba le lánina ederegeruni, kupali hémeti, korutína to luáguboun ebelaagülei tidoun kianpu lánina óundaruni, 39 latarü lauti buronse lau lubarieirun lauti buronse, lani índanu luma sun lumegegu, ágeidinaü lau lebu, 40 likorutinan bürürü, tuágaburi luma tebu, korutína to luáguboun ebelaagülei lun bürürü, gúrudu luma pegi lun lagüürǘniwa bürürü, sun umegeguni lun eseriwiduni tidan sanduariu, 41 daüguaü lun leseriwidúniwa tidan sanduariu, ladaüragun Aarón tuma hadaüragun lirahüñü to lánina hafadirihan.

42 Adüga hamuti Ísüraelina sun katei ítara kei buga lariñaguni Bungiu lun Moisesi, 43 danti le larihinbei Moisesi luagu adüga hamani ítara, aba labiniruniña.