1 Aba lamarieidun aban wügüri lídangiñeti lani Lewí türibu tuma aban würi lídangiñetu giñe türibu ligía. 2 Aba tadageinadun ábati tágurahan aban wügüri irahü.* Dan tarihinbalin lumagadiñen irahü ligía, aba taramuduni luagu ǘrüwa hati, 3 gama lumoun kei siñaali lan tasigirun aramudahei, aba tanügün aban faniñe aba taranseruni lun mebelubei lan duna lidoun, aba tíchuguni irahü le lidoun, aba tígiruni labadinagua góunwenre-agei laru duna le gíribei Nilu; 4 ariñagatu giñeti tun aban litu irahü le lun terederun ñein yarafa lun buga tarihin kaba lan anüga fulasu lau irahü le.

5 Murusun dan lárigiñe aba taragachun liráü urúei lun tidin ágawa dúnarugu, danti le añaha lan tumusuniña éibugañaha laru duna, aba tarihini faniñe le labadinagua góunwenre. Aba tóunahan aban hádangiñe tumusuniña lun tanügüni tun. 6 Dan tadaaruni faniñe, aba tarihin luagu anihán lan aban irahü, ayahua lidan, aba lagudemedagun tun liráü urúei tuguya, aba tariñagun:

—Aban irahü ebüréu le.

7 Ábati tariñagun litu irahü ligía tun liráü urúei:

—Busentibu nagúarun tun aban hiñaru Ebüréana to águrahatu lun tátagüdüni irahü le bun?

8 Tariñaga liráü urúei tun:

—Beiba anügoun.

Ábati tidin irahü tuguya anügoun lúguchu irahü ligía, 9 aba tariñagun liráü urúei tun:

—Barübei irahü le, güríabei nun, nafayeirubadibu luagu.

Aba tanügüni lúguchu, aba tagüriaruni, 10 dan le lachularun irahü, aba tederegeruni tun liráü urúei, aba tanügüni tiraüme, aba tíchugun Moisesi lírime, tariñaga:

—Moisesiba* liri ladüga nasagarun lan dúnarugugiñe.

11 Luagu aban weyu, dan le wügürihali Moisesi, aba láfuridun arihaña liduheñu ha lirasan, aba larihin luagu deré lan hawadigimari. Sódini ligía larihin Moisesi aban Ehiptuna agayuaha luagu aban Ísüraelina. 12 Ábati ladigiragun ariha anhein ua lubéi arihiti, keiti marihin lan gürigia ñein, aba láfaruni Ehiptuna ligía hilagubei, aba lábununi ságounrugu. 13 Larugan, ábaya láfuridun, aba larihin bián Ebüréana ageindagua hámagua. Ábati lariñagun lun le agayuahabei luagu le aban:

—Ka uagu bagayuaha luagu aban hádangiñeti birasan?

14 Lariñagati ebüréu ligía lun:

—Ka íchugubalibu kei ábuti ani aguseragüdüti wadan? Odi busentibu funagia báfarunina hilagubei kei badüga lun Ehiptuna lígira?

Dan laganbunbalin Moisesi katei le, aba lanufudedagun, ladüga lasubudiruni luagu subudiwaali lan luáguti lounwen Ehiptuna ligía. 15 Ani ítara liña, dan le lasubudirunbalin urúei luagu áfaraali lan Moisesi aban Ehiptuna hilagubei, aba lóunahan áluahei lun láfaruni; gama lumoun aba lanurahan Moisesi, aba lidin aganawa lóubawagu Madián. Ñein, aba lañuurun lubadu aban fusu.

16 Ñéinñeinmeti buga aban wügüri Heturó líribei ligía meha fádiribei ñein Madián, sédüñanuti lirahüñü würiña. Luagu weyu ligía, aba houdin dúnaha adaburagua duna lun habuinchagüdüni hátagüle ibiñanigu duna lubame buga hátagüdüniña lilügüniña háguchi mudún. 17 Gama lumoun aba hayabin fiu hóuniri mudún aba habugaguniña ñéingiñe. Ábati lererun Moisesi haweigiñe, ru ligía duna houn halügüniña mudún. 18 Dan le hagiribudun le ñeinhin lubéi háguchi, aba lálügüdüniña:

—Ida liñagia ñǘbuingia hubéi uguñe?

19 Hariñaga lun:

—Aban Ehiptuna esefurubaliwa hawéi hóuniri mudún, lárigiñe aba ladaburuni wadunari woun, guragüdalaña mudún.

20 Ábati lariñagun Heturó houn:

—Hagéi wügüri ligía? Kame hígirei lábugua? Heiba ougei ñübuin láamuga eiga.

21 Aba lubeiti lánharun Moisesi lun lerederun aganawa lúbiñe Heturó. Lárigiñe, aba líchugunu Heturó liráü to gíriboun Séfora lun Moisesi lun lúmarime. 22 Aba tagaraüdün aban wügüri irahü, aba líchugun Moisesi Gerüsón* lírime irahü ligía, lariñaga:

—Terencha au lidan fulasu le.

23 Dan luagun dan, aba lounwen urúei Ehiptuna. Gama lumoun lau sun lira ábanmeme houn Ísüraelina lau lidere hawadigimari luma hamudirawagun. 24 Ábati laganbuni Bungiu hayahun, aba laritagun luagun daradu le buga ladügübei luma Abüraámü, Isaakü luma Hakobu. 25 Aba larihiniña Bungiu, aba lasubudiruni gádantiña.