1 Moisesi meha óunigirubaliña mudún ha lilügüniña Heturó le fádiribei Madián ligiaméme límedamurubei Moisesi, luagu aban weyu, aba lanügüniña Moisesi mudún, aba lásügürün hau lídangiñe fulasu mageirawati, aba lachülürün lidoun láraabute Bungiu le gíribei Orebü. 2 Ñein larufudagua lani Bungiu ánheli lungua lun lidan aban watu durungu labadinagua aban búbugati. Aba larihin Moisesi luagu gemé lan búbugati ligía gama lumoun magumuchagunti. 3 Aba lariñagun lúnguarügü: «Ámuti giñe katei le! Néibuga ariha ka la uagu magumuchagun lubéi búbugati le».

4 Dan larihin Bungiu layarafadun Moisesi, lúntima larihini ka lan asuseredubei aba lagúarun lun lídangiñe búbugati:

—Moisesi! Moisesi!

Aba lóunabun Moisesi:

—Anahán ya.

5 Ábati lariñagun Bungiu lun:

—Mayarafadabá ñahoun, ragaboun giñe bigeidin ladüga sánduti fulasu le ñein bubéi.

6 Ariñagati giñe:

—Au Habungiutebei bagüchagu, Lubungiute Abüraámü, Isaakü luma Hakobu.

Aba ladouragun Moisesi lau ligibu, hanufudeti luéi larihini Bungiu, 7 lariñaga Bungiu lun:

—Ariha naali hasufurirun numutuniña ha Ehiptubaña. Aganba naali hagúarahan amuriaha ídemuei hawéi ábutigu ha amudiragubaliña, ani subudi numuti hasufurirun buidu buidu. 8 Ligía niábinbei lun nesefuruniña lídangiñe habafu Ehiptuna; nasagaraaña lídangiñe fulasu ligía, nanügañame lidoun aban múa wéiriti ani rísiti le buiti lun ábunaguni. Ligía fulasu le ñein lubéi haganawa Kananna, Étüna, Amoruna, Féresüna, Eweuna hama Hebusuna, 9 aganba naali hagúarahan Ísüraelina amuriaha ídemuei, ariha naali giñe luriban hóuseruniña Ehiptuna. 10 Beiba lubeiti, nóunahaadibu lumoun urúei lun basagaruniña numutuniña Ísüraelina Ehiptugiñe.

11 Lariñagati Moisesi lun Bungiu:

—Káteiñadinagia lun nídiba lan lumoun urúei, lun nasagaruniña Ísüraelina Ehiptugiñe?

12 Lariñaga Bungiu:

—Ñéinbadina buma, anihán seini le lunbei larufuduni luagu au lan óunahabalibu: Danme sagabaaña numutuniña Ehiptugiñe, háhuduraguba alawahana sun huguya luagu wübü le.

13 Aba lariñagun Moisesi:

—Danme le nidin ariñaga houn Ísüraelina: "Lóunahañadina Habungiute hagüchagu humoun", hálügüdübadina ka lan liri Bungiu ligía, kábameti nariñaga houn?

14 Aba lariñagun Bungiu lun Moisesi:

—Au Búngiubei le magumuchaditi. Ariñagabá lubeiti houn: "AU LE" óunahabalina humoun.

15 Ariñagati giñe Bungiu lun Moisesi:

—Ariñagabá houn Ísüraelina: "Aburemei le Habungiute binadu hagübürigu, Lubungiute Abüraámü, Isaakü luma Hakobu óunahabalina humoun". Ligíaba niri lun súnwandan ani ligía lunbei hóuseruni gürigia lúmagiñe guentó lun lubaruaguóun. 16 Beiba, óundarabaña sun wéiyaaña mutu hadan Ísüraelina bariñagame houn luagu arufudaguaadina lan nungua bun, au, le Lubungiute Abüraámü, Isaakü luma Hakobu. Bariñagame houn luagu ariha naali lan luriban hóuseruniwa Ehiptu. 17 Ani füramasetina lan nasagarubaña lan lídangiñe hagudemen, ábame níchugun aban múa rísiti houn ani buiti lun ábunaguni, múa le ñein lubéi haganawa Kananna guentó, Étüna, Amoruna, Féresüna, Eweuna hama Hebusuna. 18 Haganbubadibu numutuniña; ábameti bidin hama ábutigu arihei lurúeite Ehiptu, bariñagame lun: Arufudaguaali Wabureme lungua woun, le Habungiute Ísüraelina. Ígirabawa lubeiti lun woudin lidan fulasu mageirawati, díseraü kei burí ǘrüwa weyu éibuguni, lun wedewehan adagaragüdüni lun. 19 Gama lumoun subudi numuti luagu mígiragüdün lubadün lan urúei Ehiptuna lun hidin, ánheingubeirügü nafosura lun ladügüni. 20 So narufudubei lubeiti nubafu, ábame náfaraguniña Ehiptuna lau lanarime katei le lunbei nadügüni hageira; lárigiñeme lira, ábame lígirunün urúei lun háfuridun. 21 Nadügüba giñe lun hagañeiruni Ísüraelina lubuidun haritagun Ehiptuna, lun danme lan háfuridun, lun midin hamá málouga háhabu. 22 Kada würi táluguba túmagiñe tubesinan o túmagiñe lan furumiñeguarügü würi to aganóutu tuma, ílagu le lauti golu, pülata, tuma dúnigu, lun hadaüraguagüdüniña harahüñü tau, ítara luba hagidaruni le hámati Ehiptuna hawéi.