1 Aba lariñagun Bungiu lun Moisesi:

—Biba bián murusun dübü libe le furumiñeti bürǘ náamugei dimureimeme le meha bürüwañubei luagu furumiñeti dübü le babouchagubei. 2 Aransebá giñe lun bamudeirun luagun wübü Sinaí haruga binaafin, ábame barufudagun bungua nigibugiñe luagun liñun-agei wübü. 3 Moun lumuti lamudeirun ni aban buma, ualá giñe ni aban luagu wübü, ua hamá giñe mudún ni bágasu eiga sagadi ligibugiñe wübü.

4 Aba líbugun Moisesi bián murusun dübü libe le furumiñeti. Larugan, aba lanügüni dübü ligía binaafingiua, aba lamudeirun luagun wübü Sinaí kei lariñaguni Bungiu lun. 5 Ábati lararirun Bungiu lidan aban dúeri aba lerederun ñein luma Moisesi, aba líriduni liri. 6 Aba lásügürün ligibugiñe Moisesi ariñageina lau umalali héreti:

—Au Haburemebei! Au Búngiubei lun súnwandan! Gudemehabutina, gaguraasuntina, wéiritina lidan ínsiñeni luma inarüni! 7 Deregüdaguati nínsiñehabu súnwandan, feruduna numuti wuribani, maganbadi luma figóu; gama lumoun mígirun numuti le gadurunbei mabeichúnga, fáyeigüda numuti hariban agübürigu houn isaanigu, ibañani, ílawagu hama aguraü.

8 Aba labuluchagun Moisesi furese darí ladagarun lerebe múarugu, aba líchugun uéiriguni lun Bungiu 9 lariñaga:

—Nabureme! Nabureme! Anhein gañei naali lubéi bufulesein, keimoun wama. Dereti haganbun gürigia ha le tímatimaati, gama lumoun ferudunabéi wafigoun luma wariban, resibibawa keisi bánigu.

10 Aba lariñagun Bungiu:

—Nadüga aban daradu guentó hagibugiñe sun gürigia ha. Nadüga katei wéiriguburiti le madügǘngili lidan amu fulasu lidan sun ubóu, ani sun gürigia ha haganaguabaña harihubei le niyaraabei adüga, wéirigubei katei le lunbei nadügüni hau.

11 —Gúnfuli huméi le nubeibei hun, ábame nabugaguniña Amoruna, Kananna, Étüna, Féresüna, Eweuna hama Hebusuna huéi.

12 —Madüga humá ni aban daradu hama ha aganóubaña lidan fulasu le ñéinhinba lubéi hebelura luéi hábürügüdünün tidoun hasadaran. 13 Lubaragiñe lira günringuarügü huméi hani latarü luma burí hadübüri luma hani burí ugudinaü le sagüráubei.

14 —Máhuduragua humá lun amu bungiu, ladüga emeiditina au le Aburemei. Bungiu emeiditi níribei.

15 —Madüga humá ni aban daradu hama ha aganóubaña lidan fulasu ligía, luéi danme lan hafigouhan áhuduragua houn habungiutegu, ábame hamisurahanün lun giñe heigin lídangiñe hadagaragüdün, 16 hamarieidagüdüniña lan hasaanigu hama hisaanigu, dánmeti hahoruhan lau háhuduragun houn habungiutegu, ábame giñe hadügün lun giñe háhuduragun hisaanigu houn.

17 —Madüga humá guáriua hubungiuteme.

18 —Efeduha huméi tufedun fein maganatu lébini, ani kei nariñaguni hun, hou humá fein maganatu lébini luagu sedü weyu. Hadügeime, lidan hati le Abibü ladüga lidan hati ligía háfurida Ehiptugiñe.

19 —Sun furumiñeti hisaani nánibei, kéigubeirügü sun furumiñeti tiráü hilügün bágasu o mudún, o gábara anhein wügüri lubéi. 20 Ánheinti luagu furumiñeti tiráü aban burigü, gasu híchugun aban mudún o aban lan gábara leweñegua, gama lumoun anhein míchugun humá, lunti háhalachuni ligiina tiráü burigü tuguya. Gasu giñe híchugun aban idewesei leweñegua kada furumiñeti isaani. Ani miábinla ni aban arihana manügünga somu katei.

21 —Huádigimarida sisi weyu lidan dimaasu, gama lumoun gasu hemeraagun luagu lisedün weyu, íbini lidan lidaani ábunaguni o lidaani lan alubahani.

22 —Efeduha huméi lufeduna dimaasu lau furumiñeti alubahani, luma lufeduna alubahani le lánina lagumuchun irumu.

23 —Sun wügüriña lunti harufudagun houngua ligibugiñe Bungiu le Lubungiute Ísüraeli ǘrüwa wéiyaasu lidan irumu. 24 Nabugagubaña híbiri néchanigu hiñúarürugugiñe, ábame naweiridagüdüni hufulasun. Ítara, úabei ni aban áluguti lanügüni hufulasun sun áüngüra lan arufudagua hungua ligibugiñe Hubungiute ǘrüwa wéiyaasu lidan irumu.

25 —Lidan adagaragüdüni le hauti animaalugu, madagaragüda humá hitaü úara tuma fein gaganatu lébini, mígirun humeime le ígiragubei lídangiñe animaalu le adagarawagüdübei lidan fedu lubá le aban weyu.

26 —Lunti hanügüni lubuidun-agei lin hinadüri litenpulunrugun Bungiu, le Habureme.

Mábougua humá gábara lidan timiligin lúguchu.

27 Lariñaga Wabureme lun Moisesi:

—Abürühabei dimurei burí le, ladüga ligía ébuubei lun daradu le nadügübei buma luma hama Ísüraelina.

28 Aba lerederun Moisesi ñein luma Bungiu bián wein weyu luma bián wein áriebu, meigin matun. Ñein labürühei dimurei burí le lánina daradu luagu dübü, lememe diisi gumadi. 29 Lárigiñe, aba lararirun Moisesi luéigiñe Sinaí barüinaléi bián dübü le ñein lubéi bürüwañu lan lúrudu, gama lumoun dan le lararirunbei, mefenti luagu miriñu liña lan ligibu ladüga ladimurehan luma Bungiu. 30 Dan le larihinbei Aarón hama sun Ísüraelina luagu miriñu liña lan ligibu Moisesi, aba hanufudedagun, aba mayarafadun hamá lun. 31 Gama lumoun aba lagúarun Moisesi houn, danti le liabin Aarón hama hábutigu Ísüraelina le ñeinhin lubéi Moisesi, aba ladimurehan hama. 32 Murusun dan lárigiñe, aba hayarafadun Ísüraelina, aba líchuguni Moisesi sun dimurei le líchugubei Bungiu lun luagu wübü Sinaí houn. 33 Lásurun ladimurehan hama, aba ladouragun lau ligibu tau aban belu.

34 Danha le lebelurun Moisesi lun ladimurehan luma Bungiu, ábaha lagidarunu belu ligibuagugiñe darí láfuridun. Ábatiha lariñaguni le lariñagubei Bungiu lun houn Ísüraelina. 35 Danha le harihin Ísüraelina luagu mirí lan ligibu Moisesi, ábayaha ladouragun lau ligibu tau belu, ábaha lígirunu ligibuagu dariya lebelurun adimureha luma Bungiu.