1 —Adüga humá giñe aban latarü lauti fulansu le akasia lun lágudahoun kupali luagu. 2 Ábanbei labu limigifen luma lidabuberen, bián-wein-seingü sentimeturu limigifen, bián-wein-seingü sentimeturu lidabuberen, gádürü-wein-diisi sentimeturu liñun, le liganchun, líbirimemebei. 3 Hafurareime lau golu íñugiñe libiti, gádürüguabei louba luma liganchun, bíchigame aban riban golu geyegua lau. 4 Híchigame giñe bángüli golu lábugiñe riban, aban luagu kada larigei, lun ladarúniwa ebu lidoun, le lunbei lauba lan lanügǘwa. 5 Hadügeime ebu lau akasia, hafurareime lau golu. 6 Híchigeime latarü tigibugiñe belu to tigibugiñeboun bágüsi lánina daradu, le ñeinba lubéi nadunragua buma. 7 Sagü binaafin, lidan oura le laransehóuniwa burí lanpu, ábame lágudahan Aarón kupali hémeti luagu latarü le, 8 águdaha ligíame giñe rábounweyu, oura lun lebedúniwa lanpu. Ladügǘba le liñúarü Bungiu súnwandan, gumugua dan. 9 Madagaragüda humá amu luwuyeri kupali luagu latarü le, ni adagaragüdüni gudawarügüti, ni idewesei le ílaüauti, ni diwéin túaguatu. 10 Deregewañu luba latarü le sunsuinagubei lun Bungiu, aban wéiyaasu lidan irumu, ladagaragüdüba Aarón hitaü le lánina adagaragüdüni luagu liganchun latarü lun ferudunawa lan figóu. Sagü irumu, aban wéiyaasu luagu irumu, ladagarawagüdüba adagaragüdüni luagu latarü le, lun libihíniwa ferudun luagu figóu.

11 Aba lariñagun Bungiu lun Moisesi:

12 —Danme babahüdüniña Ísüraelina, kada aban hádangiñe, gasu líchugun aban idewesei lun Bungiu keisi lesefuha libagari, ua hamaamuga igei lánina óunweni ladüga habahüdǘniwa gürigia. 13 Sun le abahüdǘti, líchuguba seingü güramu pülata, lememe lamidan lihürü aban fiádürü le tani sanduariu. 14 Sun abahüdǘtiña ha wéinhali irumu hau lun iñun, gasu híchuguni idewesei le lun Bungiu, 15 danme líchuguni kada aban lesefuha libagari, le rísibei, míchubei sügǘ lau seingü güramu pülata, le gudemebei míchubei ǘnabu luéi. 16 Banügeime pülata ligía, ábame bederegeruni tun kianpu lánina óundaruni. Laritaguagüdübei katei le Bungiu hawagun Ísüraelina, luma luagu le híchugubei keisi lesefuragüle habagari.

17 Aba líchuguni Bungiu uganu le lun Moisesi lun lariñaguni houn Ísüraelina:

18 —Adüga humá aban ágeidinaü lauti buronse lau lebu lauti giñe buronse lun leseriwidun lun hachibagun gürigia houngua; híchigeime tabadinagua kianpu lánina óundaruni luma latarü, ábame habuinchagüdüni lau duna. 19 Ñéingiñeba ladabura Aarón duna hama lirahüñü lun hachibuni háhabu luma hagudi. 20 Hachibubei háhabu luma hagudi danme le hebelurun tidoun kianpu lánina óundaruni luma danme le hayarafadun lun latarü lun harufuduni idewesei le gudawarügüti lun Bungiu. Ítara luba móunwegun hamá. 21 Lun móunwegun hamá, gasu hachibuni háhabu luma hagudi. Ábanbei lúrudu magumuchaditi le lun Aarón luma houn ladügawagun.

22 Lariñaga Bungiu lun Moisesi:

23 —Anúadahabei lubuidun-agei híduru hémeti: Kei burí, sisi kilu mira, ǘrüwa kilu kanela, ǘrüwa kilu maburu le hémeti; 24 sisi kilu fuluri le kasia. Bepesaheime kei lepesahóuniwa sanduariurugu, barǘ buguyame ǘrüwa líturu dimí lagüle oliwu. 25 Badügeime garaba le lánina anúadiruni lau sun le, ítara kei ladügüni aban adaaguti ibiñein. Ligíaba garaba sánduti le lánina anúadiruni, 26 báturaguounme kianpu to lánina óundaruni, tuma lubagüsinina daradu lau, 27 túguabeime dábula lau sun le ayusurubei luagu, lebu sanudelu luma le ayusurubei luagu, luagun latarü le lánina kupali, 28 túguabeime latarü le lánina adagaragüdüni gudawarügüti labu sun le ayusurubei luagu, luma ágeidinaü. 29 Ítara luba badireiruni lun katei lan burí le sándutimati. Furumiñeguarügü katei adagaruti luagu ábame giñe lerederun deregewañu lun Bungiu.

30 —Béserame giñe lídangiñe garaba ligía luagun Aarón luma hawagun lirahüñü lun hadireirúniwa keisi nufadirinigu, 31 bariñagame houn Ísüraelina: Anihánba lan nigaraban sánduti lánina nederegeragüle gumugua dan. 32 Mésera huméi luagun furumiñeguarügü wügüri, maranserun huguyame ámuya garaba libe le. Aban garaba sánduti le, lunti hóuseruni kei katei sánduti. 33 Le aranseruti amu garaba libe le, o lun léseruni luagun furumiñeguarügü le mama fádiri, lagidarúba hádangiñe híbiri gürigia.

34 Lariñaga Bungiu lun Moisesi:

—Barüba giñe ábanmeme kuántati: Tühü wewe, laganagu éigini le hémeti, kupali luma gálübanu hémeti, 35 ábame baranserun aban kupali sánduti lau sun katei le, bamigisireime buidu kei ladügüni aban adaaguti ibiñein, libiñe. 36 Ábame bamuligidun murusun lídangiñe, bíchigeime tubadu lubagüsinina daradu, tidan kianpu lánina óundaruni le ñeinba lubéi nadunragua buma. Kupali le, ligía le lunbei sagüráutima lan hun, 37 madügünbadün amu kupali libe lun hayusuruni. Lani Bungiu, ani lunti káteibei lan sagüráuti bun. 38 Le adügüti amu kupali libe lun lirimichahani, lagidarúba hádangiñe gürigia.