1 Aba ladügünu Besaléli bágüsi lau akasia, aban méturu diisi sentimeturu timigifen, ǘrüwa-wein-seingü sentimeturu tidabuberen, ǘrüwa-wein-seingü sentimeturu tiñun. 2 Aba lafurarunu lau golu múnadagiñe luma bóugudigiñe, aba líchugun aban riban golu geyegua tau. 3 Adügati giñe gádürü bángüli golu lun gádürü tugudi, bián lun aban oubaü, bián lun le aban. 4 Adügati giñe átiri ebu lauti akasia, aba lafuraruni lau golu, 5 aba lásügüragüdüni labadinaguagiñe bángüli le tóubawagubei bágüsi lun gayara lan tanügǘniwa.

6 Adügati giñe aban idáü lauti golu, aban méturu diisi sentimeturu limigifen, ǘrüwa-wein-seingü sentimeturu lidabuberen, 7 hau bián kátaña garünatiña láutiña golu nadagimeinwatiña lau marüdiyu luagu kada aban oubaü ligibuagu tidáü bágüsi. 8 Idáü ligía hama bián kátaña garünatiña hagía, ábanmeme pisi: Aban hádangiñe luéigiñeñein aban tígirugu, le aban luéigiñe le aban, 9 herederati gagibugu, gama lumoun lau hagibu luagun idáü, lau harüna le ítarabei kei tarüna ágila tulegu lóugiñe idáü, aba hadouragun lau, lau harüna.

10 Adügati giñe Besaléli aban dábula lauti akasia, gádürü-wein-diisi sentimeturu limigifen, bián-wein-seingü sentimeturu lidabuberen, ǘrüwa-wein-seingü sentimeturu liñun. 11 Aba lafuraruni lau golu, aba líchugun aban riban golu geyegua lau; 12 lau aban árurugu le sédüti sentimeturu lidabuberen, aba líchugun aban riban golu luagu árurugu ligía. 13 Adügati giñe gádürü bángüli golu luagu, aba líchuguni luagu gádürü larigei le ñein lubéi gádürü lugudi, 14 lun lerederuba lan lubadu árurugu lun lacharúniwa ebu lidoun, lun gayara lan lanügǘn dábula.

15 Lau akasia ladügei ebu le aubei lanaahóua dábula, lárigiñe aba lafuraruni lau golu. 16 Lau giñe golu ladügei umegeguni le lunbei luágubei lan dábula, asiedu, guliyeru, fudu, luma burí kopu lun idewesei le dunouti.

17 Adüga lumuti giñe Besaléli lebu sanudelu lauti golu, lau marüdiyu luadigimaridei. Lebu, lugudina, likopun, lani kálisi luma pétalu, ábanmeme pisi; 18 furiti sisi arünaü lóubawagugiñe, ǘrüwa luéigiñe aban oubaü, ǘrüwa luéigiñe le aban. 19 Kada aban lídangiñe sisi arünaü le áfuridubei lídangiñe lugudina, barüti ǘrüwa kopu ítara liña ligaburi kei alüméndüra, lau aban kálisi, luma lani pétalu, 20 ñeinñein gádürü kopu luagu lugudina le ítarati kei tílewe alüméndüra, lau lani kálisi luma lani pétalu. 21 Kada aban lídangiñe ǘrüwa feru arünaü le áfuridubei luéigiñe lebu sanudelu ñeinñein aban kálisi ǘnabugiñe libiti. 22 Ábanmeme pisi kálisi, arünaü, luma lebu sanudelu le láutibei golu, nadagimeinwati lau marüdiyu. 23 Lau giñe golu ladügei sedü lilanpun, litenasan luma lani pülatíyu. 24 Lun ladügǘniwa lebu sanudelu ligía lau sun lumegegun, yúsuati darandi ǘrüwa kilu golu.

25 Lau akasia ladügei Besaléli latarü le lani kupali. Aba lau limigifen luma lidabuberen; bián-wein-seingü sentimeturu limigifen, bián-wein-seingü sentimeturu lidabuberen, gádürü-wein-diisi sentimeturu liñun. Ábanmeme pisi liganchun latarü luma latarü guánarügü. 26 Aba lafuraruni ligibuagugiñe lau golu, gádürügubei louba, luma liganchun, aba líchugun aban riban golu geyegua lau. 27 Adügati giñe gádürü bángüli golu aba líchuguni lábugiñe riban, aban luéigiñe kada arigei, lun lacharúniwa lanaaha lidoun lun lanügǘn latarü. 28 Lau akasia ladügei índanu, lárigiñe aba lafuraruni lau golu.

29 Adüga lumuti giñe Besaléli garaba sánduti lun ederegeruni luma kupali hémeti kei hadügüni adaagutiña ibiñein.