1 Ábayati lariñagun Bungiu lun Moisesi:

—Aniheingua aban igei lun nóunahani luagun urúei hau sun Ehiptuna. Lárigiñeme le, mama ígirarügübei lun háfuridun, lubaragiñeme lira bugarügü láadünme urúei yáagiñe. 2 Guentó, ariñagabá houn Ísüraelina, dandu wügüriña kei würiña, lun hamuriahan ílagu le golu luma pülata hama habesinanigu.

3 Aba ladügün Bungiu lun buidu hamá Ehiptuna hama Ísüraelina. Aba giñe hanügüni lánigu urúei Ehiptuna Moisesi kei aban wügüri wéiriguti, ítara liña giñe haritagun sun Ehiptuna luagu.

4 Lubaragiñebei lidin Moisesi lúmagiñe urúei, aba lariñagun lun:

«Áriebume, lásugürübame Bungiu lídangiñe sun Ehiptu, 5 ábame lounwen ígiramaü hadan kada iduheñu Ehiptuna, lúmagiñe íbugañaü hadan hisaanigu huguya urúei lumoun íbugañaü hadan tisaanigu idamuni to nadagimeinboun amuliha. Hóunweguba giñe sun furumiñetiña harahüñü animaalugu. 6 Ñeinbei agúarahani lau igarigu lidan sun Ehiptu, le úañahagili libe, ani úadigiaalime giñe». 7 Ani lun hasubudiruni luagu amu lan lanügüniña Bungiu Ehiptuna hawéi Ísüraelina, máwouhangubeibei ounli lau ni aban gürigia hádangiñe Ísüraelina ni lau ni aban halügün. 8 Ábameti hayabin sun bánigu ha arihana, ábame háhuduragun amuriaha nun: «Beiba hau sun gürigia ha afalarubalibu». Gama lumoun mídinbadina lubaragiñe lasuseredun le.

Aba láfuridun Moisesi lau igañi liñúarürugugiñe urúei. 9 Lárigiñe, aba lariñagun Bungiu lun Moisesi:

—Madügünbeitia urúei gasu hau, ítara, nadügayaba katei hanarimeguti Ehiptu.

10 Adüga hamuti Moisesi luma Aarón sun burí katei le ligibugiñe urúei, gama lumoun kei ledereragüdünu Bungiu lanigi, mígirunti lun háfuridun Ísüraelina Ehiptugiñe.