1 Mariñagabá iyeeni, midin buguyame lúmagiñe gürigia wuribati dan le ladügün katei marichati.

2 Mafalarabaña hiibe-agei lidan hariban.

Dan le baguserun lidan aban kesi le harumati, mafalarabaña hiibe-agei, lun bidin lúmagiñe le marichabei, 3 gama lumoun mídinba giñe lúmagiñe gudemeti anhein maricha lubéi.

4 Anhein badarira lilügün bágani bágasu o burigü le eferidiruti luéi, giribugüdabei lun. 5 Mígiraba bíderaguni le iyereehabúbei bun; ánhabu ariha lábürühan lilügün burigü lábugiñe lihürü lanügün, íderaguabei agidarei anügüni luéigiñe.

6 Magidarabéi liricha gudemeti luéi lidan aban kesi le harumati.

7 Disebá luéi lichugúniwa duru le mámagu ligía, masiadirabéi giñe le madurunbei lun lounwen, ladüga míchugun nubéi le gadurunbei kei madurunti.

8 Meresibirabá idewesei lun madügünbani le richabei, ladüga marihingüda lumutiña idewesei ligía gürigia, féridigüdalei kesi houn maduruntiña.

9 Mamudiraguabei terencha, ladüga terencha meha huguya Ehiptu ani subudi humaali laganóuniwa lidan amu ageiraü.

10 Bunaguabéi bichari, balubaheime lidan sisi irumu, 11 gama lumoun lídanme lisedün irumu, mábunaguabei: Ígirabei lun lemeraagun hou hamaamuga gürigia gudemetiña ha lílana bageira lídangiñe, hou hamaamugei giñe animaalugu áraabuna le ígiragubei. Ítarala giñe badüga lau binadüri beibei luma binadüri oliwu.

12 Adügabéi sun le lunbei badügüni lidan sisi weyu, gama lumoun emeraaguabá luagu lisedün weyu, emeraagua láamuga giñe bilügün bágasu, bilügün burigü, bidamun luma terencha.

13 Gúnfuli humá lau sun le ariñaga náalibei hun, maganbualá giñe hiri amu búngiugu hiyumulugugiñe.

14 Hefeduhaba lidan niri ǘrüwa wéiyaasu lidan irumu. 15 Efeduha huméi tufedun fein maganatu lébini, ítara kei nariñaguni, hou humá fein maganatu lébini lidan fedu ligía, luagu sedü weyu. Lidan hati le Abibü, ladüga lidan hati ligía háfurida Ehiptugiñe. Siñabei giñe liabin ni aban arihana anhein manügün somu katei.

16 Efeduha huméi giñe lufedun alubahani, le lánina lalubahóun furumiñeti lin nadü, luma lufedun alubahani le lánina lagumuhóun irumu dan le halubahani sun le hábunagubei.

17 Sun wügüriña gasu harufudagun houngua ligibugiñe Bungiu ǘrüwa wéiyaasu lidan irumu.

18 Dan le hadagaragüdün animaalu nun, madagaragüda huméi hata úara tuma fein gaganatu lébini, mareida huméi giñe hagüle lubá le aban weyu.

19 Lunti hanügüni lubuidun-agei furumiñeti lin hinadüri litenpulunrúgun Wabureme le Wabungiute.

Mábougua humá gábara lidan timiligin lúguchu.

20 Nóunahabei nani ánheli bubá lun lóunigirunibu luagu üma, lun lanügünibu lidoun fulasu le aranse náalibei bubá. 21 Madisedabá luéi, gaganbadibá lun, ladüga lidan niri ladügei le ladügübei ani úabei ferudunalani hifigoun. 22 Gama lumoun ánhabu gaganbadi lun, adügabéime sun le nariñagubei, háganibadina báganiñu, nageindaguba hama ha ageindagutiña buma. 23 Lídiba nani ánheli bubá bubá, ábame lanügünibu hageiroun Amoruna, Étüna, Féresüna, Kananna, Eweuna hama Hebusuna ha lúnbaña náhuluniña lau sun hálagüle. 24 Mafalarabéi luriban hani lílana fulasu burí ligía hénpulu. Máhuduraguaba hagibugiñe habungiutegu, lubaragiñe lira, günringuarügübaña haguariuan sunsuinagubei luma burí hadübüri sagüráuti. 25 Huduguabá lun Babureme Bungiu, ábame labinirunu beigan fein luma buniñe duna.

Nadisedagüdübei sandi buéi, 26 nadügüba lun mounwen ban lubaragiñe dan. Úaboun würi agüriaagutu bageira ni to maraüheitu.

27 Nadügüba lun lanufudedúniwa buéi lidan furumiñeguarügü fulasu le ñéingiñe lumuti básügüra, ábame hanurahan báganiñu buéi. 28 Nadügüba lun lanufudedúniwa dan le básügürün, ítara luba hanurahan Eweuna, Étüna hama Kananna buéi, 29 machagarun nubaña lidan aban irumu, luéi leferidirun múa, ábame hagibedagun animaalu áraabuna ábame hadügün damichi bun. 30 Nachagahabaña murusun murusun, darime hagibedagun birahüñü, ragübéime múa keisi bani. 31 Amaküha naali láfadaragun bumúan ítara: Lúmagiñe Barana Funati, darí lumoun habaranan Filistéana, luma lúmagiñe fulasu mageirawati, darí lumoun duna Éufüratesi. Ru naaña lílana fulasu ligía búhaburugun, bachagarubaña biñuarürugugiñe.

32 Madügabá daradu hama, ni hama habungiutegu, 33 mígiraba giñe lun herederun bageira, luéi hafigougüdünibu nigibugiñe, huduguabiñein houn habungiutegu, beferidiragülebeiti lira.