1 Lárigiñe katei le, aba lidin Moisesi luma Aarón lumoun urúei, aba hariñagun lun:

—Lariñahare Bungiu le Lubungiute Ísüraeli: "Ígiragüdabaña numutuniña lun houdin lidan fulasu mageirawati lun hadügün fedu nun ñein".

2 Aba lariñagun urúei:

—Káteiñeigia "Bungiu", lun naganbubei lan, lun nígiragüdüniña Ísüraelina? Ibidiñeti Bungiu nun, ani mígiragüdün nubaña giñe Ísüraelina.

3 Ábati hariñagun:

—Ñǘbuinhali Habungiute Ebüréana wabaroun; wéibuga lubeiti lidan fulasu mageirawati, luagu ǘrüwa weyu éibuguni, lun wadagaragüdün lun Wabungiute, ladüga ánhawa madagaragüdün gayaraabei wóunwegun lau sandi o lidan wuribu.

4 Lariñaga lurúeite Ehiptu houn:

—Moisesi luma Aarón, ka uagu hararamaguagüdaña gürigia luéi hawadigimari? Giribu humá lidoun huádigimari!

5 Ariñagati giñe urúei houn:

—Guentó dan le gíbeeña lan Ísüraelina ya fulasurugu, herederagüdaali funagia hawadigimari?

6 Weyuméme ligía, aba lariñagun urúei houn meni ábutigu Ehiptuna luma houn hábutigu nadagimeintiña ha arihubaña hau Ísüraelina:

7 —Hebé híchugun sagadi sáühali houn nadagimeintiña lun hadaagun ladiríyu kéiñaha hadügüni; hagía guánarügüla ñüdün abudaha sagadi sáühali! 8 Gama lumoun gasu gibemémebei lan hadügün kéiñaha dan le rúarügü lan sagadi sáühali houn, ni aban ladiríyu ǘnabu luéi! Magúalitiña, ligía hagúarahanbei: "Keimoun adagaragüda lun Wabungiute!" 9 Nadagimeingüda humaña héretima, ru humá hafisiute luéi herederun aganbaha iyeeni.

10 Aba houdin hábutigu nadagimeintiña ariñaga houn gürigia:

—Rúhali urúei dimurei lun michugúnhali lan sagadi sáühali hun. 11 Guentó, gasu hidin abudahei le ñein lumuti hadarirei, lau sun lira gasu gibemémebei lan ladiríyu hadügün kei dan le rúarügü lan sagadi sáühali hun.

12 Ábati háfuridun Ísüraelina lidan sun Ehiptu áluaha isou le lárigi talubahóuniwa türigu lun hayusuruni kei sagadi sáühali. 13,14 Sagü weyu héredun meni ábutigu Ehiptuna hawagu lun hadügün gíbeti ladiríyu kéiñaha dan le rúarügü lan sagadi sáühali houn, agayuaha hagía burí hawagu hábutigu nadagimeintiña ha Ísüraelina, hariñaga houn:

—Ida liña san ni lubéi wurinouga ni uguñe míbeti ladiríyu hadügün kéiñaha liibe hadaagun?

15 Aba houdin ábutigu Ísüraelina lumoun urúei, hariñaga lun:

—Ka san uagu hóuserawa ítara, urúei? 16 Michugúnhali sagadi sáühali woun, ani lau sun lira busentiña wadaagun ladiríyu, agayuaha hagía wawagu. Hadügatia lumutuniña urúei lira!

17 Aba lóunabun urúei:

—Huguya, magúalitün! Ligía hagúarahanbei: "Keimoun adagaragüda lun Wabungiute". 18 Heiba nadagimein! Ani lau sun michugúnhali lan sagadi sáühali hun, gasu hadügün gíbeti ladiríyu kéiñaha dan le rúarügü lan sagadi sáühali hun.

19 Aba hasandiragun ábutigu Ísüraelina houngua lidan lidereniga dan lariñawagún houn luagu gasu lan gibe lan ladiríyu hadüga kéiñaha lubaramegiua. 20 Dan háfuridun lídangiñe hayanuhan luma urúei, aba hadunragun luma Moisesi labu Aarón, hagurabahañanu, 21 hariñaga ábutigu hagía houn:

—Larihubei Bungiu katei le hadügübei, ábame labeichunün. Ladüga hídangiñeti luribanbei lóuseruniwa urúei hau sun lánigu. Huguya guánarügü íchugubei lúgaaru houn lun háfaraguniwa hilagubei.

22 Ábati lariñagun Moisesi lun Bungiu lidan lafurieidun:

—Nabureme, ka uagu bóuseraña bumutuniña wuriba? Ka uagu bóunahana? 23 Lúmagiñe niabin adimureha luma urúei lidan biri, wuribatimarügüti lóuseruniña bumutuniña, ani madügüntibu ni kata lun besefuruniña.