1 Dan le lasubudirunbalin Hakobu luagu anihein lan türigu Ehiptu, aba lariñagun houn lirahüñü:

—Ka uagu heredera aríagua huouguoun? 2 Aganbaadina luagu anihein lan türigu Ehiptu. Heiba ñein agañeiha humaamuga türigu woungua gayara láamuga gabagarimeme wamá.

3 Ábati Houdin diisi hádangiñe líbugañanu Hosé Ehiptu agañeiha türigu, 4 gama lumoun mígirunti Hakobu lun lidin Benhamín le lamulen Hosé, luéi giñe lasuseredun somu katei wuribati lun. 5 Aba houdin lirahüñü Hakobu haganagua amu ha burí giñe ñǘdünbaña agañeiha, ladüga ñeinñein lan ilamaü lidan sun lumúan Kanán.

6 Hosé méhati gumadanbei lidan sun ageiraü ligía, ligía giñe alugurahabei türigu houn gürigia ha ñǘbuinbaña lídangiñe amu burí fulasu. Dan le hachülürünbei líbugañanu Hosé ligibugiñe, aba habuluchagun darí ladagarun herebe múarugu. 7 Subudigubei lumutiñati Hosé líbugañanu larihinbaliña, gama lumoun aba ladügün kamá ibidiñetiña lun, aba lariñagun houn lau éregu:

—Huguyati! Halíagiñe hiabin?

Hariñaga lun:

—Kanangiñe wayabin, agañeiha türigu.

8 Lau sun subudi lániña Hosé líbugañanu, hagía masubudirun hamuti. 9 Ábati laritagun Hosé luagu burí uénedü le luénedübei hawagu, lariñaga houn:

—Aríaahatiña huguya. Hiábiña ariha ka lan louba fulasu débilibei.

10 Hariñaga lun:

—Wagia wayabiña agañeiha türigu. 11 Lirahüñü ábanmeme gürigia sun wagía, gürigia úaraguatiña wagía. Meseriwidúngidiwa lun waríaahan fulasu.

12 Lariñaga Hosé houn:

—Hiyeeni, hiábiña aríaahei ka lan louba fulasu débilibei.

13 Hóunabeiti:

—Wagia dúusuñadiwa íbirigu lirahüñü ábanmeme úguchili, Kanán waganawa. Rédeiha buga wamulen le agumuhóuni luma wáguchi, anhein le aban hilá.

14 Lariñagaya Hosé houn:

—Kei buga nariñaguni! Aríaahatiña fulasu huguya. 15 Wachoururaali guentó: Fiñutina hun luagu urúei luagu máfuridunbadün lan yáagiñe darí liabin hamulen le agumuhóuni. 16 Leiba aban hídangiñe anügei. Ha híbiri, heredera adaürǘwa. Warihali anhein hinarün lubéi le hariñagubei, anhein mama lubéi inarüni le hariñagubei, aríaahatiña huguya. Fiñutina luagu urúei!

17 Aba ladaürüniña Hosé sun hagía luagu ǘrüwa weyu, 18 le lǘrüwan weyu, lariñaga houn:

—Au inebeti Bungiu nun. Adüga huméi le, ábame ferudunawa lan hibagari: 19 Anhein hinarün lubéi luagu haruma humá, ígira humá aban hádangiñe híbirigu furisunrugu; ha híbiri, barǘ hamá türigu lun heigin hiduheñu. 20 Lárigiñeme ábame hanügüni hamulen le agumuhóuni nun, ariha wamaamugei anhein inarüni lubéi hariñagubei. Anhein mama lubéi liña, hóunweguba.

Aba hánharun. 21 Gama lumoun hariñaga burí hámagua:

—Wuribati méhatia wadüga lun wamulen, madügüntiwa meha gasu lau dan le layumuragunbei woun lun gudeme lan woun, lau sun ariha wamani luagu nidiheri lan. Ligía liábinbei sun idiheri le woun guentó.

22 Lariñaga Rubén houn:

—Ariñagatina meha hun lun madügün humá wuribati lun; gama lumoun madügüntün gasu nau, guentoti mósuti wafayeihan luagu lounwen.

23 Ibidiñetiti houn luagu gunfuranda lániña Hosé, ladüga lau lan aban gürigia gariñagaditi lun hererun ladimureha houn. 24 Aba ladireirun Hosé hawéi, aba layahun. Dan lagiribudunyabei ñeinhin habéi, ani gayaraahali ladimurehan houn, aba lanügüni Simeón hawéi, aba lagüraguágüdüni hagibugiñe.

25 Lárigiñe aba lariñagun lun tabuinchawagüdün hasagüte lau türigu, lun giñe lichugúniwa liseinsun kada aban tidoun lisagüte, luma lun lichugún éigini houn lun heigin ǘmada. Aba ladügǘniwa ítara. 26 Ábati hawariragüdüni türigu hawagun halügüniña burigü, aba houdin ñéingiñe. 27 Dan hachülürün lidoun fulasu le ñeinba lubéi hásügürei áriebu, aba ladaarunu aban hádangiñe lisagüte lun líchugun éigini lun lilügün burigü, aba larihin luagu anihán lan liseinsun luagu tiyuma lisagüte. 28 Ábati lariñagun houn líbirigu:

—Ariha humá, águyugüdawa niseinsun nun! Anihán tidan nisagüte!

Aba halouchun sun hagía, hariñagati hámagua lau anufudei:

—Katei san le ladügübei Bungiu woun?

29 Dan hachülürün Kanán, aba habahüdaguni sun le asuseredubei houn lun Hakobu le háguchi, hariñaga lun:

30 —Gürigia le gumadanbei lidan fulasu ligía, adimurehati woun lau éregu, aba giñe lariñagun luagu keisi lan aríaahatiña woudin lageira. 31 Wariñaga lun luagu gürigia lan harumatiña wagía, luagu mama wama aríaahatiña; 32 luagu dúusuñadiwa lan lirahüñü aban mutu; luagu úaali lan aban wádangiñe wama, le lan amuleñein rédeiha lan buma Kanán. 33 Ábati lariñagun woun: "Narihaali anhein hinarün lubéi luagu haruma humá. Ígira humá aban hádangiñe híbirigu numa ya, hídinme íchiga murusun türigu houn hiduheñu, 34 gama lumoun hanügeime hamulen le agumuhóuni nun, afiñe náamuga luagu gürigia lan harumatiña huguya, mama humá aríaahatiña, ábameti nígiragüdüni le aban hibiri, gayaraahalimeti hidin ñeinhin lumuti habusenra lidan ageiraü le".

35 Dan hachagaruni líbugañanu Hosé tila hasagüte, aba harihin luagu ñeinñein lan liseinsun kada aban tidan lisagüte tidan aban tiraüraü sagü. Dan harihinu tiraüraü sagü tuguya lau seinsu, dandu hagía kei háguchi, aba halouchun. 36 Lariñagati Hakobu houn:

—Hígiruñadina marahüñüga. Úaali Hosé wama, ni Simeón, guentó hagidarayaali Benhamín nuéi! Nuágunñein sun le!

37 Lariñagati Rubén lun lúguchi:

—Ígirabei Benhamín lábugiñe naríaahan, nagiribudagüdübei bun. Anhein magiribudagüdün nan bun, báfaraguañame bián nirahüñü hilagubei.

38 Ábati lóunabun Hakobu:

—Mídinbei niráü huma. Hilá Hosé le líbugaña ani ligíarügaali. Ánheindügü asusereda somu katei wuribati lun lidan wéiyaasu le lunbei hadügüni, huguyaba gadurun luagu lounwen wéiyaali le lau íruni.