1 San-wein-sedü irumu tabagaridun Sara, 2 aba tounwen lidan aban fulasu gíriti Kiriatü-arüwá lememe uburugu Ebürón le Kananbei, aba layahun Abüraámü luagu tounwen Sara, aba lamuiserun tárigi. 3 Lárigiñe aba láfuridun le ñéingiñe lubéi túgubu Sara, aba lidin ariñaga houn Étüna ha lídanbaña fulasu ligía:

4 —Lau sun terenchana nan haganagua, alugura humá aban umuahaü nun lun nábununu númari.

5 Aba hóunabuni Étüna:

6 —Adügabá fulesei woun, aganbabáwa! Aban wügüri le lanúadirun Bungiu buguya waganagua. Bunaboun búmari lidan lubuidun-agei wamúaha, úabei ni aban wádangiñe amaharuti lau umúahaü bun lun lira.

7 Ábati lararamun Abüraámü, aba labuluchagun hagibugiñe Étüna arufuda inebesei, 8 aba lariñagun houn:

—Anhein hinarün lubéi luagu busén humá lun nábununu númari ya, fulesei humá nun amuriaha humá luma Efürón le liráü Sóarü lun 9 laluguruni lagadábugiñe dübü le Maküpelá nun, le lárurugubei lumúan. Nafayeirubei lebegi lagadábugiñe dübü ligía lun, ítara luba labureme nan aban umúahaü lidan fulasu le.

10 Keiti ñeinñein lan Efürón le Étüna haganagua, aba lóunabuni Efürón Abüraámü lun giñe gayara lan haganbuni lupaisanungu hama sun ha ásügürübaña yarafa lun lubenari uburugu:

11 —Uá, nabureme! Edeweharügü nubéi fulasu bun lau lagadábugiñe dübü le ñeinbei. Gefentiña lílana nageira luagu nedewehani bun. Bunaboun búmari.

12 Gama lumoun ábaya labuluchagun Abüraámü houn lílana fulasu ligía 13 ábati lóunabuni Abüraámü Efürón hagibugiñe súngubei:

—Fuleseibana aganbabána, amuriahatina buma lun bárügüdüni seinsu luagu múa lárigiñeme gayaraahalime nábununu númari ñein.

14 Aba lóunabuni Efürón:

15 —Aganbabána nabureme. Gádürü-san murusun pülata lebegibei fulasu. Luagu ebegi le masigenehanbadiwa! Bunaboun búmari.

16 Aba lubeiti lánharun Abüraámü lafayeiruni seinsu le lariñagubei Efürón hagibugiñe Étüna, aba lafayeiruni lau pülata. 17 Ítara liña lubeiti buga liabin lufulasun Efürón le Maküpelábei lau sun lagadábugiñe dübü luma sun tídibu wewe le lídanbei, lun lánibei lan Abüraámü. Fulasu ligía luéigiñeñein oubaü le ñéingiñe lubéi laboucha weyu libiti Mamüré. 18 Gefentiña Étüna luagu, hama sun ha ásügürübaña lubadugiñe lubenari fulasu.

19 Lárigiñe aba lábununu Abüraámü Sara to lúmari lidan lagadábugiñe dübü le lídanbei fulasu Maküpelá, luéigiñe oubaü le ñéingiñe lubéi laboucha weyu libiti Mamüré, fulasu le giñe subudiwabei lau iri le Ebürón, le giñe lídanbei lumúan Kanán. 20 Ítara liña lerederun Abüraámü laburememe fulasu luma lagadábugiñe dübü le ñeinbei, le halugurubei Étüna lun, lun umúahaü.