1 Aba lerederun Hakobu aganawa lóubawagu Kanán, le ñein lubéi meha laganawa lúguchi luagu átiri dan. 2 Anihán asusereduti hawaguti liduheñu Hakobu.

Dan le meha ábangili nibureinti disedüti irumu Hosé, ábaha lóunigiruniña mudún úara hama líbugañanu, ha tirahüñü Bilá hama tirahüñü Silüpá, würiña ha lubúaligu lúguchi. Ábatiha lariñahani Hosé hiri líbugañanu lun háguchi luagu luriban hóuseruni.

3 Hínsiñeti meha Hosé lun Hakobu sügǘ hau ha híbiri lirahüñü, ladüga dan le wéiyaali lagaraüdǘwa. Ligía ladügünbei aban ligounun wéndetu. 4 Dan le hasubudirunbalin líbugañanu luagu hínsiñe lan lun háguchi sügǘ hau sun hagía, aba liyereegudun houn, mabusurungubeitiñaha lun.

5 Luagu aban weyu, aba gewenedü lan Hosé aban uénedü, aba labahüdaguni houn líbugañanu; ábatima liyereegudun houn 6 ladüga lariñagun houn:

—Aganba humana, nabahüdaguaali nuénedü hun. 7 Gewenedütina sun lan nege wagía áraabuñadiwa adaagua güraguati türigu; sódini aba liñuragun nagüragun lungua aba lerederun suruñu, liabin buriti le hani güraguati aba legeyedagun lau le nani, aba labuluchagun súngubei lau inebesei.

8 Aba hóunabuni líbugañanu:

—Bariñaguñati lau lira luagu warúeitebadibu lan, luagu giñe bagumadirubadiwa lan?

Ábatimati liyereegudun houn luéigiñe luénedü luma luagu ligaburi labahüdaguni houn.

9 Lárigiñe ábaya gewenedü lan Hosé ábanya uénedü, ábaya giñe labahüdaguni houn líbugañanu. Lariñaga houn:

—Ariha humá san, gewenedüyatina aban uénedü, aba narihini weyu, hati hama unsu waruguma abuluchagua íchiga inebesei nun.

10 Dan labahüdaguni Hosé uénedü le lun lúguchi hama líbugañanu, aba ladeinhan lúguchi lun, lariñaga lun:

—Kagia mini ban lau uénedü le buénedübei? Gasu funagia wabuluchagun búguchu, bíbugañanu, nabu bigibugiñe?

11 Gimugatiñati líbugañanu lun, ánheinti lúguchi gíbeti lasaminarun luagun katei le.

12 Luagu aban weyu, aba houdin líbugañanu Hosé Sikemü áluaha éigini houn lilügüniña háguchi mudún. 13 Lariñagati Hakobu lun Hosé:

—Añahein bíbugañanu Sikemü óunigiraña mudún. Busentina lun bidin arihaña.

Aba lóunabun Hosé:

—Nídiba lau sun nugundan.

14 Lariñagati Hakobu:

—Beiba bariheime ida haña lan bíbugañanu habu mudún, ábame bagiribudun lau uganu nun.

Aba lóunahani Hakobu Hosé lúmagiñe fulasu wayati le gíribei Ebürón, dan le lachülürün Hosé Sikemü, 15 aba layuridagun áraabu. Ábati ladunragun aban wügüri luma, aba lálügüdüni:

—Ka báluahabei?

16 Aba lóunabuni Hosé:

—Náluahañanu níbugañanu, gayaraati hamuga san bariñaguni nun halía lan hóunigiraña mudún?

17 Lariñaga lun:

—Ñǘdünha yáagiñe, aganbatina hariñagun luagu héibuga lan Dotán.

Aba lidin Hosé hárigi líbugañanu, aba ladariruniña Dotán. 18 Aba harihini dísegiñe dan le liabin, aba heledegun lubá lun háfaruni hilagubei. 19 Aba hariñagun hámagua:

—Ariha humá, anitén labureme uénedü! 20 Higougu, áfara waméi hilagubei; lárigiñeme ábame wíchuguni lidoun aban fusu, wariñagame luagu houla lan aban animaalu áraabuna. Warihameti kaba lan asusereda lau burí luénedü!

21 Dan laganbuni Rubén katei le, aba labusenrun lun lesefuruni Hosé hawéi líbugañanu, aba lariñagun:

—Máfara waméi. 22 Máwiyuragüda humá hitaü. Chü huméi lidoun fusu, le lídanbei fulasu mageirawati, gama lumoun máfara huméi.

Lariñagunbei Rubén ítara, lun lesefuruni Hosé, óunaha láamugei lárigoun lun lúguchi. 23 Dan le lachülürünbei Hosé le ñeinhin habéi líbugañanu, aba hagidarunu ligounun luéi, 24 aba hárügüdüni, aba háguruni lidoun fusu ligía, málati fusu ligía, mábeiti giñe. 25 Lárigiñe aba hañuurun eiga. Sódini aba harihin saragu Ísümaelina hayabiña Galaadügiñe, barüina haña ibiñein burí hawagu halügüniña kameyu, bálüsamu, mira lun hanügüni Ehiptun. 26 Ábati lariñagun Hudá houn líbirigu:

—Ka wagañeiruña lau wáfaruni wamulen, lárigiñeme waramudei lounwen? 27 Lubaragiñe wáfaruni, aluguragubei waméi houn Ísümaelina; ladüga lárigiñe sun katei wamulentia.

Aba hánharun líbirigu lun le lariñagubei. 28 Dan le hásügürünbei Madianna ha alugurahabaña ñéingiñe, aba hasagaruni Hosé lídangiñe fusu, aba haluguruni houn Ísümaelina luagu wein murusun pülata. Ítara liña hanügüni Hosé Ehiptun.

29 Dan lagiribudunbei Rubén luagun fusu, kei madarirunlani Hosé lidan fusu, aba laheiridagunu ladaüragun le ligarigu. 30 Aba lagiribudun le ñeinhin habéi líbirigu, lariñaga houn:

—Úaali Hosé lidan fusu! Kábati nadüga guentó?

31 Ábati hanügünu ligounun Hosé, aba hadaseirunu lau lita aban gábara le háfarubei; 32 aba hóunahanu lun háguchi lau uganu le:

—Anuhán wadarirun. Arihabóun buidu anhein ligounun tubéi biráü, lumoun mama lan tuguya.

33 Dan le larihinbarun Hakobu, aba lariñagun:

—Tuguya, ligounun niráü! Áfarala somu animaalu áraabuna, houla!

34 Ábati laheiridagunu Hakobu ladaüragun aba ladaürün ludu, aba lamuiserun lárigi liráü; ayahuaha lumuti lounwen liráü luagu átiri dan. 35 Hóuchatiña yebe sun lirahüñü wügüriña hama würiña lun hámalihani, gama lumoun máhati lámalihoun; lubaragiñe lira ayahuaharügü ligíaha lárigi liráü, lariñaga:

—Namuisera lárigi niráü, darime nidin adunragua luma hadan hilaaña.

36 Aba haluguruni Madianna Hosé Ehiptu, lun aban wügüri gíriti Potifárü, hábuti lisudaranigu urúei Ehiptuna.