1 Aba lagúarun Hakobu houn lirahüñü, lariñaga houn:

—Yarafa humá, nariñagaali hun le lunbei lasuseredun hun líteme:

2 «Yarafa humá lun haganbun, lirahüñü Hakobu,

aganba huméi Hakobu le húguchi».

3 «Buguya Rubén, buguya niraübei le íbugañaü;

buguya nérebei, furumiñeti lin nere,

furumiñeti lidan uéiriguni, luma ubafu.

4 Gama lumoun mámaadibume furumiñeti,

ladüga ítara biña kei aban léibaaguagüle duna le mágüdahouati:

ladüga wíyeda bumutu nigabanan lau bagamaridunu nubúali.

5 «Simeón luma Lewí, gamulenuguátiña;

lánina anarimeni hárumate.

6 Mabusenruntina hamuga lun anahein lan

lidan fulasu le ñein lumuti hóundara!

Ladüga dan le gañi hamá, áfaraguatiña gürigia;

dan le gunda hamá áhalaha hamuti hagudi bágasu wügüriña.

7 Íñarawaguala hagañi le hanarimebei, le ítarabei kei igañi áraabuna!

Nachagaragubaña sunsuinagubei lidan sun fulasu le Ísüraelibei!

8 «Buguya Hudá, híchuguba bíbirigu uéiriguni bun.

Bárügüdübaña báganiñu luéigiñe hagiina,

ani bíbirigu guánarügü habuluchaguba bun.

9 Buguya, Hudá, niráü!

Ítara biña kei aban liraüraü liñún lárigiñe léigini líliru:

Aba lélemuchun, aba larounrun múarugu,

kamá hamuga aban liñún wéirihali

ani kábati ñüdün añawariha lun?

10 Úabei agidaruti ubafu luéi Hudá,

ni badun lánina gumadi le lúhaburugubei,

darime liabin labureme badun,

le lunbei haganbuni lílana fulasu lererun.

11 Gürá lumuti liraüraü lilügün burigü luagu lídibu beibei,

güraléi tiráü burigü luagu ídibu;

chibá lumutu ladaüragun tidan diwéin,

chügülóun lumandan lidan lita beibei!

12 Funougati lagu tárigi diwéin,

harú burí ligía lari lárigi míligi.

13 «Sabulón, láruba barana laganawa,

le ñein lubéi wafu tun ugunei.

Lachülürüba láfadaragun lufulasun chülǘ Sidón.

14 «Isakárü, aban animaalu héreti le anaaguti ilaü ligía,

le emeraagubei tidan haban animaalu.

15 Dan larihinbei luagu buidu lan fulasu,

buidu ligía lun emeraaguni,

aba lélemuchun lun lanügün ilaü,

aba líchaagun lungua idamunime masigenehanga.

16 «Lagumadirubaña Dan lumutuniña guánarügü

kei aban hádangiñe lani Ísüraeli türibu.

17 Ítara luba Dan kei aban hewe to lárutu üma,

to ágürübalin lihilin lugudi gabayu,

aba téiguadagüdüni le agalufehabalin gabayu.

18 «Nabureme, agurabatina besefurunina!

19 «Hábürühaba súdaragu luagun Gadü,

gama lumoun lárigiñeme, ligíahalime éibaahaña.

20 «Aniheinbei saragu éigini luma Aserü;

líchuguba éigini le libe heigin urúeigu.

21 «Ítara liña Nefütalí kei aban usari to éibugutu farañu,

to hautu harahüñü usari buíduburitiña.

22 «Ítara liña Hosé kei aban nadü laru duna

to aginduboun saragu,

ani wariguati tilimun luagun baríeiru.

23 Iyereeguti houn taburiña gimara,

chǘguatiña gimara luagun,

ani súnwandan hañawarihaña lan lun;

24 gama lumoun héreti larüna Hosé ani suruñutiña ligimaran;

seremei lun Bungiu le gabafubei le Lubungiute Hakobu!

Seremei lun liri hóuniri mudún, le ágüdahabalin Ísüraeli!

25 Teinki lun Lubungiute búguchi le lunbei líderagunibu;

lun Bungiu Suntigabafu, le lunbei labinirunibu!

Lau burí abiniruni íñugiñeti sielu!

Lau burí abiniruni lídangiñeti barana huliliti!

Lau abiniruni le lani aniguagu luma urageirugu!

26 Biní lumutibu búguchi,

sügǘ lau habinirunina nagübürigu.

Ñeinbei abiniruni burí le lóugiñe lichügü Hosé

chülǘ lumoun lébeha burí wübü le magumuchadibei,

ani anuadirúati Hosé hádangiñe líbirigu.

27 «Aban ounli áraabuna hanarimeti Benhamín,

le éigibalin líliru binaafin,

aba lafanreinhani lígiragun rábounweyu».

28 Añahán duusu türibu lani Ísüraeli, ligía giñe lariñagubei háguchi houn lirahüñü dan le labinirunbaliña kada aban.

29 Aban weyu, aba lariñagun Hakobu houn lirahüñü:

—Madiseeli lun nounwen, hábunaname harugabu nagüchagu lagadábugiñe dübü le lídanbei lufulasun Efürón le Étüna, 30 yágüta lidan lumúan Kanán, lagadábugiñe dübü le Maküpelábei ligibugiñe Mamüré, le meha lagañeihabei Abüraámü úara luma lufulasun Efürón lun hamúahabei lan waduheñu. 31 Ñein labunúa Abüraámü tau sun Sara to lúmari; Isaakü tau sun Rebeka to lúmari; ñein giñe nábunoun Lía. 32 Fulasu luma lagadábugiñe dübü le ñeinbei, hámagiñe Étüna lagañeihóua.

33 Dan lásurun lariñaguni Hakobu sun burí katei le houn lirahüñü, ábaya larounrun tidoun ligabanan, aba lounwen.