1 Lariñaga Bungiu lun Hakobu:

—Saraba, beiba aganawa Beteli. Badügame aban latarü lidan fulasu ligía lun Bungiu le meha arufudagubei lungua bun dan le banurahanbei luéi bíbugaña Esaú.

2 Ábati lariñagun Hakobu houn liduheñu hama sun ha úarabaña luma:

—Sagá humaña sun búngiugu terenchatiña ha húmabaña, hágawa, ábame hasansirunu hadaüragun Sikemü. 3 Keimoun Beteli furese; nadügüba aban latarü ñein lun Bungiu le íderagubalina lidan buga nidiheri, le giñe ñǘdünhalibei le ñein lumuti nidin.

4 Aba hederegeruniña sun guáriua terenchatiña lun Hakobu tuma burí arigeilaü to luáguboun harigei, aba lábununi Hakobu sun le tábugiñe aban tídibu wewe gíritu ensina to yarafaboun lun Sikemü. 5 Dan le háfuridunbei, aba ladügün Bungiu lun hanufudedagun sun gürigia ha lídanbaña fulasu ligía, ligíati méibaahanhabaniña lirahüñü Hakobu.

6 Aba lachülürün Hakobu hau sun gürigia ha lúmabaña lidoun uburugu Lusu le giñe gíribei Beteli, le lumúanrugubei Kanán. 7 Aba ladügün aban latarü ñein, aba láchuni fulasu ligía Beteli ladüga ñein meha larufudagua Bungiu lungua lun dan le meha lanurahanbei luéi líbugaña. 8 Ñein giñe tounwe Débora to meha würi to óunigirubarun Rebeka, aba hábununu tábugiñe aban tídibu wewe to ensina yarafa lun Beteli. Aba láchuni Hakobu fulasu ligía «Lani Ayahuahani Ensina».

9 Dan le lagiribudunbei Hakobu Padán-aramügiñe, ábaya larufudagun Bungiu lungua lun, aba labiniruni, 10 ariñageina:

«Hakobu bíribei,

gama lumoun mámaalime ligía biri;

lúmagiñe guentó Ísüraeli ligíaba biri».

Lárigiñe lasansiruni Bungiu liri Hakobu, 11 aba lariñagun lun:

«Au Búngiubei le Suntigabafu.

Gibe hamá birahüñü hama badügawagun.

Hayabinba aban néchani bídangiñe hama saragu gürigia,

añaheinbaña urúeigu hadan badügawagun.

12 Múa le níchugubei lun Abüraámü luma lun Isaakü,

ru numuti giñe bun,

bárigiñeme, ábame níchuguni houn badügawagun».

13 Dan le lidin Bungiu lídangiñe fulasu le ñein lubéi ladimureha luma Hakobu, 14 aba lanügün Hakobu aban dübü aba líchuguni kei aban seini lidan fulasu le ñein lubéi buga ladimureha Bungiu lun, aba lanúadiruni lun Bungiu lau láhurudaguni lau garaba tuma diwéin, 15 aba líchugun liri fulasu ligía Beteli.

16 Lárigiñe aba houdin Beteligiñe, dan le díseraügiña luéi Éfürata aba tágurahan Rakeli; gama lumoun hénrenguti tágurahan. 17 Lidan oura létima lénrengun aba tariñagun ágüdahatu tun:

—Manufudedabá, garaüyaadibu aban eyeri irahü.

18 Gama lumoun tuguya yarafaaru buga lun tounwen, lidan lagumuhóun tawaragun, aba tíchugun liri irahü ligía: Benoní,* ánheinti lúguchi aba líchugun Benhamín* luagu.

19 Ítara liña tounwen Rakeli, aba hábununu luagu lémeri Éfürata, le Belén guentó. 20 Aba líchugun Hakobu aban seini luagu tumuaha, ligíati seini le arufudubalin tumuaha Rakeli guentó.* 21 Aba lasigiruni Hakobu lémeri aba lerederagun yagürounmeme luéi luayelesin Éderü.

22 Luagu aban weyu, dan le laganóunbei Hakobu lidan fulasu ligía, aba lidin Rubén aba larounrun tuma Bilá to lúmari lúguchi. Dan le lasubudirunbalin Hakobu, aba lagañidun saragu.

Dúusuñanu buga lirahüñü Hakobu. 23 Ha lirahüñü tau Lia; Rubén le íbugañaü, Simeón, Lewí, Hudá, Isakárü luma Sabulón. 24 Lirahüñü tau Rakeli Hosé luma Benhamín. 25 Lirahüñü tau Bilá, to tidamun Rakeli, Dan luma Nefütalí; 26 lirahüñü tau Silüpá, to tidamun Lía, Gadü luma Aserü. Añahán lirahüñübaña Hakobu ha águrahoubaña Padán-aramü.

27 Aba lidin Hakobu arihei Isaakü le lúguchi, lidan fulasu le Mamüré, uburugu lememe giñe gíribei Arübá o Ebürón. Aganawaali meha Abüraámü ñein luma Isaakü, 28 san-gádürü-wein irumu labagaridun Isaakü. 29 Lidan irumudiri le lounwe aba lidin óundara hama lagüchagu dan le hilaali, aba lábununi Esaú luma Hakobu ha lirahüñü.