1 Aba lidin Hosé íchigei uganu lun urúei. Aba lariñagun lun luagu ñǘbuinhali lan lúguchi hau líbirigu Kanangiñe, luagu añaheinhaña lan lóubawagu Gosén, hau halügüniña mudún, bágasu labu sun hámati.

2 Aba lanúadahan seingü hádangiñe líbugañanu aba larufuduniña lun urúei lun lasubudirúniña. 3 Ábati lálügüdüniña urúei líbugañanu Hosé:

—Ka huádigimaribei?

Aba hóunabuni hariñaga lun:

—Óunigira mudún wafisiutebei kei meha wagüchagu. 4 Wayabiña lun werederun lidan ageiraü le, ladüga wéiriti ilamaü Kanán, ani úati éigini ñein houn walügüniña mudún. Adüga humá fulesei woun, ru humá üma woun lun werederun aganawa lóubawagu Gosén.

5 Lariñagati urúei lun Hosé.

—Liábiña búguchi hau bíbirigu lun herederun buma. 6 Anihán lumúan Ehiptu huéi, adüga huméi le habusenrun lau. Rubei lóubawagu Gosén houn, ladüga ligía fulasu buítimabei lídangiñe sun wageira lun herederun aganawa ñein. Ánhabu giñe asubudira luagu añahein lan gayaraatiña hadan, rúbaña lun hamainiruniña yégüniña bágasu.

7 Aba giñe lanügüni Hosé Hakobu le lúguchi, lun lasubudiruni urúei. Aba labusurun Hakobu lun urúei lau saragu inebesei, 8 aba lálügüdüni urúei lariñaga lun:

—Átiri irumu bau guentó?

9 Aba lóunabuni Hakobu Lariñaga lun:

—Aniheinhali san-darandi irumu nau éibuga yagüroun yaroun. Fureseti lásügürün murusun dan le winwan náalibei ani hénrenguti saragu lídangiñe irumu le winwan náalibei. Mawinwandun nágili giñe saragu irumu le meha hawinwandubei nagüchagu.

10 Lárigiñe aba layouragun Hakobu lun urúei, aba lidin ñéingiñe. 11 Aba líchugun Hosé múa houn lidan lubuidun-agei Ehiptu lun haganóun ñein, kei buga lariñaguni urúei. Ítara liña liabin lúguchi hama líbirigu lun buga gamúan hamá lóubawagu Ramüsési. 12 Ru ligía burí Hosé éigini houn sun liduheñu según hemegeirun.

13 Úati buga türigu lidan sun fulasu, aweiridagueina ligíatima ilamaü. Gíbetiña hádangiñe Ehiptuna hama Kananna óunwegutiña halama. 14 Aba lóundaruni Hosé sun seinsu le lebegi hagañeihan Ehiptuna hama Kananna türigu, aba lareiduni tidan luban urúei. 15 Dan le úaali seinsu Ehiptu, ni Kanán, aba houdin sun Ehiptuna ariñaga lun Hosé:

—Ruba éigini woun! Marichati lun barihiniwa óunwegua walama ladügarügü maseinsunhaadiwa lan.

16 Aba lóunabuniña Hosé lariñaga houn:

—Anhein maseinsunhaadün lubéi, barǘ humaña hibiñanigu, nasansirubaña hun luagu türigu.

17 Aba hanügüniña Ehiptuna halügüniña gabayu, mudún, bágasu hama burigü lun Hosé, aba líchugun Hosé türigu houn hawagu sun animaalugu hagía, sun irumu ligía. 18 Aba lásügürün irumu ligía, leweñegua irumu ábaya houdin ariñaga lun Hosé:

—Siñati wasigeneruni bun luagu maseinsunhaadiwa lan; hayabin meha wabiñanigu, bibiñaniguhaaña, úaali amu katei wama lun wíchuguni bun luéidigia wamúan luma wágubu. 19 Agañeihabawa lau sun wamúan luagu türigu. Werederuba lidamunme urúei, wawadigimarideime wamúan lun. Ruba ilaü woun gayara láamuga wabagaridun, meferidirun láamuga giñe múa. Kábagia uagu bígirawa óunwegua úara luma wamúan?

20 Ábati lagañeihani Hosé sun lumúan Ehiptu lun urúei, aba haluguruni sun Ehiptuna hamúan ladüga halama. Ítara liña lásügürün múa labun lubafu urúei, 21 aba hayabin Ehiptuna lun idamunibaña lan lidan sun Ehiptu. 22 Hamuanrügüñein fádirigu magañeihan lan Hosé, ladüga rútiha urúei türigu houn; malugurun hamuti lubeiti hamúan, ladüga hóutiñaha lídangiñe le líchugubei urúei houn.

23 Lárigiñe aba lariñagun Hosé houn gürigia:

—Guentó, huguya lau sun humúan lánihadün urúei, ladüga agañeiha naadün lun. Anihán ilaü lun hábunaguni múa, 24 gama lumoun mosu híchuguni aban lídangiñe kada seingü murusun lídangiñe halubahan lun urúei, le líbiri gádürü lerederame lun hábunaguni múa, ani lun heigin huguya, hirahüñü hama sun ha aganóubaña huma.

25 Aba hóunabun:

—Areidatibu woun, sefu baali wabagari. Lidamunbadiwa urúei!

26 Ítara liña líchuguni Hosé kei lúrudu lidan sun Ehiptu, lun lichugún liseingün fánreinti lídangiñe alubahani lun urúei. Aniheinmémegua lúrudu ligía guentó ñein, ánhañati fádirigu mafayeihantiña ni kata, ladüga magañeihan lumuti meha urúei hamúan.

27 Aba herederun Ísüraelina aganawa Ehiptu. Aba hanügüni Gosén hánime, aba hagibedagun ñein. 28 Disedüñein irumu lau Hakobu aganawa Ehiptu, aba lachülürün lumoun san-bián-wein-sedü irumu. 29 Aban weyu aba lasandiruni Hakobu luagu lounwe lan ábati lóunahan agúara luagu Hosé, lun lariñagun lun:

—Anhein inarüni lubéi luagu busén ban badügün aban fulesei nun, rubei búhabu lábugiñe niyada, báfiñurame nun luagu badügübei lan le lunbei namuriahani buma. Adügabá fulesei nun, mábunabana Ehiptu! 30 Danme nounwen basagaraname Ehiptugiñe bídinme ábunana lidan hamúaha nagüchagu.

Lóunabeiti Hosé:

—Ítara luba nadügüni.

31 Lariñaga lúguchi lun:

—Fiñubei nun. Aba láfiñuruni Hosé, ábati labuluchagun Hakobu tuagu tichügübarari ligabanan.