1 Átiri dan lárigiñe, aba lóuchaguni Bungiu lafiñen Abüraámü. Aba lagúarun lun lau liri, aba lóunabun Abüraámü:

—Anahán ya.

2 Aba lariñagun Bungiu lun:

—Barübei biráü Isaakü, le ábanrügübei, le hínsiñebei bun, beiba lau lóubawagun Moriá. Bachülürünme ñein, ábame bíchuguni kei adagaragüdüni gudawarügüti luagu aban wübü le lunbei narufuduni bun.

3 Larugan, binaafingiua aba lásaarun Abüraámü, aba laranseruni lilügün burigü, chaünlei watu lun adagaragüdüni, aba lidin lau sun Isaakü le liráü lidoun fulasu le uágubei lariñaga Bungiu lun hama biama hádangiñe lumusuniña. 4 Ǘrüwa weyu lárigiñe, ligía larihini Abüraámü fulasu ligía dísegiñe. 5 Ábati lariñagun houn lumusuniña:

—Redei humá ya lau burigü. Au luma irahü le, wawansera wabaruaguóun, ábame wafurieidún, ábame wagiribudun.

6 Aba lanügüni Abüraámü lílemena adagaragüdüni, aba líchuguni légewagu Isaakü, aba lanügünu gusiñu luma watu gemeti, aba houdin úara. 7 Málüti lúmagiñe aba lariñagun Isaakü lun Abüraámü:

—Núguchi!

—Ka babusenrubei niráü? —liña lóunabuni Abüraámü.

Lariñaga Isaakü:

—Anihán ílemei wama luma watu gemeti, gama lumoun hagéi san mudún lun adagaragüdüni?

8 Aba lóunabun Abüraámü:

—Líchugubei Bungiu mudún lun adagaragüdüni, niráü.

Aba hasigirun éibugeina úara. 9 Dan le hachülürünbei lidoun fulasu le uágubei lariñaga Bungiu lun Abüraámü, aba ladügün Abüraámü aban latarü aba línchaguni watu; lárigiñe aba lagüraguni Isaakü le liráü, aba líchuguni luagu latarü ligibuagu watu; 10 gama lumoun dan le lanügünu gusiñu lun límiraguni liráü, 11 aba lagúarun lani Bungiu ánheli lun Abüraámü siélugiñe:

—Abüraámü! Abüraámü!

Aba lóunabun Abüraámü:

—Anahán ya, Nabureme.

12 Lariñaga lani Bungiu ánheli lun:

—Madügabá damichi lun irahü le, ladüga subudi naali luagu inebe lan Bungiu bun, ladüga mamahantibu lau biráü le ábanrügüti nun.

13 Ábati larihin Abüraámü aban gábara dahigu luéigiñe liganchun lidan búbugati, aba lidin, aba lárügüdüni gábara ligía, aba líchuguni kei adagaragüdüni gudawarügüti leweñegua liráü. 14 Lárigiñe aba líchugun Abüraámü liri fulasu ligía: «Ru lumuti Bungiu le emegeirubei». Ligía ariñawagúagili lubéi: «Luagu aban wübü, ru lumuti Bungiu le emegeirubei».

15 Aba lagúarun lani Bungiu ánheli lun Abüraámü siélugiñe luagu libiaman wéiyaasu, 16 lariñaga lun:

—Lariñahare Bungiu: «Ladüga badügüni katei le, mamahantibu lau biráü le ábanrügüti nun, fiñutina nuagu guánarügü luagu nabinirubadibu lan saragu. 17 Nadügüba lun gibe hamá badügawagun kei waruguma ha siélubaña, kei giñe lagu sagoun le lárubei beya. Hagañeirubaña giñe háganiñu súnwandan, 18 habinirúba giñe sun néchani ha ubouagubaña hádangiñe ladüga adüga baali le nubeibei».

19 Aba lagiribudun Abüraámü lidoun fulasu le buga ñein lubéi lígiraña lumusuniña. Lárigiñe aba houdin súngubei úara uburugun Bérüsewa, le ñein lubéi leredera Abüraámü aganawa.

20 Átiri dan lárigiñe, aba laganbun Abüraámü luagu garahüñüharu lan giñe Milüká lau Naoru le lamulen. 21 Furumiñeti haráü Usu, lárigiñe Busu luma Kemueli le lúguchibei Aramü. 22 Lárigiñe aba hagaraüdǘniwa Késedi, Asó, Pilüdási, Idiláfü luma Betueli. 23 Betueli ligía, ligía túguchibei Rebeka. Añahán widü irahüñü ha tirahüñübaña Milüká lau Naoru le lamulen Abüraámü. 24 Garahüñüti giñe buga Naoru tau Reumá to tibiaman lúmari. Irahüñü hagía: Teba, Gaamü, Taasi luma Maaká.