1 Ábaya lagamaridun Abüraámü aban würi gíritu Keturá. 2 Añahán lirahüñübaña tau: Simürámü, Hokusán, Medán, Madián, Isübákü luma Sua. 3 Hokusán ligía meha lúguchibei Seba luma Dedán. Asuruna, Leluséuna hama Leumeuna, hagía ladügawagunbaña Dedán. 4 Lirahüñü meha Madián, Efá, Éferü, Anoku, Abidá luma Elidá. Sun ha tadügawagun Keturá.

5 Rédeiti sun lúmati Abüraámü lalaganteme Isaakü. 6 Ha harahüñü híbiri lúmarigu rúrügüti idewesei houn, dan meha wínwangili aba lóunahaniña dise luéi Isaakü lóubawagun fulasu le ñéingiñe lubéi laboucha weyu.

7 San-ǘrüwa-wein-keinsi irumu labagaridun Abüraámü. 8 Aba lounwen lídangiñe sandi dan le wéirihali lueiyan. Ítara liña lóundarun hama lagüchagu. 9 Aba lábununi Isaakü luma Ísümaeli ha lirahüñü lidan lagadábugiñe dübü le gíribei Maküpelá le luéigiñebei oubaü le ñéingiñe lubéi laboucha weyu libiti Mamüré, lidan lufulasun Efürón, le liráü Sóarü le Étüna. 10 Ligía fulasu le buga lagañeihabei Abüraámü hámagiñe Étüna. Ñein labunúa Abüraámü tóubagiñe Sara to lúmari. 11 Lárigiñe lounwen Abüraámü, aba labiniruni Bungiu Isaakü, le buga erederubei aganawa lurugabu fusu le gíribei «Wínwanti le aríagubei nun».

12 Añahán ladügawagun Ísümaeli le liráü Abüraámü tau Agarü Ehiptuna to tidamun Sara, 13 lúmagiñe furumiñeti lumoun agumuhóuni: Nebaiotu, furumiñeti; lárigiñe Kedarü, Adübéeli, Mibüsámü, 14 Misümá, Dumá, Masá, 15 Adarü, Temá, Heturu, Nafisi, Kedümá. 16 Anihán híribei duusu lirahüñü Ísümaeli, laumeme giñe iri burí ligía lasubudirúa hageira tuma hakianpun-agei. Kada aban ligía guánarügü hábutibei lumutuniña. 17 San-darandi-sedü irumu lau Ísümaeli ligía lounwen, ítara liña lóundarun hamoun lagüchagu. 18 Aba haganóun ladügawagun lidan fulasu le labadinaguabei Awilá luma Suru, le ligibugiñebei Ehiptu dan le liabiniwa Asiriagiñe; ñein latokara houn lun haganóun, lau sun magundan hamá yebe híbirigu.

19 Anihán asusereduti le luáguti Isaakü le liráü Abüraámü. 20 Bián-wein irumu lau Isaakü dan le lamarieidunbei tuma Rebeka to liráü Betueli, litu Lawán, Aramüna ha meha aganóubaña Padán-aramü. 21 Keiti siñá lan tagaraüdün Rebeka aba layumuragun Isaakü tuagu lun Bungiu. Aba laganbuni Bungiu lafurieidun, aba tadageinadun Rebeka. 22 Keiti hageindagun mádounu turageirugu, aba tasaminarun:

«Anhein ítarameme luba lubéi katei le, kagia hu lan nabagaridun?» Ábati tálügüdahan luagu katei le luma Bungiu. 23 Aba lóunabunu:

«Añahein bián néchanigu burageirugu;

bián ageiraü ageindagua hámagua lubaragiñe hágurahoun.

Hérebei aban luéi le aban,

le íbugañaü lábugiñebei lugumadin le amuleñein».

24 Aba lachülürün dan lun tágurahan Rebeka, aba hayabin mádounu. 25 Le águrahoubei furumiñe, funati lídiburi, háyuti giñe lura, aba híchugun Esaú luagu. 26 Lárigiñe aba liabin lamulen ragüñu luagu lihilin lugudi Esaú lau aban lúhabu, ligía híchugunbei Hakobu luagu. Ǘrüwa wein irumu lau Isaakü dan le tágurahanbaliña Rebeka.

27 Aba haweinamudun irahüñü ha. Áraabu lifisiutebei Esaú luma éibaahani, ánheinti Hakobu, aban wügüri darangiluti, hínsiñeti lun lun lerederun tidan kianpu. 28 Keiti hou lan Isaakü hádangiñe animaalugu ha léibaahabaña Esaú, hínsiñetimatiti lun, ánhounti Rebeka hínsiñetimati Hakobu tun.

29 Luagu aban weyu, lábouguña Hakobu, ligía liabin Esaú áraabugiñe buchá luagu 30 aba lariñagun lun:

—Adügabá fulesei nun, ruba murusun lídangiñe gisóu funati le búmabei ñein nun, ladüga láfaraadina ilamaü. Ligía hariñagunbei lun Edomu.

31 Aba lóunabuni Hakobu:

—Furumiñe ru yebebéi biricha nun keisi íbugañaü.

32 Aba lariñagun Esaú lun:

—Kei le aubei barihinina, nóunweña nilama, kati hu lan liricha íbugañaü nun?

33 Lariñaga Hakobu lun:

—Fiñuba.

Aba láfiñurun Esaú, aba líchuguni liricha keisi íbugañaü lun Hakobu. 34 Aba líchugun Hakobu fein luma lenteha gisóu lun Esaú. Lásurun leigin, gurá ligía, aba lásaarun aba lidin. Ítara liña líchugun mebereseni luagu liricha keisi íbugañaü.