1 Aba lóunahan Iramü le lurúeite Tiru wügüriña lau uganu lun Dawidi, bóugudin hawéi ábunagutiña muna, hama sarafangei lau wewe le hibúari lun hábunagunu palasiu lun. 2 Ábati gunfuranda lani Dawidi luagu ru laali lan Aburemei lurúeiteme Ísüraeli, ladüga awansegüda laali larúeihan saragu hadan Ísüraelina ha lumutuniña.

3 Aba lamarieidun Dawidi hama amu würiña Herusalén, aba haganwoundun lirahüñü. 4 Lirahüñü ha águrahoubaña Herusalén: Samúa, Sobabü, Natán, Salomón, 5 Ibarü, Elisúa, Elipéleti, 6 Noga, Néfegü, Hafía, 7 Elisamá, Eliadá luma Eliféletü.

8 Dan hasubudirunbalin Filistéana luagu lurúeitehali lan sun Ísüraeli Dawidi, aba houdin sun hagía áluahei; gama lumoun aba lasubudiruni Dawidi, aba láfuridun habaroun. 9 Ábati hawanserun Filistéana aba hebelurun luéigiñe fulasu wayati le lani Refaímü. 10 Ligía lébubei lálügüdahan Dawidi luma Aburemei, lariñaga lun:

—Gayaraati san nageindagun hama Filistéana? Bagañeiragüdübei san wuribu nun?

Lariñaga Aburemei lun:

—Bageindagua hama, nagañeiragüdübei wuribu bun.

11 Aba lamudeirun Dawidi Baali-perasímü, ageindagua hama, aba lagañeiruni wuribu. Ligía lébubei lariñagun:

—Daraali Aburemei üma nun habadinaguagiñe náganiñu kei lásügürün duna héreti.

Aba hagúaruni fulasu ligía Baali-perasímü. 12 Ígira hamutiña giñe Filistéana habungiutegu, aba lóunahan Dawidi águdaña.

13 Gama lumoun ábaya hebelurun Filistéana luéigiñe fulasu wayati le lani Refaímü, 14 ábayati lálügüdahan Dawidi luma Aburemei, lariñaga Aburemei lun:

—Mageindaguabá hama hagibugiñegiñe, geyeguabaña, ábame bábürühan hawagun hanagangiñe danme bachülürün lumoun burí tídibu bálüsamu. 15 Danme baganbun areinchuni lóugiñe tídibu wewe, gumesebá ageindagua, lugundun larufuduñein lira luagu anangüra lan bubá bubá lun náfaraguniña súdaragu Filistéana.

16 Aba ladügüni Dawidi le lariñagubei Aburemei lun, aba láfaraguniña Filistéana lúmagiñe Gabaóngiñe darí Géserü. 17 Ábati laganbahoun luagu Dawidi lidan sun burí fulasu, aba ladügün Aburemei lun hanufudedun sun néchanigu luéi.