1 Aba hóundaragun sun Ísüraelina aba houdin Ebürón adimureha luma Dawidi. Hariñaga lun:

—Ábanmeme gürigia wagía buma, 2 lau sun Saulu lan meha urúeibei, buguyaha adundehabalin Ísüraeli dan le láfuridun ageindagua. Ani ariñagaali giñe Bungiu le Bubungiute bun luagu buguyaba lan alidihaña lílana Ísüraeli le lageira.

3 Ñǘbuintiña sun wéiyaaña mutu ha lílana Ísüraeli adimureha luma Dawidi Ebürón, aba ladügün aban daradu hama, líchigei Bungiu keisi gefenti. Ábati hanúadiruni Dawidi keisi lurúeite Ísüraeli, kei meha füramasegüdalani Bungiu lun Samueli.

4 Aba lidin Dawidi hau sun Ísüraelina Herusalén lememe Hebusu. Lidan meha fulasu ligía haganawa Hebusuna, 5 ábati hariñagun lun Dawidi:

—Mebelubadibu ñahoun.

Gama lumoun aba lárügüdüni Dawidi uburugu gabarieirunti le Sionbei, le gíribei luburugute Dawidi guentó. 6 Ariñagaali méhati Dawidi:

—Le ábürühati furumiñe hawagun Hebusuna, níchugubei lun ligía lan furumiñeti ábuti.

Hoabü le liráü Seruiá, ligía ábürühabei hawagun furumiñe aba lichugún ábutime. 7 Lárigiñe aba laranseragun Dawidi lungua lidan uburugu gabarieirunti; ligía hariñagunbei lun luburugute Dawidi. 8 Aba lachawaraguni Dawidi uburugu bóugudin geyegua lau baríeiru, ánheinti Hoabü ábaya lararamagüdüni le líbiri uburugu. 9 Aba aganwoundeina lan lubafu Dawidi ani ñeinñein meha Aburemei Suntigabafu luma.

10 Añahán habuidun-agei lisudaranigu Dawidi, ha lúmagiñebaña lidan larúeihan, ha úaradubaña hama sun Ísüraelina lun híchuguni urúeime, kei meha lasubudiragüdüni Bungiu houn Ísüraelina.

11 Anihán hiri habuidun-agei lisudaranigu Dawidi: Hasobeámü, le liráü Akümoní, hábuti ǘrüwa ha ganigitimabaña, le áfarubei ǘrüwa-san wügüriña luagu aban dan lau larufunte. 12 Lárigiñe Hasobeámü, Eleasárü, le liráü Dodó, le Aoita, le ábanbei hádangiñe ǘrüwa ha ganigitimabaña. 13 Ñeinñein meha luma Dawidi Pasü-damimü, dan le hóundaragunbei Filistéana ñein lun wuribu. Ñeinñein meha aban ichari bunawaguati lau sebada, danti le héibaagunbei súdaragu Ísüraelina hawéi Filistéana, 14 aba lararamun lamidangua ichari ligía, aba lageindagun hámagiñe Ísüraelina, aba láfaraguniña Filistéana. Ítara liña lagañeiragüdüni Bungiu wuribu houn.

15 Luagu aban weyu, aba houdin ǘrüwa hádangiñe darandi ganigitiña luagu dübü adunragua luma Dawidi lidan lagadábugiñe dübü le Adulámü. Ñeinñoun hakianpun-agei súdaragu Filistéana luagu fulasu wayati le gíribei Refaímü. 16 Ñéinñeinti Dawidi lidan uburugu gabarieirunti, sun añaha lan fiu súdaragu Filistéana Belén. 17 Lariñagati Dawidi:

—Nadariradügü hamuga kaba lan íchiga duna le lídangiñeti fusu le Belenbei nun lun natun!

18 Ábati hebelurun ǘrüwa ganigitiña hagía tidoun hakianpun-agei Filistéana, aba hadaburun duna lídangiñe fusu le lubenaribei Belén, aba hanügüni lun Dawidi. Gama lumoun máhati Dawidi látuni, ábarüga láwiyuruni keisi idewesei lun Aburemei, 19 lariñaga:

—Sefulána Bungiu luéi nátuni duna le! Kéigubeirügü hamuga nátuñein lan hata wügüriña ha, lugundun ru hamuti habagari lidoun denchaü lun houdin adaburei!

Máhati lun látuni.

Anihán asusereduti le, ǘrüwa ganigitiña adügübalin.

20 Awisái, le líbugaña Hoabü, ligía meha hábutibei darandi ganigitiña hagía. Luagu aban dan, aba lageindagun hama ǘrüwa-san wügüriña tau lefeinte, aba láfaraguniña. Ítara liña laganbahoun luagu hadan darandi ganigitiña. 21 Ani ibihati saragutima uéiriguni sügǘ hau sun hagía, ñǘbuinti lun hábutibei lan. Gama lumoun machülüti lun ítarabei lan kei ha furumiñetiña ǘrüwa.

22 Benaíasi, le liráü Hoyadá, le Kabüséelina, aban meha wügüri ganigiti, áfarati bián hígandei Moábüna, hanarimeti laganbahóuniwa hawagu. Luagu aban weyu dan le lábürühaña lubéi niewe, aba laragachun lidoun aban fusu mábeiti, aba láfarun aban liñún ñein. 23 Áfarati giñe aban Ehiptuna gágubuti, yarafa lun bián méturu dimí liñun, ñeinñoun aban eféin luma kamá hamuga agouhagülei. Aba lidin Benaíasi luagun lau aban wewe, aba lagidarunu lefeinte luéi, aba láfaruni tau guánarügü. 24 Lau ladügüni Benaíasi katei le, aban laganbahóuntima luagu hadan darandi ganigitiña; 25 ani ibihatimati uéiriguni sügǘ hau, gama lumoun machülüti ítarada kei ha furumiñetiña ǘrüwa. Aba líchuguni Dawidi lun ligía lan hábuti súdara ha óunigirubalin.

26 Anihán hiri ha ganigibaña: Asaeli, le lamulen Hoabü; Elanán, le liráü Dodó le Belenna; 27 Samotu, le Aroduna; Elesi, le Palütíta; 28 Irá, le liráü Ikesi, le Tekoana; Abieserü, le Anatótuna; 29 Siwekái, le Usaana; Ilái, le Aoita; 30 Maarai, le Netofána; Éledi, le liráü Baaná, Netofána giñe; 31 Itái, le liráü Ribái, le Gibeana, le lumúanrugubei Benhamín, Benaíasi, le Piratónna; 32 Idái, le Gáasüna; Awieli, le Arübátüna; 33 Asümáweti, le Baurimüna; Eliabá, le Saalübónna; 34 lirahüñü Hasén, le Gisonna; Yónatan, le liráü Sagé, le Ararátüna, 35 Ayamü, le liráü Sakarü, Ararátüna giñe, Elifáli, le liráü Uru; 36 Éferü, le Mekerátüna; Aíasi, le Pelonna; 37 Esürái, le Karümélina, Naarái, le liráü Esübái; 38 Hoeli, le lamulen Natán; Mibarü, le liráü Agürái; 39 Sélekü, le Amonna, Naarái, le Beerotuna, le anaahabarun lárumate Hoabü, le liráü Seruiá; 40 Irá, le Hatirüna, Garebü, le giñe Hatirüna; 41 Uríasi, le Étüna; Sawadü, le liráü Alai; 42 Adiná, le liráü Sisá, le ladügawagun Rubén, le hábuti ladügawagun Rubén, hama darandi wügüriña luma; 43 Anán, le liráü Maaká; Hosafátü, le Mitüníta; 44 Usíasi, le Asütarótuna; Samá luma Heieli, ha lirahüñü Otamü, le Aroerüna. 45 Hediaeli, le liráü Simürí, luma Hoá le lamulen, le Tisita; 46 Elieli, le Manaímüna; Herebái, luma Hosawía, lirahüñü Elináamü, Itümá le Moábüna; 47 Elieli, Owedi luma Haasieli Sobana.