1 Luagu aban dan, lidan lidaani háfuridun urúeigu awuribuha, aba liabin Hoabü hau lánigu aba lárügüdüni hageira Amonna. Aba lidin luagun, aba legeyedaguni Rabá aba lábürühan luagun darí lagünrinchaguni. Sunti dan le anihein buga Dawidi Herusalén. 2 Lárigiñe aba lagidaruni Dawidi ridi golu le gawaguti dübü buíduburiti lábulugugiñe harúeite Amonna, ǘrüwa-wein-duusu líburu lihürü, aba hadaürüni luagu Dawidi. Sagati giñe Dawidi saragu katei gebegiti uburugugiñe, 3 sagaláña gürigia ha erederubaña uburugu, aba líchuguniña nadagimein lau siyara, reeka le lauti gürabu tuma harawa. Ligiaméme ladügübei Dawidi lau sun burí haburugute Amonna, lárigiñe aba lagiribudun hau luwügüriñanigu uburugun Herusalén.

4 Lárigiñe ñeinñein aban wuribu hama Filistéana Géserü. Lidan dan ligía, aba láfaruni Siwekái le lílana Usá Sipái le hadügawagun hígandei. 5 Lidan ábanya wuribu hama Filistéana, aba láfaruni Elanán le liráü Hairü, Lamí le lamulen Goliadi le lílana Gatü. Wéiriti tihürü luma tigaranan tebu lefeinte.

6 Ñéinñeinya aban wuribu Gatü. Ñeinñein aban wügüri gágubuti, dúusuñein lirahüñü lúhabu, duusu lirahüñü lugudi, sisi luagu kada aban. Hadügawagun giñe hígandei, 7 gama lumoun aba láluahan wuribu hama Ísüraelina, aba láfaruni Yónatan, le liráü Simá le líbugaña Dawidi. 8 Hígandei burí ha, ladügawagun Refa le lílana Gatü, gama lumoun áfaragua lumutiña Dawidi hau lani úfisigu.