1 Dan meha le anihagua lubéi Dawidi aramudagu luéi Saulu le liráü Kisü, aba houdin fiu wügüriña ganigitiña ha lúnbaña lánigubaña lan óundaragua luma yágüta Sikülágü. 2 Wügüriña wuriburuguna hagía, aranseñu haña tau hagimaran, gachüühadi haña dübü tau chilinchádi,* gachüühadi gimara, dandu lau hóunwenren kei lau habaünan. Anihán hiri:

Liduheñu Saulu, hádangiñe lani Benhamín türibu: 3 Aieserü, le ábuti luma Hoasi, ha lirahüñü Semaá le lílana Gibeá; Hesieli luma Péletü, lirahüñü Asümáweti; Beraká luma Heú le Anatótuna; 4 Isümaíasi, le Gabaónna, aban hádangiñe darandi ganigitiña ani le giñe hábuti; Heremíasi, Haasieli, Hoanán; Hosabádü, le Gederáana, 5 Elusái, Herimótu, Bealíasi, Semaríasi; Sefatíasi, le Arufíta; 6 Elikaná, Isíasi, Asaréli, Hoéserü luma Hasobeámü ha ladügawagun Koré; 7 Hoelá luma Sewadíasi, ha lirahüñü Heroamü le Gedoruna.

8 Sügütiña giñe fiu hádangiñe lani Gadü türibu lumoun Dawidi dan meha le lidan lan uburugu gabarieirunti le lídanbei fulasu mageirawati. Wügüriña meha wuriburuguna hagía, ha ganigitiña, aranserúatiña lubá wuribu, lau hadaüdina tuma hefeinte. Haganóun kamá liñún, furesetiña áraabu kei usari. 9 Anihán hiri: Éserü, furumiñeti; Abüdíasi habiaman; Eliabü, háürüwan; 10 Misümaná hagadürün; Heremíasi haseingün; 11 Atái hasisin; Elieli hasedün; 12 Hoanán hawidün; Elisabádü hanefun. 13 Heremíasi hadiisin; Makübanái haunsun. 14 Ladügawagun meha Gadü ha, hábutigu meha súdaragu. Lérügü amuleñein hadan gebegiti kei hebegi san wügüriña, le íbugañaü gebegiti kei hebegi milu. 15 Hagía ánhiñuragunbalin Hordán lidan furumiñeti lihatiri irumu, dan le buin liña lubéi duna, aba hanuraagüdüniña sun ha lídanbaña fulasu wayati luagun oubaü le ñéingiñe lubéi laboucha weyu luma luagun le ñeinhin lubéi lálüda.

16 Ñǘdüntiña giñe fiu wügüriña hádangiñe lani Benhamín luma hádangiñe lani Hudá türibu lumoun Dawidi lidoun uburugu gabarieirunti. 17 Aba láfuridun Dawidi habaroun, lariñaga houn:

—Anhein hiábiña lubéi lau darangilaü lun híderagunina, gúndaatina tau sun nanigi lun hóundarun numoun; gama lumoun anhein hiábiña lubéi lun heyeedunina, lun hederegerunina houn náganiñu, lau sun madügüngidina lan wuribati, arihaléi Aburemei le Habungiute wagüchagu ani beilaün!

18 Ábati lebelurun Sífiri lidoun Amasái, le hábuti darandi, aba lariñagun:

«Darangilaü bun, Dawidi, liráü Hesé!

Bumalá darangilaü!

Darangilaü bun luma houn ha íderagutibu,

lugundun íderagua láadibu Bubungiute!»

Aba leresibiruniña Dawidi, aba líchugun ubaraü houn hadan hábutigu súdaragu.

19 Ñéinñanu giñe fiu hádangiñe lani Manasési türibu ásügürütiña lumoun Dawidi dan le lídinbei aganawa hama Filistéana lun lageindagun luma Saulu, lau sun siñá lan meha líderaguniña Dawidi Filistéana, ladüga lárigi hóundaragun ábutigu Filistéana aba habuguni Dawidi hawariua, hariñaga: «Lásügürüba le wawéi lumoun Saulu le labureme!» 20 Añahán hádangiñe lani Manasési türibu ha ásügürübaña lumoun Dawidi dan le lídinbei Sikülágü: Adüná, Hosabádü, Hediaeli, Mikaeli, Hosabádü, Eliú, Siletái hábutigu lisudaranigu Manasési. 21 Hagía ha íderagubalin Dawidi wuriburugu lugundun wuriburuguna ganigitiña sun hagía, chülütiña hábutigume súdaragu. 22 Sagü weyu haganwoundun lánigu Dawidi darí lun hagibedagun.

23 Añahán sun ha óundarubaña lumoun Dawidi Ebürón lun hawuribuhan luéigiñe lóubadina, lun hásügüragüdüni larúeihan Saulu lun, según lilurudun Aburemei: 24 Hádangiñe lani Hudá türibu, sisi-milu-widü-san wügüriña lau burí idaüdinaü tuma eféin, aranseñu lun wuribu. 25 Hádangiñe lani Simeón türibu: Sedü-milu-san wuriburuguna ganigitiña aranseñu lun wuribu. 26 Hádangiñe lani Lewí türibu: Gádürü-milu-sisi-san, 27 hámaya ǘrüwa-milu-sedü-san hádangiñe liduheñu Aarón, Hoyadá hábuti; 28 luma Sadoku, wügüri nibureingili, ani wuriburuguna ganigiti, hama wein-biama hábutigu liduheñu. 29 Hádangiñe lani Benhamín türibu, hameme lani Saulu türibu, ǘrüwa-milu wügüriña, lugundun lidan oura ligía lúmagiñeñanu Saulu ha hiibe-agei. 30 Hádangiñe lani Éfürain türibu, wein-milu-widü-san wuriburuguna ganigitiña, díseti laganbahoun hawagu. 31 Hádangiñe hamidan lani Manasési türibu, disiwídü-milu wügüriña, ha iridúbaña lun houdin lun híchuguni Dawidi urúeime. 32 Hádangiñe lani Isakárü türibu, bián-san ábutigu hau sun wügüriña ha lílana hani türibu lábugiñe hagumadin, ábutigu hagía, subudi hamutiha ka lan lunbei hadügüni Ísüraelina luma dan le ídanba lubéi ladügǘwa. 33 Hádangiñe lani Sabulón türibu, dimí-san-milu súdaragu aranseñu lun wuribu, tau sun tuwuyeri áruma, deregeguñu houngua lun híderaguni Dawidi. 34 Hádangiñe lani Nefütalí türibu, milu ábutigu hau darandi-sedü-milu wügüriña lau arufun tuma idaüdinaü. 35 Hádangiñe lani Dan türibu, wein-widü-milu-sisi-san súdaragu. 36 Hádangiñe lani Aserü türibu, bián-wein-milu súdaragu aranseñu lun wuribu. 37 Loubafurugugiñe Hordán, san-wein-milu wügüriña hádangiñe türibu ha lani Rubén luma Gadü, hama hádangiñe hamidan lani Manasési türibu, tau sun tuwuyeri áruma.

38 Sun wuriburuguna ha, aba houdin Ebürón aranseñu lun híchuguni Dawidi lurúeiteme sun Ísüraeli; sunti ha híbiri Ísüraelina aranseñu haña giñe lun hadügüni ítara. 39 Rédeitiña ǘrüwa weyu luma Dawidi ñein, eiga gurá hagía, kei buga aranseña lubéi hapaisanun habá. 40 Bóugudin luéi lira, barütiña habesinanigu, hama ha lánigu Isakárü, Sabulón luma Nefütalí éigini houn hanagawagu burigü, kameyu, mile hama bágasu wügüriña. Barütiña saragu éigini houn: Fulúaru, durudia tautu igu, beibei sáüharu, diwéin, bágasu hama mudún, gíbeti hanügün houn ladüga ñeinñein saragu ugundani Ísüraeli.